ԵՐԵՒԱՆ.– Նորանշանակ վարչապետ Յովիկ Աբրահամեան 17 Ապրիլին առաջին անգամ ըլլալով վարած է գործադիրի նիստը: Ուշագրաւ եղած է այն, որ ան իր նոր գործընկերներուն ոչ մէկ խօսք յղած է, այլ սկսած է շատ ընթացիկ ողջոյնով եւ անցած օրակարգի հարցերուն:

Իսկ կառավարութիւնը բաւական հետաքրքրական պատկեր կը ներկայացնէր: Նշանակուած էին ընդամէնը 2 նախարար, միւսները՝ պաշտօնակատարներ, ու կը տիրէր բաւական անորոշ մթնոլորտ: Կային նաեւ 3 նախարարներ, որոնք այդ աթոռներուն վրայ նստելու նպատակով դուրս եկան իրենց հարազատ կուսակցութենէն:
Կառավարութեան պաշտօնակատար անդամները չշտապեցին գնահատականներ տալ Օրինաց երկիր կուսակցութեան ու նաեւ իրենց գործընկերներուն՝ կուսակցութենէն հեռանալու որոշումներուն։ Նիստէն առաջ եւ ետք ժողովականներուն մեծամասնութիւնը նախընտրեց չզր-ուցել լրագրողներուն հետ։

«Քաղաքական գործընթացներ են, քաղաքական ուժն ինքն է որոշում, թէ ինչ պէտք է անի: Ես այդ ուժը ներսում երբեք չեմ եղել, սակայն պէտք է յարգել այն որոշումները, որ կայացրել են: Ոչ մի քաղաքական ուժի ճակատին գրած չէ, որ ամբողջ կեանքում պէտք է լինի իշխանութիւն: Ընդդիմութիւնը միշտ ձգտում է իշխանութեան, իշխանութիւնները փոխւում են, սա քաղաքական պրոցես է ամբողջ աշխարհում», յայտնած է արդարադատութեան նախարարի պաշտօնակատար Հրայր Թովմասեանը:

Թղթակիցը հարցուցած է, որ ի՞նչպէս կը գնահատէ նախարարներուն կուսակցութենէն հեռանալը. «Չեմ կարող պատասխանել մարդկանց անձնական մոտիվացիաներով քայլերին: Պէտք է մտնել նրանց մարմնի մէջ, որ կարողանաս այդ հարցերին պատասխանել», նշած է ան։