ԵՐԵՒԱՆ, «Արմէնիա Նաու».– Հայաստանի նախագահ Սերժ Սարգսեան անգամ մը եւս մեղադրած է Թուրքիան՝ Հայաստանի հետ սահմանը փակ պահելուն եւ Անգարայի Ցեղասպանութեան ժխտման քաղաքականութեան համար։ Ան այս յայտարարութիւնը կատարած է «Արեւելեան գործընկերութեան» 5րդ տարեդարձին առիթով կազմակերպուած բարձր մակարդակի հանդիպման ընթացքին:

«Հայ-թուրքական յարաբերութիւնների չկարգաւորուած լինելը եւ Եւրոպայի վերջին փակ սահմանը շարունակում են մնալ համաեւրոպական անվտանգութեան խոցելի բաղադրիչներից մէկը: Պարադոքսալ է, բայց փաստ՝ Եւրոպական Միութեան անդամակցութեան յաւակնող Թուրքիան զմռսել է հարեւան երկրի սահմանը, երբ Եւրոպական միութիւնում սահմաններն արդէն վաղուց պատմութիւն են դարձել, իսկ ազատ տեղաշարժը՝ հիմնարար սկզբունք», 24 Ապրիլին յայտարարած է նախագահը։

«Այսօր ես Պրահա եմ ուղեւորուել Հայոց Ցեղասպանութեան յուշահամալիրից, որտեղ յարգանքի տուրք մատուցեցինք Հայոց Ցեղասպանութեան անմեղ զոհերի յիշատակին: 1915 թուականի Ապրիլի 24ին Կոստանդնուպոլսում հարիւրաւոր հայազգի մտաւորականների՝ գրողների, նկարիչների, արուեստագէտների, բժիշկների, հասարակական գործիչների ձերբակալութեամբ եւ սպանդով սկսուեց Օսմանեան կայսրութեան կողմից նախապէս ծրագրուած եւ պետական մակարդակով իրագործուած ոճրագործութիւնը, որը մարդկութեան պատմութեանը յայտնի է որպէս 20րդ դարի առաջին ցեղասպանութիւն։

Այսօր ես ցանկանում եմ շնորհակալական խօսք յղել այն պետութիւններին, կազմակերպութիւններին եւ անհատներին, որոնք օգնութեան ձեռք են մեկնել մեզ համազգային ողբերգութեան ժամանակ, ճանաչել եւ դատապարտել են Հայոց Ցեղասպանութիւնը: Ցեղասպանութեան յանցագործութիւնը վաղեմութեան ժամկէտ չունի, եւ Հայոց Ցեղասպանութեան 100ամեայ տարելիցին ընդառաջ եւս մէկ անգամ կարեւորում եմ այս աննախադէպ ոճրի ճանաչումն ու դատապարտումը միջազգային հանրութեան կողմից», ըսած է Սերժ Սարգսեան:

Անոր համաձայն՝ թէեւ Թուրքիան կը ձգտի ԵՄի անդամակցութեան, բայց եւ այնպէս կը շարունակէ խուսափիլ սեփական անցեալին հետ առերեսուելէ, խուսանաւել պատասխանատուութենէն եւ տասնամեակներ շարունակ իր ժխտողականութեան քաղաքականութեամբ խեղաթիւրել պատմութիւնը: «Աւելին, Թուրքիան ջանք չի խնայում ժխտողականութիւնը տարբեր մեթոդներով պարտադրելու նաեւ այլ երկրների», աւելցուցած է ան:

«Այսօր Թուրքիայի հազարաւոր քաղաքացիներ, որոնց շարքերը տարէցտարի ստուարանում են, չնայած հետապնդումներին եւ հալածանքներին, մերժում են Թուրքիայի ժխտողական քաղաքականութիւնը եւ կանգնում ճշմարտութեան կողքին: Սեփական պատմութեան հետ առերեսումը եւ դրա հետեւանքների գիտակցումը հաշտեցման կարեւոր գրաւականն է: Մենք հաւատում ենք, որ հաշտեցման կարեւոր գրաւական է նաեւ մարդկային շփումների խթանումը: Ցաւօք, դա գրեթէ անհնարին է, երբ առկայ են արհեստական խոչընդոտներ, երբ փակ է սահմանը», նշած է Սերժ Սարգսեան:

Իր խօսքին մէջ Հայաստանի նախագահը անդրադարձած է նաեւ «Արեւելեան գործընկերութեան» ծիրին մէջ կատարուող բարեփոխումներուն, ինչ որ մեծապէս ամրապնդած է ժողովրդավարութեան զարգացումը Հայաստանի մէջ:

«Շօշափելի առաջընթաց է գրանցուել նաեւ կոռուպցիայի դէմ պայքարում, ազատ եւ արդար ընտրութիւնների, ազատ տնտեսական մրցակցութեան ապահովման, պետական կառոյցների գործունէութեան թափանցիկութեան բարձրացման, դատական համակարգի անկախութեան ապահովման, քաղաքացիական հասարակութեան զարգացման գործում: Միաժամանակ մենք գիտակցում ենք, որ դեռ շատ անելիքներ ունենք եւրոպական մոդելի իրական ժողովրդավարութեան կայացման համար։ «Արեւելեան գործընկերութեան» շրջանակներում առանցքային ձեռքբերում եմ համարում մարդկային շփումների խրախուսումը: Այս առումով ցանկանում եմ առանձնացնել մուտքի արտօնագրերի ոլորտում գրանցուած առաջընթացը, ինչի ապացոյցն է քաղաքացիների միջեւ կապերը եւ փոխանակումներն աւելի խթանելու նպատակով նոր իրաւական շրջանակների ձեւաւորումը: Ուժի մէջ են մտել վիզաների դիւրացման եւ ռէադմիսիայի մասին համաձայնագրերը», դիտել տուած է ան:
Հայաստանի նախագահը լուսարձակի տակ առած է նաեւ ուքրանական ճգնաժամը, նշելով, թէ անիկա ցոյց տուաւ, որ առանց ներկայ իրավիճակի արմատական պատճառները հասկնալու «Արեւելեան գործընկերութեան» հետագայ ընթացքը կասկածի տակ կ՛առնուի:

«Հայաստանը միացել է «Արեւելեան գործընկերութեան»ը խորին համոզմամբ, որ այն ուղղուած չէ որեւէ երրորդ երկրի դէմ: Մենք մնում ենք այդ համոզման: Այս նախաձեռնութիւնն ունի բոլոր նախադրեալները տարածաշրջանում ոչ թէ բաժանարար պատ, այլ միացնող կամուրջ դառնալու համար: Անհրաժեշտ է երկխօսութեան ճանապարհով գտնել տարածաշրջանի բոլոր շահառուների հետաքրքրութիւնները հաշուի առնող լուծումներ», եզրափակած է նախագահ Սարգսեան: