Ազգային ժողովում լրագրողների հետ ճեպազրոյցի ժամանակ ՀՀ վարչապետ Յովիկ Աբրահամեանն անդրադարձաւ երկրում առկայ ստուերին ու նշեց, թէ բոլոր երկրներում էլ ստուեր կայ, եւ իրենք նպատակ են դրել այն հարկային դաշտ բերել: «Մենք տեսնում ենք, որ կայ հնարաւորութիւն հարկային դաշտը դուրս բերել ստուերից, եւ հիմա օգտագործելու ենք մեր այդ լծակները», ասաց նա: Իսկ թէ ինչու է յաճախ նա յայտարարում, թէ սկսելու է հէնց իր մերձաւորներից, պատասխանեց. «Սինգապուրի վարչապետին, երբ հարցրել են, թէ ինչպէս է յաջողութեան հասել, նա պատասխանել է, որ սկսել է իր մերձաւորներից»: Յովիկ Աբրահամեանը նաեւ խօսեց Գագիկ Ծառուկեանի եւ Լեւոն Տէր Պետրոսեանի հանդիպումից՝ նշելով, որ ողջունում է, քանի որ կարծում է, որ իւրաքանչիւր հանդիպում ունի իր դրական եւ բացասական կողմերը: Նա նշեց, թէ իրեն չի հետաքրքրում, թէ դա կարող է իր դէմ լինել կամ կողմ: «Ես իմ գործն եմ անելու, աշխատելու եմ, հիմա ով ուզում է դէմ լինի, կողմ լինի: Ի՞նչ է տալու ինձ, եթէ ես իմանամ, որ ինձ դէմ են, գնամ ասեմ ինձ դէմ մի խօսէ՞ք», հարցրեց նա:

ՀԱՐՑ.- Պարոն Աբրահամեան, ինչպէ՞ս էք պայքարելու ստուերի դէմ, եթէ չգիտէք, թէ ինչքան է ստուերը մեր երկրում:
ՅՈՎԻԿ ԱԲՐԱՀԱՄԵԱՆ.- Բոլոր երկրներում էլ ստուեր կայ, բայց մեզ մօտ աւելի շատ է, չգիտեմ որքան է, բայց կայ: Մենք տեսնում ենք, որ կայ հնարաւորութիւն հարկային դաշտը դուրս բերել ստուերից, եւ հիմա օգտագործելու ենք մեր այդ լծակները:

ՀԱՐՑ.- Ինչո՞ւ էք անընդհատ յայտարարում, որ սկսելու էք ձեր մերձաւորներից:
ՅՈՎԻԿ ԱԲՐԱՀԱՄԵԱՆ.- Պարզ չէ՞, թէ ինչի համար եմ ասում: Սինգապուրի վարչապետին, երբ հարցրել են, թէ ինչպէս է յաջողութեան հասել, նա պատասխանել է, որ սկսել է իր մերձաւորներից: Ես նկատի ունեմ, որ մեր բոլոր մերձաւորներն ու ընկերները պէտք է հասկանան, որ առաջինը իրենք են պարտաւոր որեւէ խախտում թոյլ չտալ իրենց աշխատանքի մէջ, հարկային դաշտ գան բոլորը: Մեր բոլորի նպատակը դա է, եւ կարծում եմ՝ ես շատ պարզ եմ ասել: Որեւէ տողատակ փնտռել չ՛արժէ: Ես մարդկանց յորդորում եմ, որ իմ մերձաւորներից սկսած բոլորի նկատմամբ պէտք է հաւասար վերաբերմունք ցուցաբերել:

ՀԱՐՑ.- Իսկ մոնիթորինգ արուե՞լ է, թէ ովքեր են ստուերում գործում:
ՅՈՎԻԿ ԱԲՐԱՀԱՄԵԱՆ.- Ո՛չ, դա կ՛անեն պատկան մարմինները: Մենք մի շատ լաւ գործ ենք նախաձեռնել եւ ունենալու ենք յաջողութիւն: Եթէ դուք էլ կը լսէք, որ կան նման դէպքեր, մենք կ՛արձագանգենք իւրաքանչիւրին, կը ստուգենք, եթէ իրականութեանը կը համապատասխանի, մենք կարգի կը հրաւիրենք:

ՀԱՐՑ.- Հաւատո՞ւմ էք, երբ պաշտօնեան ասում է, որ ինքը բիզնես չունի:
ՅՈՎԻԿ ԱԲՐԱՀԱՄԵԱՆ.- Եթէ նա ասում է ունի, ուրեմն պաշտօնից կը հրաժարուի, որովհետեւ օրէնքով իրաւունք չունի զբաղուել բիզնեսով: Իւրաքանչիւր մարդ կը հասկանայ, որ պաշտօնն ու բիզնեսով զբաղուելն անհամատեղելի են:

ՀԱՐՑ.- Այսինքն կը ստուգէ՞ք բոլոր պաշտօնեաներին:
ՅՈՎԻԿ ԱԲՐԱՀԱՄԵԱՆ.- Այո՛:

ՀԱՐՑ.- Նաեւ Ֆինանսների նախարար Գագիկ Խաչատրեանի՞ն:
ՅՈՎԻԿ ԱԲՐԱՀԱՄԵԱՆ.- Այո՛:

ՀԱՐՑ.- Իսկ դուք տեղեկութիւն ունէ՞ք, թէ որքան է կազմում ստուերը:
ՅՈՎԻԿ ԱԲՐԱՀԱՄԵԱՆ.- Տարբեր թուեր են հնչեցնում՝ 25-30 տոկոս:

ՀԱՐՑ.- Հաւասար խաղի կանոններ ստեղծելը ինչպէ՞ս էք հաշուարկել, ե՞րբ կ՛ազդի բիւջէի մուտքի վրայ:
ՅՈՎԻԿ ԱԲՐԱՀԱՄԵԱՆ.- Դեռ չի աւարտուել, կ՛աւարտուի, կ՛ասենք: Ապրանքաշրջանառութեան փաստաթղթաւորումը մինչեւ չիրականացնենք, չենք կարող ասել:

ՀԱՐՑ.- Պարոն Աբրահամեան, կառավարութիւնը հինգ տոկոս տնտեսական աճի մասին է յայտարարել, արդեօք սա նշանակո՞ւմ է, որ հրաժարականի համար արդէն հիմք կայ:
ՅՈՎԻԿ ԱԲՐԱՀԱՄԵԱՆ.- Ես ինչո՞ւ պիտի հրաժարական ներկայացնեմ: Մենք նոր ենք սկսել աշխատելու, մեր նպատակն է գալ ու երկար աշխատել ու պետութեան համար խնդիրներ լուծել: Մենք փորձելու ենք ապահովել տնտեսական աճ ու այս տարի մեր գործը լինելու է կայունութեան ապահովումը:

ՀԱՐՑ.- Պարոն Աբրահամեան, արդեօք ձեզ կը յաջողուի՞ բաւարարել ԲՀԿի պահանջները:
ՅՈՎԻԿ ԱԲՐԱՀԱՄԵԱՆ.- Ինչ է պահանջում, ես տեղեակ չեմ, ասում են, որ կը տեսնենք, եթէ ծրագրերը կ՛իրականացուեն, նորմալ կ՛աշխատեն, չենք պահանջի, չեն աշխատի՝ կը պահանջենք: Շատ նորմալ գնահատական է, ես գոհ եմ:

ՀԱՐՑ.- Իսկ Տիգրան Սարգսեանը չէ՞ր աշխատում, դրա համա՞ր պահանջեցին նրա հրաժարականը:
ՅՈՎԻԿ ԱԲՐԱՀԱՄԵԱՆ.- Ձեզ ինչո՞ւ է թւում, որ ես Տիգրան Սարգսեանի աշխատանքին պէտք է գնահատական տամ:

ՀԱՐՑ.- Պարոն վարչապետ, ասացիք, որ մտադիր էք «Վարչապետների ակումբ» ստեղծել, կը մանրամասնէ՞ք:
ՅՈՎԻԿ ԱԲՐԱՀԱՄԵԱՆ.- Երէկ եմ հնչեցրել այդ մասին, բայց հետամուտ կը լինեմ, կը մտածենք ձեւաչափի մասին, իմ կարծիքով ճիշդ գաղափար է եւ եթէ արդիւնաւէտ լինի կ՛օգտագործենք իրենց փորձը, իրենց գիտելիքները: Նախկին վարչապետներ ունենք, որոնք լաւ են աշխատել եւ ունեն մեծ փորձ ու գիտելիքներ:

ՀԱՐՑ.- Պարոն Աբրահամեան, կարո՞ղ ենք ասել, որ դուք խափանել էք քառեակի գործունէութիւնը:
ՅՈՎԻԿ ԱԲՐԱՀԱՄԵԱՆ.- Ես որեւէ գործ խափանելու տրամադրութիւն եւ մտադրութիւն չունեմ, իմ բոլոր տրամադրութիւնները լաւ գործեր անելն է, ոչ թէ որեւէ գործ խափանելը:

ՀԱՐՑ.- Պարոն վարչապետ, դուք ամբիոնից դեսպանների աշխատանքից դժգոհութիւն յայտնեցիք, ինչո՞ւ:
ՅՈՎԻԿ ԱԲՐԱՀԱՄԵԱՆ.- Ո՛չ, ես ասացի, որ իրենց պարտաւորութիւնների, աշխատանքի գնահատականի բաղադրիչը պէտք է լինի նաեւ այն, թէ իրենք ինչպէս են աշխատում: Այո՛, ներդրումների առումով պէտք է իրենք փորձեն Հայաստանը օտար ներդրողների համար գրաւիչ ներկայացնել: Ես ասում եմ, որ դեսպանների աշխատանքում պէտք է ներառուի նաեւ ներդրումներ անելը: Դա մեղադրա՞նք է:

ՀԱՐՑ.- «Նաիրիտի» վերագործարկման հարցում ի՞նչ էք նախատեսում անել:
ՅՈՎԻԿ ԱԲՐԱՀԱՄԵԱՆ.- Բարդ խնդիր էք ասում, հիմա մենք ուզում ենք յանձնաժողով ստեղծել, որպէսզի որոշում կայացուի՝ «Նաիրիտը» հնարաւո՞ր է վերագործարկել, թէ՝ ոչ:

ՀԱՐՑ.- «Ռոսնեֆտը» հրաժարուե՞լ է:
ՅՈՎԻԿ ԱԲՐԱՀԱՄԵԱՆ.- Ո՛չ, նման որոշում չկայ:

ՀԱՐՑ.- Իսկ աշխատավարձերի խնդիրը ինչպէ՞ս էք լուծելու:
ՅՈՎԻԿ ԱԲՐԱՀԱՄԵԱՆ.- Աշխատավարձի պարտք ունենք, դեռ 12 մլն. դոլարից աւել, եւ հիմա էներգետիկայի նոր նախարարը քննարկում է բոլոր ճանապարհները եւ պէտք է յստակեցնի, ինձ զեկուցի, տեսնենք ինչպիսի լուծումներ ենք տալու:

ՀԱՐՑ.- Պարոն Աբրահամեան, ընդդիմութիւնը իշխանափոխութեան կը հասնի՞:
ՅՈՎԻԿ ԱԲՐԱՀԱՄԵԱՆ.- Ինչո՞ւ, նպատակ ունե՞ն:

ՀԱՐՑ.- Կարծես թէ այո:
ՅՈՎԻԿ ԱԲՐԱՀԱՄԵԱՆ.- Ես չգիտէի:

ՀԱՐՑ.- Պարոն Աբրահամեան, ձեր անունը մամուլում շրջանառւում է, որ կոնկրետ դուք միջամտել էք Գորիսի քաղաքապետի ընտրութիւններում, եւ այդ իսկ պատճառով երկու թեկնածուները հանել են իրենց թեկնածութիւնը: Ինչպէ՞ս կը մեկնաբանէք:
ՅՈՎԻԿ ԱԲՐԱՀԱՄԵԱՆ.- Որեւէ միջամտութիւն չի եղել, եւ ինձ համար միեւնոյնն է, թէ մեր բնակչութիւնը որ թեկնածուին կ՛ընտրի:

ՀԱՐՑ.- Բացառո՞ւմ էք, որ Սուրիկ Խաչատրեանը կարող է միջամտած լինել:
ՅՈՎԻԿ ԱԲՐԱՀԱՄԵԱՆ.- Ինչպէ՞ս կարող եմ բացառել, եթէ նման տեղեկութիւն չունեմ:

ՀԱՐՑ.- Իսկ կը բացատրէ՞ք, թէ ինչ է նշանակում պարտադիր, բայց ոչ պարտադրուած:
ՅՈՎԻԿ ԱԲՐԱՀԱՄԵԱՆ.- Դա օրէնքի փաթեթում կը լինի, բացատրութիւնն էլ, ամէն ինչն էլ:

ՀԱՐՑ.- Պարոն Աբրահամեան, ինչպէ՞ս կը մեկնաբանէք Գագիկ Ծառուկեանի եւ Լեւոն Տէր Պետրոսեանի հանդիպումը:
ՅՈՎԻԿ ԱԲՐԱՀԱՄԵԱՆ.- Ողջունում եմ, իւրաքանչիւր հանդիպում ունի իր դրական եւ բացասական կողմերը:

ՀԱՐՑ.- Չի՞ մտահոգում ձեզ նրանց համագործակցութիւնը, որ կարող է, ի վերջոյ, դէմ դուրս գալ:
ՅՈՎԻԿ ԱԲՐԱՀԱՄԵԱՆ.- Ոչ մի բան չեմ բացառում, հիմա դրա համար ինչ է պէտք, որ ես լաւ աշխատեմ, ազնիւ աշխատեմ, թափանցիկ աշխատեմ, ինչքան ուզում են դէմ լինեն, կարեւորը փաստ չլինի, որ ինձ մեղադրեն, եւ որեւէ սխալ որոշում չկայացնենք, աշխատենք, ի հարկէ, հնարաւոր է, որ սխալ որոշումներ լինեն, եւ ես համոզուած եմ, որ նոր թիմի մէջ կայ եռանդ, եւ բոլորը համերաշխ ձեւով փորձում են գործը տանել առաջ, դա շատ կարեւոր հանգամանք է ինձ համար, իսկ ով չի աշխատի կամ վատ կ՛աշխատի, մենք կը բաժանուենք իրենից, ես էլ համոզուած եմ, որ ինձ մօտ յաջողուելու է:

ՀԱՐՑ.- Եթէ վեց ուժերից հինգը չպաշտպանի ձեր ծրագիրը, կարծո՞ւմ էք համագործակցութիւն կը ստացուի:
ՅՈՎԻԿ ԱԲՐԱՀԱՄԵԱՆ.- Այո՛, փորձելու եմ համագործակցել:

ՀԱՐՑ.- Իսկ դա ինչի՞ մասին կը յուշի:
ՅՈՎԻԿ ԱԲՐԱՀԱՄԵԱՆ.- Ոչ մի բանի:

«Թերթ»