ԵՐԵՒԱՆ, «Արմէնփրէս».– Եւրոպական միութիւնը կը շարունակէ տարբեր ծրագիրներու միջոցով խթանել Հայաստանի՝ Եւրոպական Միութեան մերձեցման գործընթացը եւ նպաստել Հայաստանի մէջ ժողովրդավարութեան ու արդիւնաւէտ կառավարման ամրապնդման: 3 Յունիսին, Երեւանի մէջ տեղի ունեցած է «Աջակցութիւն Հայաստանում ժողովրդավար կառավարմանը» ծրագիրի պաշտօնական մեկնարկը, որուն նպատակն է քաղաքացիական հասարակութեան կարողութիւններու հզօրացումը, ինչպէս նաեւ քաղաքացիական հասարակութեան աշխատանքներուն մէջ անոնց աւելի աշխոյժ ներգրաւումը:
«Եւրոպական միութիւնը հիմնական նուիրատուներէն է, որ աշխատանք կը տանի Հայաստանի մէջ քաղաքացիական հասարակութեան ձեւաւորման: Եւրոպական միութեան միջամտութեան ռազմավարութեան հիմնական նպատակներէն են՝ ամրապնդել ժողովրդավարական կառավարութիւնը, դիւրացնել առարկայական տեղեկատուութեան հասանելիութիւնը եւ զարգացնել անկախ լրատուամիջոցները, որոնք պիտի նպաստեն քաղաքական բազմակարծութեան ձեւաւորման: Հակառակ անոր որ Արեւելեան գործընկերութեան բոլոր երկիրները կը ձգտին այդ գաղափարին, քաղաքացիական հասարակութեան մասնակցութեան կարելիութիւնները կը շարունակեն սահմանափակ մնալ: Հայաստանի մէջ նկատելի են հետեւեալ միտումները՝ քաղաքացիական հասարակութեան մասնակցութիւնը քաղաքականութեան ձեւաւորման յարաբերութիւններուն, իրաւական դիտարկման եւ պետական կառավարման գործընթացին, սակայն՝ կրկին սահմանափակ շրջանակներու մէջ», յայտնած է Հայաստանի մէջ Եւրոպական միութեան պատուիրակութեան ղեկավար, դեսպան Թրայեան Հրիստէան:
Հայաստանի արդարադատութեան նախարար Յովհաննէս Մանուկեան նշած է, որ ծրագիրը լայն կարելիութիւն պիտի տայ ժողովրդավարութեան եւ արդիւնաւէտ կառավարման ամրապնդման համար: «Եւրոպական միութիւնը մեր այն գործընկերներից է, որ ակտիւօրէն աջակցում է Հայաստանի ժողովրդավարական պետութեան ինստիտուտների զարգացման, մարդու իրաւունքների պաշտպանութեան եւ արդարադատութեան առաւել արդիւնաւէտ համակարգի ներդրման հարցերում: Այս կարեւոր ազդեցութեան ցայտուն դրսեւորումն է ժողովրդավարական կառավարման այս ծրագիրը, որը լայն հնարաւորութիւն կը տայ ժողովրդավարութեան եւ արդիւնաւէտ կառավարման ամրապնդման համար», յայտնած է նախարարը:
Նշենք, որ «Աջակցութիւն Հայաստանում ժողովրդավար կառավարմանը» ծրագիրը, որուն պիւտճէն կը կազմէ 94,9670 եուրօ, կ՛երկարի 18 ամսուան վրայ: Բրիտանական խորհուրդի հայաստանեան մասնաճիւղի տնօրէն Արեւիկ Սարիբէկեանի համաձայն՝ անիկա կը գործադրուի հիմնականօրէն Երեւանի, նաեւ հինգ մարզերու մէջ՝ Տաւուշի, Լոռիի, Գեղարքունիքի, Վայոց Ձորի եւ Սիւնիքի:
