ԵՐԵՒԱՆ, «Արմէնփրէս».– Մայր աթոռ Սուրբ Էջմիածինի մէջ Ամենայն Հայոց Գարեգին Բ. կաթողիկոսի նախագահութեամբ, 6 Յունիսին տեղի ունեցած է Մայր աթոռին մէջ պաշտօնավարող եպիսկոպոսներու եւ հայաստանեան թեմերու առաջնորդներու հերթական ժողովը:
Ժողովին սկիզբը Ամենայն Հայոց կաթողիկոսը իր օրհնութիւնն ու գնահատանքը փոխանցած է ներկաներուն: Ան կարեւոր նկատած է ժողովի օրակարգին մէջ ընդգրկուած հարցերու համակողմանի քննարկումը եւ արդիւնաւէտ աշխատանք մաղթած ժողովականներուն աշխատանքներուն: Ժողովին ընթացքին քննարկուած են
եկեղեցւոյ հոգեւոր-կրթական, քարոզչական առաքելութեան վերաբերող կանոնական, ծիսական եւ ընկերային բնոյթի հարցեր:
Մայր աթոռի հոգեւոր-կրթական հաստատութիւններու գործունէութեան եւ 2014-2015 ուսումնասկան տարուան ընդունելութեան գործընթացին վերաբերեալ զեկոյց ներկայացուցած է Մայր աթոռի հոգեւոր-կրթական հաստատութիւններու վերատեսուչ, Գէորգեան հոգեւոր ճեմարանի տեսուչ Գէորգ եպս. Սարոյեանը: Ան դիտել տուած է, որ ներկայիս Մայր աթոռի հոգեւոր-կրթական հաստատութիւններուն մէջ կ՛ուսանին 236 սաներ: Սրբազանը յատկապէս անդրադարձած է հոգեւորականութեան պատրաստութեան ծրագիրներուն, ճեմարանական ընդունելութեան կազմակերպման ընթացքին ծառացող դժուարութիւններու եւ անոնց յաղթահարման ուղղութեամբ ձեռնարկուող նախաձեռնութիւններուն: Այս առնչութեամբ վեհափառ հայրապետը թելադրած է թեմակալ առաջնորդներուն՝ թեմերուն մէջ հոգեւոր հովիւներուն միջոցով քաջալերելու երիտասարդները, որպէսզի դիմեն Հոգեւոր ճեմարան: Հոգեւոր-կրթական հաստատութիւններուն յանձ-նարարուած է նաեւ լայն քարոզչութիւն կատարել՝ հաստատութիւններուն վերաբերեալ իրազեկուածութիւնը բարձրացնելու նպատակով:
Արհեստական վիժեցման խնդիրին մասին զեկոյցով հանդէս եկած է Մայր աթոռի Եկեղեցական հայեցակարգային հարցերու գրասենեակի տնօրէն Բագրատ եպս. Գալստանեանը: Զեկոյցին մէջ անդրադարձ կատարուած է Հայաստանի մէջ ժողովրդագրական հիմնախնդիրներուն, ծնելիութեան աճի նուազման, ամուսնալուծութիւններու թիւի բարձրացման եւ այդ պարունակին մէջ արհեստական ու սեռով պայմանաւորուած վիժեցման խնդիրներուն: Քննարկման ընթացքին յատուկ կերպով շեշտը դրուած է յիշեալ խնդիրներու յաղթահարման ուղղութեամբ քայլերու դիմելու անհրաժեշտութեան վրայ:
Այս առնչութեամբ Ամենայն Հայոց կաթողիկոսը յորդորած է թեմակալները՝ առաւել զօրացնել ընտանիքի, ընտանեկան արժէքներու ամրապնդման ուղղուած քարոզչութիւնը: Յանձնարարական տուած է Հայեցակարգային գրասենեակին՝ ձեռնամուխ ըլլալու Ս. Պսակի խորհուրդին եւ ժողովին արծարծուած նիւթերուն վերաբերեալ եկեղեցւոյ հայեցակարգային մօտեցումներու յստակացման:
