ԵՐԵՒԱՆ, «Երկիր Մեդիա».– «Դէմ եմ» նախաձեռնութիւնը 20 Յունիսին հրապարակած է յայտարարութիւն մը՝ Ազգային ժողովին մէջ քննարկուող «Կենսաթոշակային օրէնք»ի նոր նախագիծին վերաբերեալ:

Յայտարարութեան մէջ նշուած է. «ՀՀԿ խորհրդարանական խմ-բակցութիւնը, անտեսելով հասարակութեան պահանջները, երկրի սոցիալ-տնտեսական իրավիճակը եւ ի վերջոյ, երկրի շահը, փորձում է ԱԺ արտահերթ նստաշրջանի շրջանակներում ընդունել Հայաստանի կառավարութեան առաջարկած «Կուտակային կենսաթոշակների մասին» Հայաստանի Հանրապետութեան օրէնքում փոփոխութիւն կատարելու մասին օրինագիծը: Օրինագիծը կազմուելիս՝ հաշուի չի առնուել ՍԴ 2 Ապրիլի 2014թ. ՍԴՈՅ – 1142 որոշման հիմքում ընկած հիմնաւորումները, մինչդեռ հէնց այդ որոշմամբ էր պայմանաւորուած նշուած օրինագիծը կեանքի կոչելու անհրաժեշտութիւնը: Աւելին՝ նոր նախագիծը նոյնպէս պարունակում է տարատեսակ այլ խնդրայարոյց դրոյթներ: Հետաքրքիր է, որ հանրութեան համար նման կարեւորագոյն նշանակութիւն ունեցող եւ նախկինում մեծ աղմուկ առաջացրած օրէնքի նոր նախագիծը չի քննարկուել հանրութեան հետ: Այն հրապարակուել է միայն արտահերթ նստաշրջանի առաջին նիստի օրը՝ դրանով խախտելով Հայաստանի Հանրապետութեան մի շարք օրէնքներ ու կանոնակարգեր, փաստացի հնարաւորութիւն չտալով ԱԺ պատգամաւորներին ծանօթանալ նախագծին: Ընդ որում, նախագծին ծանօթ չեն նաեւ ՀՀԿական պատգամաւորները, ովքեր պատրաստւում են քուէարկել այդ օրինագծի օգտին: Գրեթէ բոլոր հիմնաւորումները, որոնք մենք բազմիցս բերել ենք արդէն իսկ հակասահմանադրական եւ անվաւեր ճանաչուած «Կուտակային կենսաթոշակների մասին» օրէնքի հակասահմանադրական, հակասոցիալական, հակամարդկային եւ հակապետական դրոյթների վերաբերեալ, հիմնականում հաշուի չեն առնուել, իսկ վիճայարոյց կարգաւորումները բովանդակային առումով նոյնութեամբ կիրառուել են նոր օրինագծում՝ այս անգամ արդէն նոր ձեւակերպումներով, ինչը կրկին անգամ հաստատում է մեր համոզմունքը առ այն, որ «Կուտակային կենսաթոշակների մասին» օրէնքի հիմնական նպատակը ոչ թէ սոցիալական դաշտի բարեփոխումներն են, այլ աշխատաւոր քաղաքացիներից լրացուցիչ գումարներ կորզելու օրինական հիմքերի ստեղծումը: «Դէմ եմ» քաղաքացիական նախաձեռնութիւնը խստագոյնս դատապարտում է վարչակազմի՝ Սերժ Սարգսեանի գլխաւորութեամբ, նման մօտեցումն ու գործելաոճը, որը կարող է բերել հանրային լուրջ ընդվզման: Միաժամանակ կոչ է անում զերծ մնալ հակասոցիալական, հակասահմանադրական եւ հակամարդկային նոր օրէնքի ընդունումից»: