Յունիսի 15-21ը Մայր աթոռ Ս. Էջմիածնում գումարուած Մայր աթոռ Ս. Էջմիածնի միաբանների հաւաքը, աւարտելով իր աշխատանքը, հանդէս եկաւ յայտարարութեամբ, որում ասւում է.

«Մենք՝ Մայր աթոռ Ս. Էջմիածնի միաբաններս, օրհնութեամբ Գարեգին Բ. Ծայրագոյն պատրիարք եւ Ամենայն հայոց կաթողիկոսի Յունիսի 15-21ը հաւաքուեցինք միաբանական ժողովի համայն հայութեան հոգեւոր կենտրոնում՝ աղօթական եւ եղբայրական սիրոյ մթնոլորտում: Միասնաբար աղօթեցինք մեր հայրենիքի եւ առաքելահիմն Ս. եկեղեցու անսասանութեան ու պայծառութեան, մեր հաւատաւոր ժողովրդի բարօրութեան եւ բարգաւաճման համար՝ հայցելով ամենակարող Աստծոյ օգնականութիւնն ու օրհնութիւնը:

Ժողովական այս օրերին, խորհրդածութեան նիւթ ունենալով Հայոց Ցեղասպանութեան 100րդ տարելիցը, նաեւ այցելեցինք Ծիծեռնակաբերդի յուշահամալիր՝ յարութեան յոյսով եւ հաւատով աղօթելով անմեղ զոհերի հոգիների հանգստութեան համար: Հոգեւոր մխիթարութեամբ արձանագրեցինք, որ 2013թ. Ս. Էջմիածնում գումարուած Հայ եկեղեցու Եպիսկոպոսաց ժողովը որոշել է սրբադասել Մեծ Եղեռնի բիւրաւոր նահատակներին:

Իջման Ս. Սեղանի առջեւ նորոգեցինք մեր միաբանական ուխտը՝ առաւել նախանձախնդրութեամբ եւ հաւատով իրականացնելու մեր առաքելութիւնն աշխարհասփիւռ մեր ժողովրդի կեանքում:

Գոհունակութեամբ ենք փաստում հոգեւոր-եկեղեցական կեանքում վերջին շրջանում արձանագրուած յաջողութիւններն ու ձեռքբերումները եւ եկեղեցու գործուն ներգրաւուածութիւնը մեր հասարակական կեանքի զանազան բնագաւառներում: Մենք նաեւ քաջ գիտակից ենք, որ հայ հանրութեան առջեւ ծառացած բարոյական եւ ընկերային մարտահրաւէրները դիմագրաւելու, ինչպէս նաեւ հոգեւոր-եկեղեցական կեանքում տեղ գտնող սայթաքումները շտկելու համար Հայ եկեղեցու սպասաւորներից պահանջւում է առաւել ջանք ու եռանդ, աստուածսիրութեան եւ հայրենանուիրումի անկոտրում ոգի:
Այս առումով մենք ողջունում ենք անաչառ եւ կառուցողական քննադատութիւնը, սակայն, ցաւօք, յաճախ նաեւ հնչում են անհիմն մեղադրանքներ, տեսանելի է ուղղորդուած հակաեկեղեցական քարոզչութիւն Հայ եկեղեցու եւ միաբանութեան հասցէին: Յորդորում ենք մեր ժողովրդին՝ տուրք չտալ շինծու այդ գնահատականներին եւ շարունակել գործուն եւ յանձնառու մասնակցութիւն բերել եկեղեցական կեանքից ներս՝ ի փառս Աստծոյ եւ ի նպաստ Մայր եկեղեցու զօրացման ու շէնացման: Ինչպէս անցեալում, այնպէս էլ այսօր Մայր աթոռ Ս. Էջմիածնի միաբանութիւնը եղբայրական սիրոյ ու նախանձախնդիր ծառայութեան ուխտի մէջ պիտի շարունակի իր առաքելութիւնը՝ աւետարանական լոյս պատուիրանների սերմանմամբ կանխելու անցանկալի երեւոյթները ազգային-եկեղեցական կեանքում:

Հայ եկեղեցին իր պատմական փորձառութեամբ, ամբարած իմաստութեամբ եւ ստեղծած մշտամնայ արժէքներով ազգային կեանքում եղել է եւ այսօր էլ մնում է հայ մարդու ինքնութեան պահպանութեան եւ քրիստոնէական արժեհամակարգի կենսագործման հիմնական երաշխաւորը:

Մենք՝ Մայր աթոռ Ս. Էջմիածնի միաբաններս, գիտակից մեր կոչմանն ու առաքելութեանը, միասնական ոգով ու կամքով վերահաստատում ենք մեր անվերապահ հաւատարմութիւնը եւ անմնացորդ սէրը Սրբութիւն Սրբոց աստուածակառոյց Մայր աթոռ Ս. Էջմիածնի եւ ազգիս հոգեւոր հօր՝ Գարեգին Բ. Ծայրագոյն պատրիարք եւ Ամենայն հայոց կաթողիկոսի հանդէպ»: