ՍՏԵՓԱՆԱԿԵՐՏ, «Հետք».- ԼՂՀ պաշտպանութեան նախարարութիւնը տարածած է հաղորդագրութիւն մը, ուր ներկայացուցած է ատրպէյճանական կողմի կրած կորուստները.

«Ադրբեջանի պետական ու ոչ պետական քարոզչութեան որդեգրած մարտավարութեանն ուշադիր հետեւելու դէպքում առաջին հերթին այն տպաւորութիւնն ես ստանում, որ հարեւան, բայց ոչ բարեկամ երկրի նշուած ոլորտի պատասխանատուները ոչ թէ հակուած են գոնէ ինչ որ չափով ներկայացնել առկայ ռազմաքաղաքական զարգացումների իրական վիճակը, որքան՝ իրենց քիմքին յարիր, ցանկալին մատուցել իրականի փոխարէն: Դա յատկապէս երեւում է վերջին օրերին ղարաբաղա-ադրբեջանական հակամարտ զօրքերի շփման գծում տեղ գտած աննախադէպ լարուածութեան ֆոնի վրայ, երբ մի կողմից նախայարձակ հակառակորդը փորձում է իրեն ներկայացնել հայկական ագրեսիայի զոհ, իսկ միւս կողմից ցոյց տալ, թէ ինչպիսի հակահարուած ու կորուստներ է հասցնում Արցախի բանակին: Մինչդեռ իրողութիւնը լրիւ հակառակն է եւ այն ունի հետեւեալ պատկերը:

Ս.թ. Յուլիսի 28ից մինչեւ Օգոստոսի 3ը ադրբեջանական բանակը հակամարտ զօրքերի շփման գծի տարբեր հատուածներում իրականացրել է հետախուզա-դիւերսիոն գործողութեան 5ից աւելի փորձ, որոնցից իւրաքանչիւրում ստանալով արժանի հակահարուած՝ բազմաթիւ կորուստներով յետ է շպրտուել իր ելման դիրքերը: Ինչպէս պաշտպանական, այնպէս էլ կանխարգելիչ գործողութիւնների արդիւնքում պաշտպանութեան բանակի առաջապահ ստորաբաժանումները՝ ըստ օրերի եւ ուղղութիւնների հակառակորդին հասցրել են հետեւեալ կորուստները.
– Յուլիսի 28ին Մարտակերտի ուղղութեամբ Ադրբեջանի յատուկ նշանակութեան ջոկատայինները տուել են 2 զոհ եւ վիրաւորներ ու յետ շպրտուել.
– նոյն օրը՝ Մարտունու ուղղութեամբ հակառակորդի կողմից ձեռնարկուած դիւերսիոն գործողութեան անյաջող փորձն աւարտուել է 1 զոհով ու վիրաւորներով.
– Յուլիսի 31ին՝ Գիւլիստանի ուղղութեամբ գործող հայկական ուժերը շարքից հանել են 2 ասկեարի.
– Պաշտպանութեան բանակի կողմից Օգոստոսի 1ի լոյս 2ի գիշերը Ասկերանի ուղղութեամբ ձեռնարկուած կանխարգելիչ գործողութեան արդիւնքում հակառակորդը տուել է 9 զոհ եւ 7 վիրաւոր: Իրենց ոտքով փախուստի են դիմել 19 ասկեարից միայն 3ը.
– Նոյն ժամանակահատուածում (Օգոստոսի 1ի լոյս 2ի գիշերը) Մարտակերտի ուղղութեամբ հետախուզա-դիւերսիոն գործողութիւն ձեռնարկած հակառակորդի շուրջ 50 հոգանոց յատուկ նշանակութեան ստորաբաժանումը յետ է շպրտուել իր ելման դիրքերը՝ տալով 6 զոհ եւ 7 վիրաւոր.
– Տակաւին նոյն օրը՝ Մարտունու ուղղութեամբ ձեռնարկուած կանխարգելիչ գործողութեան արդիւնքում ՊԲ անձնակազմը շարքից հանել է 3 ասկեար, 4ին՝ վիրաւորել.
– Օգոստոսի 2ին Ասկերանի ուղղութեամբ ձեռնարկած դիւերսիոն գործողութեան արդիւնքում Ադրբեջանը տուել է 1 զոհ եւ վիրաւորներ ու յետ շպրտուել:
Ընդհանուր առմամբ ադրբեջանական բանակը Յուլիսի 28ից Օգոստոսի 2ն ընկած ժամանակահատուածում հակամարտ զօրքերի շփման գծի տարբեր հատուածներում տուել է առնուազն 25 զոհ եւ 30ից աւելի վիրաւորներ:

Նոյն ժամանակահատուածում Արցախի պաշտպանութեան բանակի կորուստների թիւը կազմել է 5 զոհ, 7 վիրաւոր:

Սա է ղարաբաղա-ադրբեջանական հակամարտ զօրքերի շփման գծում վերջին հինգ օրերին տեղի ունեցած լոկալ առճակատումների իրական պատկերը, որին դեռեւս կ՛անդրադառնանք»: