«Սահմանադրական Փոփոխութիւնները Քառեակի Համար Փորձաքար Կը Հանդիսանան». Արծուիկ Մինասեան

Վարեց՝ ԼՈՒՍԻՆԷ ԲԱՐՍԵՂԵԱՆ

Ոչ իշխանական քառեակում տարաձայնութիւններին աւելացել է եւս մէկը: Դաշնակցութիւնն ու «Բարգաւաճ Հայաստան»ը ցանկանում են կրկին Սահմանադրական դատարան դիմել «Կուտակային կենսաթոշակների մասին» օրէնքի հարցով, իսկ «Ժառանգութիւնն» ու ՀԱԿը դէմ են դրան, թէեւ ՍԴի դիմումը գրեթէ պատրաստ է:
«Ժառանգութիւնն» ու ՀԱԿը աննպատակայարմար են համարում ՍԴ դիմելը, դրա մէջ իմաստ չեն տեսնում, այն համարում են ժամանակի անիմաստ վատնում, իսկ ԲՀԿն ու ՀՅԴն՝ ընդհակառակը: Քառեակում արդէն սեպարատ հանդիպումներ են սկսուել, եւ դժուար է ասել, թէ դրանք ինչով կ՛աւարտուեն:
ԱԺ ՀՅԴ խմբակցութեան պատգամաւոր Արծուիկ Մինասեանը, ով պատրաստում է ՍԴի դիմումը, երէկ պատասխանել է մեր հարցերին:

ԼՈՒՍԻՆԷ ԲԱՐՍԵՂԵԱՆ.- Պարոն Մինասեան, ո՞րն է լինելու ՍԴ այս նոր դիմումի հիմնական պահանջն ու շեշտադրումը:
ԱՐԾՈՒԻԿ ՄԻՆԱՍԵԱՆ.- Ապրիլի 2ի ՍԴ որոշմամբ դատարանն առաջադրել էր ոչ միայն կենսաթոշակային համակարգի բարեփոխումների անհրաժեշտութիւն, այլ, ըստ էութեան, տուել էր նաեւ ճանապարհային քարտէս: Մեր խորին համոզմամբ, այդ քարտէսը իրացուած չէ: ՍԴ ներկայացուելիք դիմումի առաջին խոշոր հատուածը լինելու է այն, որ բովանդակային առումով ընդունուած օրէնքները չեն ապահովում Կուտակայինի հարցով ՍԴ որոշմամբ ներկայացուած իրաւական որոշումները, որոնց մէջ սեփականութեան իրաւունքի պաշտպանութեան հարցն է, քաղաքացու արժանապատիւ թոշակ ստանալու հարցը եւ այլն: Դիմումի երկրորդ հատուածը լինելու է ընթացակարգային խախտումների վերլուծութիւն: Միւս հատուածը վերաբերում է օրէնքների տեխնիկական մասին: Շփոթ կայ օրէնքի կարգաւորման դաշտում, եւ ստեղծուած խառնաշփոթն իրաւակիրառ պրակտիկայում բերելու է քաղաքացիների իրաւունքների զանգուածային ոտնահարումների: Մենք յոյս ունենք, որ այս բողոքը եթէ ոչ 100 տոկոսով, ապա էական մասով կը բաւարարուի, եւ մենք վերջում կը կարողանանք կենսաթոշակային համակարգի բարեփոխումներին հաղորդել մարդկային տեսք:

ԼՈՒՍԻՆԷ ԲԱՐՍԵՂԵԱՆ.- Բայց Ժառանգութիւնն ու ՀԱԿը իմաստ չեն տեսնում կրկին ՍԴ դիմելու մէջ: Իմաստը, ըստ ձեզ, ո՞րն է, եւ ինչպէ՞ս էք վերաբերւում միւս երկուսի դիրքորոշմանը:
ԱՐԾՈՒԻԿ ՄԻՆԱՍԵԱՆ.- Անկեղծ, ինձ միշտ մտահոգել է, թէ քաղաքական ուժերը ինչո՞ւ են որդեգրում մի քաղաքականութիւն, յետոյ ընթացքում հրաժարւում են դրանից: Մեզ համար սահմանադրական բողոքարկումն ունի մէկ կարեւոր նպատակ՝ երկրում պէտք է հաստատուի սահմանադրական արդարադատութիւն: Իսկ դրա առաջին կարեւոր պայմանն է՝ ճանաչել եւ դիմել սահմանադրական մարմնին: Երկրորդ, ՍԴն Ապրիլի 2ին կայացրել է, իմ գնահատմամբ, շատ լաւ որոշում, եւ հարկաւոր է հասնել նրան, որ այդ որոշումը կատարուի մինչեւ վերջ: Ինչ վերաբերում է անիմաստութեանը կամ որոշակի իմաստ չտեսնելուն, ամէն քաղաքական ուժ եւ գործիչ ինքն է որոշում իր վարքագծի իմաստաւորութեան աստիճանը, եւ գտնում եմ, որ եթէ առաջիկայում դիմումի բովանդակութիւնը փոխանցուի նաեւ քառեակի միւս ուժերին, շատերն իրենց վերաբերմունքը կը փոխեն:

ԼՈՒՍԻՆԷ ԲԱՐՍԵՂԵԱՆ.- Հնարաւո՞ր է, ի վերջոյ, քառեակում համաձայնութիւն ձեռք չբերուի, ու վերջում ՍԴ չդիմէք:
ԱՐԾՈՒԻԿ ՄԻՆԱՍԵԱՆ.- Մենք հակուած չենք դրան, բայց ամէն ինչ քննարկումների ընթացքում կ՛երեւայ: Ես չեմ կարող հիմա վստահ կանխատեսել, թէ ինչ տեղի կ՛ունենայ քառեակի մէջ, բայց ինձ համար, որպէս մասնագէտի, ակնյայտ է՝ եթէ մենք սահմանադրական բողոքարկում չբերենք, նշանակում է, կորցնում ենք սահմանադրական ճանապարհով փոփոխութիւններ իրականացնելու իրական հնարաւորութիւնը:

ԼՈՒՍԻՆԷ ԲԱՐՍԵՂԵԱՆ.- Այդուհանդերձ, չի բացառւում, որ քառեակում այլ որոշում կայացուի:
ԱՐԾՈՒԻԿ ՄԻՆԱՍԵԱՆ.- ՀՅԴն եւ ԲՀԿն, ըստ էութեան, համաձայնուել են սահմանադրական բողոքարկման ճանապարհով գնալուն: Սա նշանակում է, որ անկախ նրանից՝ «Ժառանգութիւնն» ու ՀԱԿը կը միանան մեզ, թէ ոչ, մենք անհրաժեշտ ստորագրութիւնների քանակութիւնը կ՛ունենանք: Բայց քանի որ մենք յարգում ենք մեր գործընկերներին, ուզում ենք, որ բովանդակային քննարկում տեղի ունենայ նաեւ քառեակում:

ԼՈՒՍԻՆԷ ԲԱՐՍԵՂԵԱՆ.- Ե՞րբ յստակ կը լինի, թէ երբ կը քննարկէք եւ երբ կը դիմէք ՍԴ:
ԱՐԾՈՒԻԿ ՄԻՆԱՍԵԱՆ.- Կարծում եմ, առաջիկայ օրերին, երբ աւարտուի դիմումի մշակման աշխատանքը, Սեպտեմբերի ընթացքում թէ՛ քառեակի քննարկմանը կը ներկայացուի եւ թէ վերջնական որոշումը կը կայացուի:

ԼՈՒՍԻՆԷ ԲԱՐՍԵՂԵԱՆ.- Պարոն Մինասեան, քառեակում սահմանադրական փոփոխութիւնների հարցում հակասութիւններ կան: Այս հարցում հակասութիւն կայ, մինչ այդ էլ կային, հիմա առանձին-առանձին հանդիպումներ են տեղի ունենում: Չէ՞ք կարծում, որ ինչ որ շատ են շատանում այդ հակասութիւնները, ու հնարաւո՞ր է՝ քառեակում լուրջ ճաքեր առաջանան:
ԱՐԾՈՒԻԿ ՄԻՆԱՍԵԱՆ.- Յաճախ քառեակը շփոթում են կոալիցիայի հետ: Քառեակը կոնկրետ հարցերի շուրջ համագործակցութեան ձեւաչափ է: Որեւէ ձեւով այն չի կարող դիտարկուել որպէս մի ամուր կամ կուռ երկաթբետոնէ կառոյց, որը քանդւում է կամ տարաձայնութիւնների պատճառով կարող է փլուզուել: Սահմանադրական փոփոխութիւնների անհրաժեշտութիւնը մենք կարեւորել ենք եւ գտնում ենք, որ դա համակարգային իշխանափոխութեան առաջին ու հիմնական քայլն է, որը պէտք է լինի սահմանադրական մակարդակում, իսկ այնուհետեւ նաեւ ընտրական համակարգի միջոցով կոնկրետ անձանց փոփոխութեան մասով: Այստեղ կայ տարաձայնութիւն: Նրանք, ովքեր համարում են, որ դա ճիշդ ճանապարհ չէ, ունեն իրենց տեսակէտը, բայց երբեք ընդունելի չեն գնահատականները, երբ փորձում են վիրաւորել կամ համեմատել մեր թշնամիների հետ, սկսած առանձին խոշոր քաղաքական գործիչներից, վերջացրած առանձին վերլուծաբան քաղաքագէտների կամ լրագրող-գրչակների մակարդակով, երբ փորձ է արւում տեսակէտը պահպանողին կամ կրողին ներկայացնել որպէս յաճախորդ կամ չգիտես ինչ: Բոլոր այն անձինք, ովքեր չեն պատկերացնում համակարգային փոփոխութեան իմաստն ու տրամաբանութիւնը, ովքեր անտեսում կամ նսեմացնում են Սահմանադրութեան դերը, նշանակում է՝ իրենք այդ սահմանադրական փոփոխութիւններում իրենց չեն տեսնում եւ երկրի վիճակի բարելաւումը չեն տեսնում:

armtimes.com