ՀԱՐՑԱԶՐՈՅՑ ԱԺ ՀՅԴ ԽՄԲԱԿՑՈՒԹԵԱՆ ՔԱՐՏՈՒՂԱՐ ԱՂՈՒԱՆ ՎԱՐԴԱՆԵԱՆԻ ՀԵՏ

 

«Դաշնակցութիւնը երբեք իր որոշումներն ու քայլերը չի պայմանաւորել՝ թէ կողքից ինչ կ՛ասեն: Եթէ համոզուած ես քո դիրքորոշման ճշմարտութեան մէջ, վստահ ես, որ անում ես ճիշդ քայլ, եւ այլ ելք ուղղակի չկայ, կողքից միշտ խօսելու են». այս մասին «Երկիր Մեդիա» հեռուստաընկերութեան «Խմբագիր» հաղորդաշարի ժամանակ ասել է ԱԺ ՀՅԴ խմբակցութեան քարտուղար Աղուան Վարդանեանը:
Հարցազրոյցն ամբողջութեամբ՝ ստորեւ.

ՀԱՐՑ.- Պարոն Վարդանեան, վերջին օրերին ՀՅԴ ներկայացուցիչներն արդէն առիթ ունեցել են ներկայացնելու Հոկտեմբերի 10ի հանրահաւաքին չմասնակցելու իրենց որոշման հիմքերը: Մենք կը ներկայացնենք բացառապէս մամուլի հրապարակումներից մէջբերումներ եւ կը խնդրենք մենաբանել դրանք: Իսկ մինչ այդ կը խնդրէի պատասխանէիք՝ այս ողջ աժիոտաժը (իրարանցումը-Խմբ.)՝ ՀՅԴ որոշման շուրջ, տեղին համարո՞ւմ էք, սպասելի՞ էր:
ԱՂՈՒԱՆ ՎԱՐԴԱՆԵԱՆ.- Ասեմ՝ ակնկալելի էր: Մեր լրատուական դաշտը ճանաչում ենք, գիտենք ե՛ւ լրագրողների, ե՛ւ լրատուամիջոցների կողմնորոշումները, դիրքորոշումները, եւ առաջին անգամ չէ, որ որոշակի ուղղութիւններով յարձակումներ են գործում Դաշնակցութեան վրայ: Գիտէինք, որ լինելու է, բայց, փառք Աստծոյ, Դաշնակցութիւնը երբեք իր որոշումներն ու քայլերը չի պայմանաւորել՝ թէ կողքից ինչ կ՛ասեն: Եթէ համոզուած ես քո դիրքորոշման ճշմարտութեան մէջ, վստահ ես, որ անում ես ճիշդ քայլ, եւ այլ ելք ուղղակի չկայ, կողքից միշտ խօսելու են: «Կատուն կը մլաւի, շունն էլ կը հաչի». Շեքսպիր: Սա անխուսափելի է, նաեւ՝ բնական ու ենթադրելի: Բայց մի բան կ՛ուզէի, որ աւելի բաց ու թափանցիկ լինէր: Քառեակում վերջին քննարկման ժամանակ մեր գործընկերները վստահեցրել են, որ հրաշալի հասկանում են մեր հիմնաւորումները. այստեղ առճակատման կամ բաժանման խնդիր չկայ: Դիրքորոշումները կարեւորագոյն հարցում տարբեր են: Հնարաւոր չէ չորսով անել հանրահաւաք, որտեղ երեք ուժ կը խօսեն մէկի դէմ: Կամ մէկը՝ երեքի դէմ: Եւ մենք բաժանուել ենք, շատ նորմալ շարունակելով մեր աշխատանքը, եւ փոխադարձ վստահութեամբ ու հաւաստիացումով, որ առնուազն քառեակի, պայմանական ասած, ազդեցութեան տակ գտնուող, որոշ դէպքերում ուղղակի անմիջական ազդեցութեան տակ գտնուող քարոզչամիջոցները չեն փորձելու սխալ ներկայացնել, յարձակումներ անել, հայհոյել, պիտակաւորել: Ամէն դէպքում պատկերացնում էինք, որ կը լինեն նման հրապարակումներ: Եւ դա նորմալ է: Դա մեզ համար տասներորդական խնդիր է, մենք վստահ ենք, որ այս հարցում մեր մօտեցումները շատ աւելի ճշգրիտ են, քան միւս ուժերինը, եւ մենք պարտաւոր ենք ձեր միջոցով հանրութեանը, հասարակութեանը, մեր ընկերներին պարզաբանումներ տալ, ապացուցել մեր ճշմարտացիութիւնը: Կողքից ով ինչ կ՛ասի՝ իրենց խնդիրն է:

ՀԱՐՑ.- Ներկայացնեմ, ինչպէս դուք գնահատեցիք, այդ յարձակումներից մէջբերումներ: Առաջինը «Սիվիլնեթ»ից է։
«ՍԻՎԻԼՆԵԹ».- Առաւել վճռական եւ կոնկրետ գործողութիւններ սկսելու մարտավարութիւն որդեգրելու ժամանակ տեղի ունեցաւ շարքերի բիւրեղացում: Արդէն նախկին քառեակի կողմից համահանրապետական հանրահաւաք հրաւիրելու օրը ճգրտելուց յետոյ ՀՅԴն ժամանակաւորապէս լքեց քառեակը՝ խոստանալով, որ միւս հարցերում շարունակելու է համագործակցել: Չնայած ֆորմալ համագործացութեան ձեւաչափը ՀՅԴն փորձում է պահպանել, սակայն ակնյայտ է, որ Սերժ Սարգսեանի վերարտադրութեանը եւ իշխանութեան ամրապնդմանը նպաստող սահմանադրական փոփոխութիւններին աջակցելով՝ նա թիկունքից հարուածում է ՀԱԿի, ԲՀԿի եւ «Ժառանգութեան» քաղաքական շահերին»:
Շատերը ՀՅԴ որոշումը բնութագրեցին որպէս թիկունքից հարուած քառեակին: Ի՞նչ կը պատասխանենք նրանց:
ԱՂՈՒԱՆ ՎԱՐԴԱՆԵԱՆ.- Երկու բան: Նախ՝ «Առաւել վճռական եւ կոնկրետ գործողութիւնների նախաշեմին»… Կ՛ապրենք՝ կը տեսնենք: Ժամանակը ցոյց կը տայ «առաւել վճռական եւ կոնկրետ գործողութիւններ»ի արդիւնքը: «Սիվիլնեթ»ի հանդէպ ես ունեմ յատուկ վերաբերմունք՝ միշտ կարծել եմ, որ աւելի հաւասարակշռուած եւ օբյեկտիւ է ներկայացնում: Յաջորդը՝ «թիկունքից հարուածել նրանց քաղաքական շահերին» : Ես ուզում եմ նաեւ խորամուխ լինել տեքստի բառերի, տերմինների մէջ: ՀԱԿի, ԲՀԿի, «Ժառանգութեան» քաղաքական շահերը մեր շահերը չեն: Եւ մենք պարտաւորութիւն չունենք՝ սպասարկելու որեւէ քաղաքական ուժի շահերը: Նկատո՞ւմ էք՝ ես խօսում եմ միայն մէջբերումների բառերով: Յաջորդը՝ «հաստատապէս վերարտադրութեանը նպաստող» : Ընդհակառակը, խորապէս համոզուած ենք, որ այս համակարգի պահպանման դէպքում առանց էական, արմատական փոփոխութիւններով խորհրդարանական լիարժէք համակարգի անցնելու, այս՝ Սերժ Սարգսեանի իշխանութեան վերարտադրման հնարաւորութիւնները շատ աւելի մեծ են, ինչն ապացուցուել է նախորդ փորձերով: Ես չեմ ուզենայ, որ առաւել վճռական ու կոնկրետ գործողութիւնները եռեակի կողմից հանրահաւաքում վերաճեն սահմանադրական փոփոխութիւններ չանելու պահանջի: Ինչին, չեմ բացառում, իշխանութիւնը մեծ հաճոյքով կը համաձայնի: Կ՛ասի՝ չէք ուզում, չեմ անում, պահպանելով իր վերարտադրուելու հնարաւորութիւնները:

ՀԱՐՑ.- Յաջորդ մէջբերումը «7 օր.am»ից է:
«7 օր.am».- «Դաշնակցականները հիմա էլ հաւատում են, որ սահմանադրական փոփոխութիւնների իրենց փաթեթը կ՛ընդունի իշխանութիւնը, որպէսզի չկարողանայ վերարտադրուել: Թէ քանի մարդ է հաւատում այս ամէնին, թողնենք սոցիոլոգներին: Միայն մէկ բան նշենք՝ եթէ իշխանութիւնը չի կատարում «քառեակ»ի 12 կէտանոց պահանջը, որն անմիջապէս իր աթոռի հարցին չի առնչւում, ապա ինչո՞ւ պէտք է ընդունի սահմանադրական փոփոխութիւնների այնպիսի փաթեթ, որ չկարողանայ վերարտադրուել ու ցմահ իշխել: Մանաւանդ, երբ «էս գլխից» յայտարարում ես, որ ընդամէնը յաւակնում ես մասի, ես կ՛ասէի՝ մասնիկի: Որտեղի՞ց այդպիսի իւրօրինակ հետեւողականութիւն: Պահանջել մէկից մի բան, ով բազմիցս չի կատարել ոչ մի պահանջ կամ աւելի ճիշդ՝ կատարել է միայն այն դէպքում, երբ եղել է կոնսոլիդացուած ուլտիմատում (ամրապնդուած վերջնագիր-Խմբ.)»:
Պարոն Վարդանեան, որտե՞ղ են նման լաւատեսութեան հիմքերը:
ԱՂՈՒԱՆ ՎԱՐԴԱՆԵԱՆ.- «7օր»ն այն կայքերից մէկն է, որ պարբերաբար նման սրացումներ ունենում է եւ ամէն անգամ գալիս-յանգում է իր ենթադրութիւնների վախճանին, որոնք չեն իրականանում: Բայց դա թողնենք նրանց մասնագիտական եւ բարոյական խղճին ու պատասխանատուութեանը: Ո՞վ ասաց, թէ մենք հաւատում ենք, որ իշխանութիւններն ընդունելու են մեր փաթեթը: Մենք նման վստահութիւն չունենք: Բայց մենք առաջարկում ենք առաւել քաղաքական, առաւել տրամաբանական տարբերակ: Մենք ասում ենք՝ այս համակարգը վերարտադրման մեծ շանսեր ունի, պէտք է փոխել համակարգը, նուազեցնել վերարտադրման հնարաւորութիւնները, իսկ մեր փաթեթն ընդունելու պարագայում այդ հնարաւորութիւնները նուազելու են: Եւ մենք ասում ենք մեր գործընկերներին՝ եկէ՛ք այդ փաթեթը միասին պատրաստենք: ՀԱԿը, քանի որ դէմ է խորհրդարանականին՝ ընդհանրապէս, երեք ուժերով առնուազն կարող էինք միասնական համաձայնեցուած փաթեթ ունենալ՝ վստահ լինելով, որ այդ փաթեթը նուազեցնում է վերարտադրման հնարաւորութիւնը, եւ պահանջել, որ իշխանութիւններն ընդունեն այդ փաթեթը: Չէին ընդունի, որեւէ բան մեզ չէր կաշկանդում դէմ գնալ իրենց պատկերացրած՝ վերարտադրելիք սահմանադրութեան անցկացմանը: Նաեւ ասեմ, որ երեքով անելու պարագայում շատ աւելի դժուար կը լինէր չընդունելը, շատ աւելի համախմբուած կը լինէր այս դաշտը, որը խորհրդարանական համակարգ է պատկերացնում: Այսօր էլ ես մինչեւ վերջ վստահ չեմ, որ իշխանութիւնները գնալու են խորհրդարանական համակարգի, նման բան դեռ յայտարարուած չէ, նման բան դեռ գոյութիւն չունի: Եւ երկրորդ՝ ես վստահութեամբ չեմ առաջնորդւում: Ես ասում եմ՝ իմ պատկերացրածը սա է, վստահ եմ, որ սա ճիշդ է երկրի, իշխանութիւն-պետութիւն-կուսակցութիւն նոյնականացում թոյլ չտալու համար, բացառելու համար արհեստական մեծամասնութեան ստեղծումը, եւ սա իմ պահանջն է: Չի կատարի, որեւէ բան չի խանգարում. ո՛չ երկիրն է մէկ օրում ստեղծուել ու աւարտուելու, ո՛չ էլ՝ քաղաքականութիւնը: Չի ընդունի մեր պահանջները՝ օբյեկտիւ, իսկապէս խելամիտ, երկրի զարգացման հնարաւորութիւն տուող մեր առարկութիւնները, կ՛ասենք՝ յաջողութիւն ձեզ: Բայց դա չանելը, ենթադրութիւններով առաջնորդուելը, ինչպէս արել է տուեալ հրապարակման յարգելի հեղինակը, քաղաքական մօտեցում չէ:

ՀԱՐՑ.- Ներկայացնեմ՝ ինչ է գրում «1in.am»ը:
«1in.am».- «ՀՅԴի հեռանալուց յետոյ ոչ իշխանական քաղաքական բեւեռն ըստ էութեան մօտենում է իր նախնական տեսքին: Լիովին այդ տեսքին վերադառնալու համար պէտք է հեռանայ նաեւ «Ժառանգութիւնը»: Ըստ էութեան, ոչ իշխանական այս ճամբարի հիմքում երկու ուժերի՝ ՀԱԿի եւ ԲՀԿի համագործակցութիւնն է: «Ժառանգութիւնն» ու Դաշնակցութիւնն իրականում ընդամէնը քանակ են ապահովել, անունների քանակ, իսկ ռեսուրսների առումով՝ այստեղ ոչինչ չկայ: Եւ սա նաեւ օբյեկտիւ է՝ նկատի ունենալով մի շարք հանգամանքներ»:
Ի՞նչ կ՛ասէք այս առնչութեամբ:
ԱՂՈՒԱՆ ՎԱՐԴԱՆԵԱՆ.- Առաջինը՝ քառեակը եւ ցանկացած ֆորմատ, որտեղ ՀՅԴն մասնակցել եւ համագործակցել է, միշտ եղել է իրաւահաւասարների, հաւասար սուբյեկտների համագործակցութիւն: Աւելին ասեմ՝ մենք քառեակում միշտ ունեցել ենք իսկապէս էական դերակատարութիւն՝ բոլոր առումներով՝ հարցերը դնելու, խնդիրները ձեւակերպելու, այդ խնդիրների շուրջ համախոհութիւն առաջացնելու, փաստաթղթաւորելու: Բայց սա եղել է իրաւահաւասարների աշխատանք: Ցաւօք, վերջին օրերին մի շարք լրատուամիջոցներ փորձում են տանել այլ ուղղութեամբ՝ իբր իրականում կայ մէկ կուսակցութիւն, որը հզօր է, որն ունի հնարաւորութիւններ, միջոցներ, միւսները նրա արբանեակներն են, միւսները նրան սպասարկում են: Դաշնակցութեան պարագայում թող որեւէ մէկը չսխալուի: Եթէ Դաշնակցութիւնը համագործակցութեան է գնում, գնում է իբրեւ հաւասար ուժ, եւ միւսների ունեցած փողը կամ այսօրուայ պայմանական հզօրութիւնը չեն կարող համեմատուել Դաշնակցութեան հարստութեան հետ, Դաշնակցութեան ե՛ւ սկզբունքայնութեան, ե՛ւ գաղափարական ծրագրային հարստութեան, ե՛ւ փորձառութեան հետ: Այնպէս որ՝ թող մոռանան, թէ Դաշնակցութիւնը որեւէ ընտանիքում կը լինի խորթ զաւակի կարգավիճակում: Երկրորդը՝ փորձել այսօր քառեակի տարբեր ուժերին հակադրելը… Գիտէք, երկու ուղղութիւն կայ մեր լրատուամիջոցներում, մի մասն ակնյայտօրէն սպասարկում է իշխանութեան որոշակի թեւի, մի մասը՝ ընդդիմութեան մի շերտի շահերը: Երկու ճամբարներից էլ հնչում են միանման ձայներ: Սա եւս մէկ անգամ ապացուցում է, որ մեր որդեգրած մօտեցումը սկզբունքային է եւ ճիշդ: Սա էլ կ՛անցնի, եւ այն բոլոր ենթադրութիւնները, կասկածները, հերիւրանքները, որ այսօր հրապարակւում են, կը ջրուեն: Այդ մարդիկ, ի հարկէ, չեն ամաչի իրենց արածի համար, բայց վստահ եմ, որ մենք իրաւունք կ՛ունենանք ասելու՝ ամէն մէկն իր գործին:

ՀԱՐՑ.- Պարոն Վարդանեան, «7օր.am»ը նաեւ ձեր՝ Դաշնակցութեան սկզբունքայնութեան մասով մի հարց է ուղղում, որի պատասխանը, կարծում եմ, դուք այսօր կը տաք:
«7օր.am».- «ՀՅԴ ներկայացուցիչները հրաժարուել են մասնակցել համատեղ հանրահաւաքին՝ յայտարարելով, որ տարաձայնութիւններ ունեն միւս քաղաքական ուժերի հետ սահմանադրական փոփոխութիւնների հարցում, եւ որ խորհրդարանական կառավարման համակարգն իրենց համար գերսկզբունքային հարց է: Չենք կասկածում ՀՅԴ վերնախաւի գերսկզբունքայնութեանը: Պարզապէս հետաքրքիր կը լինէր իմանալ, որ եթէ խորհրդարանական կառավարման համակարգն իրենց համար գերսկզբունքային հարց է այն աստիճանի, որ համատեղ հանրահաւաքից առաջ գոնէ Ազատութեան հրապարակի տիրոյթում լքում են «քառեակը», ապա այդ դէպքում ինչո՞ւ չլքեցին իշխող կոալիցիան 2005թ. սահմանադրական փոփոխութիւնների ժամանակ, այլ աջակցեցին կիսանախագահական համակարգը պահպանող սահմանադրական փոփոխութիւններին: Չէ՞ որ դա գերսկզբունքային հարց էր: Դէ, իսկ ՀՅԴ վերնախաւի գերսկզբունքայնութեան մասին, ինչպէս յայտնի է, լեգենդներ են պտտւում»:
Կը պատասխանէ՞ք հարցադրմանը:
ԱՂՈՒԱՆ ՎԱՐԴԱՆԵԱՆ.- Նախ՝ գերսկզբունքայնութեան մասին: Ինքնին խորհրդարանական համակարգը չի նշանակում, որ դա ամենաճիշդ համակարգն է: Մենք ասում ենք խորհրդարանական համակարգ, բայց ասում ենք նաեւ բովանդակութիւնը, այն պարամետրերը, որոնց դէպքում մեր պետութեան ու ժողովրդի մտակերտուածքի, հոգեկերտուածքի, փորձառութեամբ իսկապէս կ՛աշխատի եւ կը բացառի միակուսակցական համակարգն ու իշխանութեան պարբերական վերարտադրութիւնը: Սա մէկ խնդիր է. միայն խորհրդարանական համակարգ չէ, կայ յստակ բովանդակութիւն: Այո, մենք սրան հաւատացած ենք: Գալով 2005 թուականի սահմանադրական բարեփոխումներին: Ցաւօք, այս կարգի ընտրողաբար մօտեցումներով հեղինակները մոռանում են յաճախ միւս հարցերը: Օրինակ՝ այս նոյն կայքը պարբերաբար գրում է, որ հեռացող նախագահը չի կարող իր շուրջը համախմբել, եւ նրա միակ նպատակը վերարտադրուելն է: 2005 թուականին, երբ սահմանադրական բարեփոխումներ էին նախատեսւում, բազմաթիւ ուժեր, լրատուամիջոցներ, քաղաքական գործիչներ ասում էին, որ այս փոփոխութիւններն արւում էին մէկ նպատակով՝ իշխանութեան մէջ մնալու, վերարտադրուելու, ասում էին երկրորդ նախագահը սա անում է, որպէսզի ուժեղացնի վարչապետի լիազօրութիւնները, նուազեցնի նախագահինը, եւ ինքը, քանի որ հեռացող նախագահ է, դառնայ վարչապետ: Պարզուեց՝ այդպէս չէ, պարզուեց՝ իրականութիւնն այլ է: Ասում էին այդ նոյն մարդիկ՝ հեռացող նախագահ է, նա չի կարող համախմբել իր շուրջը իշխանութեան տարբեր թեւերին, ուժերին, եւ նա տանուլ է տալու նախագահական ընտրութիւնները: Ինչո՞ւ են մոռանում, որ նոյն երկրորդ նախագահը, երբ որ հեռացող նախագահ էր, ընդամէնը 2006 թուականին՝ 2007 թուականի խորհրդարանական ընտրութիւններից առաջ, ոչ մի տեղից ստեղծեց քաղաքական ուժ, որը մէկ տարի յետոյ հսկայական ձայն տարաւ ընտրութիւններում եւ այսօր ազդեցիկ քաղաքական ուժերից է: Նոյն վերարտադրութեան մասին խօսելիս ես որքան չեմ հաւատում այսօրուայ իշխանութեանը, որեւէ հիմք չունեմ հաւատալու միւսին կամ մէկ ուրիշին: Պէտք է գործով սա լինի: Ինձ համար բացարձակապէս տարբերութիւն չկայ այս համակարգում՝ վերարտադրուող համակարգում, այս անձը կը լինի իշխանութեան գլուխ, թէ՝ միւս անձը: Եթէ համակարգը մնալու է, մեխանիզմները չեն գործելու: Ինչո՞ւ մենք կողմ եղանք այն ժամանակ՝ 2005ին, եւ չլքեցինք կոալիցիան: Որովհետեւ դարձեալ սխալ է ասում՝ «պահպանել կիսանախագահական համակարգը»… ոչ: 95 թուականի Սահմանադրութեամբ մենք ունէինք գերնախագահական համակարգ, եւ 2005 թուականի Սահմանադրութիւնն էական քայլ էր դէպի միջանկեալ տարբերակ: Կարելի է ասել՝ կէս ճանապարհն էր: Եւ, բնականաբար, եթէ մի բան աւելի դրական է, քան նախկինը, ապուշ պիտի լինես, որ չպաշտպանես: Ասեմ աւելին՝ մենք այսօր դէմ ենք, որ մեծամասնական համակարգը պահպանուի: Որովհետեւ դա մեծ առաւելութիւն է այն ուժերի ձեռքին, որոնք ունեն վարչական լծակներ, իշխանական լծակներ եւ ունեն շատ փող: Կամ՝ անհատներ ունեն, որ այս կամ այն ուժի թիկունքում են: Տեսէք՝ մենք սկզբում ունեցել ենք 75 մեծամասնական տեղ: Ընտրութիւնից առաջ փոխուել, դարձել է 56, յաջորդ ընտրութիւնից առաջ փոխուել, դարձել է 41: Արդէն երկար ժամանակ այդ թիւը փոփոխութեան չի ենթարկուել: Եթէ վաղը մեզ ասում են՝ լաւ, դուք պահանջում էք 41 մեծամասնականն էլ հանել, բայց եկէ՛ք մի միջանկեալ քայլ անենք, եկէ՛ք՝ դարձնենք 20 մեծամասնական: Ի՞նչ էք կարծում, չքննարկե՞նք առնուազն: Աւելի դրական չէ՞, քան 41ը, մեծ չէ՞ հնարաւորութիւնը, որ 20ի պարագայում աւելի քաղաքական դէմքեր կ՛ընտրուեն: Քննարկելու խնդի՞ր է, թէ չէ:

ՀԱՐՑ.- Կարելի է ասել՝ եւս 20 մանդատ կը փրկուի:
ԱՂՈՒԱՆ ՎԱՐԴԱՆԵԱՆ.- Այո՛: Այնպէս որ՝ որեւէ բան ասելուց առաջ, գնահատական տալուց առաջ Դաշնակցութեան սկզբունքայնութեանը, ես կ՛ուզէի իրենք նայէին իրենց անցած ճանապարհին, իրենց սկզբունքայնութեանը: Կամ գոնէ յիշէին Դաշնակցութեան կողքով անցնելու իրենց փորձերը:

ՀԱՐՑ.- Ներկայացնեմ «Չորրորդ Իշխանութիւնից» մի մէջբերում:
«Չորրորդ Իշխանութիւն».- «Իշխանութիւններն այլ լեզու պարզապէս չեն հասկանում, եւ եթէ ինչ որ դրական բան անում են, ապա միայն հասարակական ճնշման տակ: Ընդ որում՝ ինչքան մեծ է լինում ճնշումը, այնքան մեծ են լինում իշխանութիւնների զիջումները: Ապացոյց՝ Տիգրան Սարգսեանի հրաժարականը, պարտադիր կուտակայինի հարցում զիջումները եւ այլն: Եթէ հարցին հայում ենք այս տեսանկիւնից, ակնյայտ է դառնում, որ ինչքան հզօր լինի առաջիկայ հանրահաւաքը, այնքան մեծ է հաւանականութիւնը, որ իշխանութիւնները լուրջ զիջումներ կ՛անեն սահմանադրական բարեփոխումների հարցում եւ դա չեն դարձնի Սերժ Սարգսեանի իշխանութեան վերարտադրման գործիք: Եւ ահա այս իրավիճակում ՀՅԴն հրաժարւում է մասնակցել այդ հանրահաւաքին, այսինքն՝ հրաժարւում է իր կարողութիւնների շրջանակներում հզօրացնել հանրահաւաքը: Պարզ ասած՝ հրաժարւում է անել մի բան, որի արդիւնքում իշխանութիւնների՝ զիջումների գնալու հաւանականութիւնը կը մեծանայ»:
Չկա՞յ մտավախութիւն, որ այս պահին եթէ իշխանութիւնը որեւէ զիջում չանի, ողջ պատասխանատուութիւնն ընկնելու է կամ գցելու են Դաշնակցութեան ուսերին:
ԱՂՈՒԱՆ ՎԱՐԴԱՆԵԱՆ.- Դառնանք այս յօդուածի տրամաբանութեանը: Այո՛, բնականաբար, իշխանութիւնը ուժի լեզուն է հասկանում: Բայց ո՞րն է նպատակը: Այս հրապարակման մէջ դրուած խնդիրը, թէ այդ մեծ ճնշումն ինչին պիտի ծառայի: Ասում է՝ եթէ Դաշնակցութիւնն էլ մասնակցեր, ճնշումն աւելի մեծ կը լինէր, իշխանութիւնը կը գնար զիջումների եւ սահմանադրական փոփոխութիւններ չէր անի: Սա արդէն չգիտեմ՝ ինչպէս ձեւակերպել: Այսինքն՝ մենք գնայինք հանրահաւաք անէինք, սահմանադրական բարեփոխումներ չարուէին՝ մեր պատկերացումներով: Մենք ասում ենք՝ փոխենք Սահմանադրութիւնը՝ մեր պատկերացումներով, ինչը իշխանութեան վերարտադրութեան հնարաւորութիւնը կտրուկ կասեցնելու է, իրավիճակ է փոխելու երկրում, երկրին շնչելու տեղ է տալու: Սա ասում է՝ դուք եկէք, ճնշումը մեծացնենք միասին, որպէսզի փոփոխութիւնները չարուեն: Սա արդէն զառանցանքի ժանրից է, բայց մոլուցքը, կիրքը, գրելը եւ տրամաբանութեանը չհետեւելը սովորական են մեր որոշ լրատուամիջոցների համար, մեզ ասում են՝ եկէք, պայքարենք սահմանադրական փոփոխութիւնների դէմ:

ՀԱՐՑ.- Վերջին մէջբերումը «Lragir.am»ից է:
«Lragir.am».- «Այս իրավիճակում ամենահետաքրքիրն այն է, որ կարող է պարզուել՝ ՀՅԴն կայացրել է իր վերջին 20 տարուայ պատմութեան ընթացքում «ամենասկզբունքային» որոշումներից մէկը: Իսկ ընդհանրապէս, ափսոս, որ ազգային յեղափոխական կուսակցութիւնը, որը հայ ազգի նուիրեալների ու իսկական ընտրախաւի դարբնոց է եղել, իր ղեկավարների քաղաքականութեան արդիւնքում յայտնուել է նման «ռազբորկաներ»ի («հետախուզութիւնների»-Խմբ.) մէջ: Սա չէ Դաշնակցութեան իրական տեղն ու դերը, մանր առեւտուրները, ինչպէս կ՛ասէր Գագիկ Ծառուկեանը, այլ այն, երբ նրանից վախենում էին ազգի թշնամիները՝ ներքին ու արտաքին»:
ԱՂՈՒԱՆ ՎԱՐԴԱՆԵԱՆ.- Առաջին մասի հետ համաձայն եմ, սա կարող է վերջին 20 տարուայ մէջ մեր ամենակարեւոր որոշումը լինել: Իսկապէս ժամանակը կ՛ապացուցի, ցոյց կը տայ մեր ճշմարտացիութիւնը: Միւս բոլորը ենթադրութիւններ, ասեկոսներ են: Եւ թող հանգիստ լինեն: Դաշնակցութիւնն իր փորձառութեամբ, այսօրուայ ղեկավարութեամբ որեւէ բաժանման խնդիր չունի: Մենք անում ենք մի բան, որում խորապէս համոզուած ենք: Կը փորձենք: Կը տեսնենք՝ չի ընդառաջում, մենք չենք կարողանում մեր ուզածին հասնել, որեւէ բան չի փոխուի, մենք կը շարունակենք մնալ ընդդիմադիր դաշտում, մենք կը շարունակենք պայքարել այն սկզբունքների եւ այն մօտեցումների համար, որոնցում խորապէս համոզուած ենք: Խորհուրդ կը տայի մանր ինտրիգներ (խարդաւանքներ-Խմբ.) չփնտռել… եւ, ի դէպ, հետաքրքիր է, որ այս առումով մէջբերում են պարոն Ծառուկեանի խօսքերը՝ խորհուրդ կը տայի աւելի զուսպ լինել: