ՍՏԵՓԱՆԱԿԵՐՏ, «Ղարաբաղ Լայֆ».- Քաշաթաղի վերաբնակեցումը մնայուն քննարկումներու նիւթ է, անոր առնչուող տեսակէտները տարբեր են: Ոմանց համար անիկա ձախողած ծրագիր է, որուն շատեր կը հակադարձեն ձեռքբերումներուն մասին խօսուն թիւերով ու փաստերով:

Արցախի փոխվարչապետ Ա. Աղաբեկեան չի ժխտեր, որ սուրիահայերը Արցախ տեղափոխելու ծրագիրը գրեթէ տապալեցաւ. «Մշտական բնակութեան եկան սիրիահայ ընտանիքներ, բայց նրանց թիւը սպասուածից շատ աւելի քիչ է»: Փոխվարչապետը անձամբ հանդիպում ունեցած է սուրիահայ ընտանիքներուն հետ եւ փորձած է համոզել զանոնք. Արցախի հողը բերրի է, թեթեւ արդիւնաբերութիւնն ալ գերակայ ճիւղ հռչակուած է:

«Հայաստան տեղափոխուած սիրիահայերի զգալի մասը հրաժարուել է ապրել Արցախում: Ցաւօք, մենք չկարողացանք համոզել, որ ինչ ունեցել են Հալէպում, Դամասկոսում կամ Սիրիայի այլ բնակավայրում, նոյնը կարող են ունենալ Ստեփանակերտում, եւ ընդհանրապէս, Արցախում: Պարտադրման սկզբունք չէր կիրառւում, միայն համոզումի սկզբունքն էր կիրառւում: Կա՛մ վատ համոզեցինք, կա՛մ չյաջողուեց համոզել», նշած է փոխվարչապետը:

Միւս կողմէ, Քաշաթաղի մէջ բնակութիւն հաստատել ուզողներուն օրէ օր աճող թիւը կը վկայէ, որ շրջանը զարգացման կայուն ուղիի վրայ է:

Շրջանի վարչակազմի ղեկավարի տեղակալ Արտիւշա Մխիթարեան ընդգծած է, որ վերաբնակեցման սկիզբի տարիներուն աւելի մեծ հակում կար համակերպուելու առաջարկուող պայմաններուն, իսկ հիմա պատկերը այլ է՝ աւելի մեծ պահանջներով կու գան, նշած է ան՝ ցոյց տալով Քաշաթաղի մէջ մնայուն բնակութիւն հաստատել ուզողներուն հերթագրութեան ծաւալուն ցանկը։ «Բնակեցումը կարող է շատ աւելի ինտենսիւ լինել, եթէ մենք ունենանք բնակպայմաններ: Քիչ թէ շատ բնակութեան համար պիտանի, նորմալ բնակարաններ, որտեղ մարդը կարող է ապրել, արդէն բնակեցրել ենք»:

Ա. Մխիթարեան յայտնած է, որ՝ նկատի ունենալով հերթագրուածներու ցուցակը, կառավարութիւնը առանձին ուշադրութիւն կը դարձնէ շրջանի բնակարանաշինութեան հարցին:

Աւելցնենք, որ 2014ին Քաշաթաղի մէջ մնայուն բնակութիւն հաստատած է 41 ընտանիք:

Ներկայ դրութեամբ Քաշաթաղը ունի մօտ 11,000 բնակիչ: