ԵՐԵՒԱՆ, <<Արմէնփրէս>> - 13 Փետրուարին տեղի ունեցած է Հայաստանի Հանրապետութեան Ազգային անվտանգութեան խորհուրդի նիստ, զոր վարած է Հայաստանի նախագահ, Ազգային անվտանգութեան խորհուրդի նախագահ Սերժ Սարգսեանը:
Հայաստանի նախագահի աշխատակազմի հասարակութեան եւ տեղեկատուութեան միջոցներու հետ կապերու վարչութենէն յայտնած են, որ նիստի մասնակիցներուն ուղղուած իր բացման խօսքին մէջ նախագահ Սարգսեան նշած է, որ ազգային անվտանգութիւնը չափազանց կարեւոր է՝ դիտել տալով, որ Հայաստանի ներքին անդորրութիւնն ու համերաշխութեան ապահովումը ամէն բանէ վեր են։ Այս ծիրին մէջ ան շեշտած է, որ խիստ վերաբերմունք պէտք է ցուցաբերուի ազգային անվտանգութեան հակադրուող երեւոյթներուն նկատմամբ։
Նախագահը իր խօսքին մէջ ըսած է. <<Շուրջ քառորդ դար մեր պետութիւնն անցել է ժողովրդավարական ինստիտուտների կայացման բարդ ճանապարհ: Մեր պետականութեան կառուցումը խարսխուած է եղել իրաւունքի գերակայութեան, խօսքի ազատութեան, քաղաքական բազմակարծութեան եւ այլ հիմնարար սկզբունքների վրայ, որոնք երբեք կասկածի տակ չեն առնուել: Ցաւօք սրտի, ի հարկէ, եղել են ժամանակահատուածներ, երբ այս սկզբունքներն աւելի շատ կրում էին դեկլարատիւ բնոյթ եւ իրականութեանը չէին համապատասխանում: Միաժամանակ մշտապէս գիտակցել ենք, որ կան արժէքներ, որոնք վեր են անձնական, խմբակային, կուսակցական եւ այլ շահերից: Դրանց շարքում կարեւորագոյններից մէկը մեր երկրի ներքին անդորրի եւ համերաշխութեան ապահովումն է, որը ներկայիս տարածաշրջանային եւ աշխարհաքաղաքական զարգացումների լոյսի ներքոյ էլ աւելի արժէքաւոր է դառնում:
Այս արժէքի պահպանումն ինքնին ենթադրում է նաեւ քաղաքական պայքարի առկայութիւն եւ տարաբնոյթ շահերի արտայայտման ու պաշտպանութեան համար ժողովրդավարական հասարակութիւնում ճանաչուած այլ միջոցների կիրառում:
Սակայն վերջին ժամանակներս աւելի են ընդգծւում առանձին անձանց օրակարգում տեղ գտած հարցերը քաղաքական գործընթացների շրջանակներից դուրս բերելու եւ դրանց այլ լուծումներ տալու մտադրութիւններն ու փորձերը: Մինչ օրս համապատասխան գործողութիւններին տրուած գնահատականները եւ դրանց առթիւ կատարուած վերլուծութիւններն առաւելապէս ունեցել են քաղաքական ուղղուածութիւն:
Կարծում եմ, որ այսօր ժամանակն է նման գործողութիւնները եւ դրանց հետ առնչուող երեւոյթները քննարկել նաեւ ազգային անվտանգութեան տեսանկիւնից: Մեր խնդիրն է գնահատել, թէ որքանո՛վ են առկայ սպառնալիքները վտանգում անձի, հասարակութեան եւ պետութեան կենսականօրէն կարեւոր շահերը, ձեւաւորել ընդհանուր մօտեցում, թէ ինչպիսին պէտք է լինեն այդ սպառնալիքների չէզոքացման միջոցները:
Ասուածը բնաւ չի նշանակում, որ հասարակութեան բնականոն գործունէութեան համար կարեւոր մի շարք հարցերի կապակցութեամբ պետութիւնը չի ունեցել որոշակի վերաբերմունք կամ նոր դիրքորոշումներ է ձեւաւորում:
Մասնաւորապէս, պետութիւնը երբեք չի խրախուսել բռնութիւնների միտուած երկիմաստ քարոզչութիւնը, լաւ թէ վատ, թէեւ դա այս պահի խնդիր չէ. փորձել է վերահսկել ֆինանսական միջոցների գոյացման օրինականութիւնը, ինչ որ չափով արձագանգել է կասկածելի ֆինանսական ռեսուրսները քաղաքական նպատակներով օգտագործելու երեւոյթին, պարբերաբար հակազդել է մասնաւոր շահերի պաշտպանութեան համար տեխնիկական եւ կազմակերպական հնարաւորութիւնների անհամաչափ գործածմանը:
Ի հարկէ, այս ամէնը պետական իրաւասու մարմինների ամէնօրեայ գործունէութեան բաղկացուցիչ մասն է: Սակայն երբ նման բացասական երեւոյթները միաւորւում եւ ծառայեցւում են երկրի ազգային անվտանգութեանը հակադրուող շահերի սպասարկմանը, դրա նկատմամբ վերաբերմունքը պէտք է լինի սկզբունքօրէն այլ: Թէ ինչպիսին՝ կը քննարկենք այսօր>>:
ԱԱԽ նիստին տեղի ունեցած քննարկումներուն լոյսին տակ ձեւաւորուած է ընդհանուր մօտեցում՝ երկրի ազգային անվտանգութեան սպառնացող երեւոյթները գնահատելու եւ անոնց վտանգաւորութեան աստիճանին համարժէք միջոցներու ձեռնարկելու առնչութեամբ: ԱԱԽի անդամները համակարծիք եղած են այն գծով, որ Հայաստանի Հանրապետութեան ազգային անվտանգութեան դէմ եղած որեւէ սպառնալիքի չէզոքացման միջոցները պէտք է համապատասխանեն օրինականութեան եւ արդարութեան չափանիշներուն:
