ԵՐԵՒԱՆ, <<Երկիր>>.– <<Երկիր Մեդիա>>ի <<Երկրի Հարցը>> յայտագիրին ընթացքին Հայ Յեղափոխական Դաշնակցութեան Գերագոյն մարմինի ներկայացուցիչ Աղուան Վարդանեանը խօսած է ՀՅԴի կատարելիքներուն մասին:

Ան նախ յիշեցուցած է, որ Յունուարի երկրորդ կէսին կայացաւ Դաշնակցութեան Ընդհանուր ժողովը, որմէ ետք որոշ վերադասաւորումներ եղան կուսակցութեան մարմիններուն մէջ, ապա աւելցուցած է, որ Գերագոյն մարմինը այսօր իր հիմնական գործունէութեան ուղղութիւնները ունի:

<<Մենք որոշել ենք հանդիպել մեր բոլոր կազմակերպական միաւորների հետ, անցկացնում ենք մեծ հաւաքներ: Մէկ ամսուայ ընթացքում պէտք է այդ հաւաքները տեղի ունենան ողջ հանրապետութիւնում: Մենք ունենք 50 կազմակերպական միաւոր՝ կոմիտէութիւններ: Մօտ 20-22 նման հանդիպումներ արդէն արել ենք: Երեւանի մեր 10 կոմիտէութիւններից 7ում ընկերային հաւաքներ ենք արել, 10 մարզերից՝ 4ում:

Հինգ ուղղութիւն կայ:

Առաջինը՝ մեր ընկերներին ներկայացնել Ընդհանուր ժողովի մթնոլորտը, տրամադրութիւնները, արդիւնքները, քանի որ 4 տարին մէկ անգամ է Ընդհանուր ժողով լինում: Մենք քննարկում էինք կուսակցութեան եւ Բիւրոյի 4 տարուայ գործունէութիւնը: Շուրջ 250 հարց է բարձրացուել, հարցերից յետոյ 50 ելոյթ է եղել, որոնցում խօսուել է ամէն ինչ մասին: Ամէն ինչ անցել է բուռն, բայց համախոհութեան մթնոլորտում:

Երկրորդ՝ խօսում ենք մեր այսօրուայ խնդիրների, կազմակերպական դժուարութիւնների, աւելի բաց, հրապարակային գործելու անհրաժեշտութեան մասին:

Երրորդ՝ աւելի մանրամասն ներկայացնում ենք հայաստանեան ներքաղաքական վիճակը, մեր քայլերը, դրանց հիմանուորումները:

Եւ խօսում ենք ապագայ ծրագրերի մասին:

Մենք նաեւ փորձում ենք աւելի բացուել՝ մեզանից դուրս, հասարակութեան տարբեր շերտերի հետ ենք հանդիպում: Օրինակ՝ մտաւորականների, դասախօսների:

Հանդիպում ենք նաեւ դեսպանների հետ, որպէսզի նրանք եւս հասկանան մեր տեսակէտները>>, նշած է Աղուան Վարդանեան:

Ան նաեւ կարեւոր նկատած է, որ շարքային դաշնակցականները վստահ ըլլան, որ ՀՅԴի ընթացքը հետեւողական է՝ ուղղուած երկրին մէջ որակական, արմատական փոփոխութիւններ կատարելուն, հասարակութեան հարցերուն քայլ առ քայլ լուծումներ գտնելուն:

<<Եթէ իրենք համոզուած չլինեն, որ մենք ճիշդ ուղու վրայ ենք, չեն կարող համոզել իրենց շրջապատին: Քաղաքական ուժերը իրենց միջեւ են յարաբերութիւններ պարզում՝ մոռանալով, որ մարդու համար է քաղաքականութիւնը: Այսօր քաղաքականութեանը նոր շունչ տալու հնարաւորութիւն կայ, եւ պէտք է գիշեր-ցերեկ աշխատել>>, նշած է Աղուան Վարդանեան: