ԵՐԵՒԱՆ, <<Նիուզ>> - 28 Փետրուարին ատրպէյճանական կողմին կատարած հետախուզական–ներթափանցման փորձին ընթացքին զոհուած զինուոր, փոխգնդապետ Արտակ Աղէկեան զոհուած է՝ փորձելով փրկել 20ամեայ Հայկ Բարոյեանի կեանքը, սակայն չէ յաջողած, փոխարէնը Արտակ փրկած է երեք հոգիի կեանք: <<Նիուզ>>ի հետ ունեցած զրոյցին ընթացքին այս մասին յայտնած է Արտակ Աղէկեանի քրոջ ամուսինը՝ Ահարոն Խաչատրեանը:

<<Դիվերսիայի ժամանակ դիմադրութիւնն այնպէս է կազմակերպել, որ քիչ զոհեր են եղել: Ինքը զոհուել է, քանի որ փորձել է միւս զինծառայողին փրկել, բայց երեք հոգու յաջողուել է փրկել: Ամբողջ քաղաքը սգում է, միւս զինուորը՝ Հայկը, որը նոյնպէս մահացել է, իր վարորդն էր, նոյնպէս Տաշիր քաղաքից: Մեզ մօտ հիմա համաքաղաքային վիշտ է>>, նշած է Ահարոն Խաչատրեան:

Անոր համաձայն՝ 36ամեայ Արտակ Աղէկեանի եւ 20ամեայ Հայկ Բարոյեանի հոգեհանգիստը պիտի կատարուի 3 Մարտին՝ ժամը 17:00ին, Լոռիի մարզի Տաշիր քաղաքի Սուրբ Սարգիս եկեղեցւոյ, իսկ զինուորական կարգով յուղարկաւորութիւնը՝ 4 Մարտին՝ ժամը 13:00ին, Տաշիրի քաղաքային գերեզմանատան մէջ:

Նշենք, որ Արտակ Սեդրակի Աղէկեան Տաշիր քաղաքէն էր, ամուսնացած էր, ունի երկու երեխայ՝ աղջիկ եւ տղայ: <<Նիուզ>>ի համաձայն՝ ան զինուած ուժերու շարքերուն մէջ կը ծառայէ 1996 թուականէն ի վեր: Միւս զոհուած զինուորը՝ անոր համաքաղաքացի, ժամկէտային Հայկ Բարոյեանը, որ զօրակոչուած էր 2013ի աշնան, տան աւագ որդին էր, ունի 3 տարեկան եղբայր:

Արցախի նախագահ Բակօ Սահակեանի հրամանով, Լեռնային Ղարաբաղի պետական սահմանը պաշտպանելու ատեն ցուցաբերած արիութեան համար Լեռնային Ղարաբաղի պաշտպանութեան բանակի զինուորներ Արտակ Աղէկեան եւ Հայկ Բարոյեան յետ մահու պարգեւատրուած են <<Մարտական ծառայութիւն>> մետալով: