ԵՐԵՒԱՆ - Ազատութեան Հրապարակին վրայ նստացոյցով սկսած ու Բաղրամեանի վրայ ժողովրդային ցոյցով շարունակուող <<Ոչ թալանին>> նախաձեռնած բողոքի շարժումը օրէ օր թափ կը ստանայ:

Չորեքշաբթի երեկոյեան, Բաղրամեան պողոտային վրայ ցուցարարներու թիւը ակնյայտօրէն աճած էր: Ոստիկանութեան պատասխանատուներէն Վալերի Օսիպեան ցոյցը ղեկավարողներուն փոխանցեց, որ հակառակ անոր, որ իր տեսանկիւնէն ժողովուրդի հաւաքը այդ վայրին մէջ անօրինական է, ոստիկանները պիտի չփորձեն միջամտել:

<<Ոչ թալանին>> նախաձեռնողները յայտարարեցին, որ ցոյցին միացած են Չարենցաւանէն ինքնաշարժներու երթով Երեւան հասած մարդիկ:

Ցոյցին միացած են նաեւ փոխադրակառքերով Երեւան հասած հրազդանցիներ: Յայտարարուեցաւ նաեւ, որ զօրակցական ցոյցեր եւ նստացոյցեր տեղի կ՛ունենան նաեւ Գիւմրիի, Սպիտակի, Վանաձորի, Աշտարակի եւ Սիսիանի մէջ:

Նշենք, որ ցուցարարները նախորդ գիշեր մերժած էին նախագահ Սերժ Սարգսեանի հետ հանդիպելու առաջարկը: Նախագահ Սարգսեան այժմ աշխատանքային այցով կը գտնուի Պրիւքսէլ:
Նստացոյցի նախաձեռնողներուն կարծիքով, իշխանութիւնները մէկ ճանապարհ ունին՝ չեղեալ յայտարարել ելեկտրականութեան սակերու թանկացման որոշումը:

Նախորդ գիշեր ցոյցին միացած եւ ոստիկանութեան ու ցուցարարներու միջեւ մարդկային պատնէշի դեր ստանձնած են Ազգային ժողովի պատգամաւորներ, ինչպէս նաեւ արուեստագէտներ:
<<Ո՛չ թալանին>> նախաձեռնութեան անդամ Վաղինակ Շուշանեան <<Ազատութեան>> թղթակիցին յայտնած է, որ ցոյցը <<Մայտան>>ի պիտի չվերածեն:

Ցուցարարները ցրուած են դեղին թուղթի վրայ գրուած թռուցիկներ, ուր կոչ ուղղած են Հայաստանի բոլոր բնակիչներուն ամէն օր ժամը 21.00էն մինչեւ 22.00 անջատել իրենց բնակարաններուն բոլոր լոյսերը, եկտրականութեամբ աշխատող բոլոր համակարգերը:

Թռուցիկը, որ վերնագրուած է <<միացիր պայքարին տնից>>, կը յորդորէ ժողովուրդին տնային կենցաղային իրերով պատշգամներէն մեծ աղմուկ ստեղծել՝ <<շերեփով, զուռնա-դհոլով, սուլիչով, կաթսաներով>>:

<<Դա նշան կը լինի, որ բոլորը միանում են այս պայքարին>>, գրուած է թռուցիկին վրայ: