Համալսարաններու ապաքաղաքականացման հարցը կարելի է լուծել միայն բարձրագոյն կրթութեան օրէնքի միջոցով: Այսօր լրագրողներու  հետ հանդիպումի մը ընթացքին ըսաւ Հայաստանի կրթութեան եւ գիտութեան նախարար Լեւոն Մկրտչեանը` պատասխանելով այն հարցումին, թէ ինչպէ՞ս պիտի լուծէ իր կողմէ բարձրացուած խնդիրը` ապաքաղաքականացնել համալսարանները, եթէ անոնց ուսումնական խորհուրդներու նախագահներ են այնպիսի բարձրաստիճան պաշտօնեաներ, օրինակ` Հայաստանի Հանրապետութեան նախագահը, վարչապետը եւ ուրիշներ:

<<Ընդհանրապէս, եթէ երկրին մէջ գոյութիւն ունի ազգային համալսարան, խորհուրդի նախագահներ կ՛ըլլան երկրին առաջին դէմքերը, որպէսզի շեշտուի տուեալ հաստատութեան համապետական նշանակութիւնը: Մենք ունինք Երեւանի պետական համալսարան, որ մեր ազգային արժէքն է եւ այդ պատճառով է, որ խորհուրդի նախագահը Սերժ Սարգսեանն է>>, ըսաւ ան:

Լեւոն Մկրտչեան նշեց, որ, օրինակ` Իտալիոյ մէջ կայ յատուկ սահմանադրական յօդուած` համալսարաններու ինքնավարութեան մասին: Նման կանոնակարգման խնդիր ունի նաեւ Հայաստանը:

<<Պէտք է արմատապէս բարեփոխել կրթութեան ինքնավարութեան համակարգը, իսկ ատիկա կարելի է ընել միայն օրէնքի միջոցով: Մենք պէտք է ունենանք համապատասխան օրէնք, այստեղ է միայն հարցին  լուծումը>>, ըսաւ ան:

Պատասխանելով այն հարցումին, թէ համալսարաններու ուսումնական խորհուրդներու  ներկայացուցիչները Հայաստանի Հանրապետական կուսակցութեան  երիտասարդական թեւի ներկայացուցիչներ են, արդեօք հաւանակա՞ն է, որ անոնք յառաջիկային փոխարինուին երիտասարդ դաշնակցականներով, նախարարը ըսաւ, թէ այս <<հարցը եւս կապուած է համալսարանական ինքնավարութեան հետ>>:

<<Եթէ ուսանողները կ՛արտօնեն, որ ստեղծուի խորհուրդ մը, որ իրենց կրթական առօրեային հետ կապ չունի, ուրեմն իրենք չեն պատկերացներ, թէ ո՛ւր են եւ ի՛նչ բանի համար: Համալսարանը ինք պէտք է ըսէ` ինչպէ՛ս ձեւաւորել ուսումնական խորհուրդ, որ բացառապէս հետաքրքրուի համալսարանի խնդիրներով եւ, վստահաբար, ազգի հիմնախնդիրներով>>: