Հայաստանի վարչապետ Յովիկ Աբրահամեանի գլխաւորութեամբ 15 յունիսին տեղի ունեցած է խորհրդակցութիւն, որուն ընթացքին քննարկուած է Հայաստանի 2016-2025 թուականներու տարածքային զարգացման ռազմավարութեան նախագիծը:

Խորհրդակցութեան մասնակցած են Հայաստանի մէջ Եւրոպական Միութեան պատուիրակութեան ղեկավար, դեսպան Փէոթր Սուիտալսքին, Եւրոպական Միութեան շարք մը ներկայացուցիչներ, փորձագէտներ եւ շահագրգիռ գերատեսչութիւններու ղեկավարներ:

Հայաստանի տարածքային կառավարման եւ զարգացման նախարար Դաւիթ Լոքեան մանրամասն կերպով ներկայացուցած է 2016-2025 թուականներու տարածքային զարգացման ռազմավարութեան նախագիծը, փաստաթուղթի հիմնական նպատակները, սկզբունքները եւ ակնկալուող արդիւնքները: Դաւիթ Լոքեանի համաձայն, ռազմավարութեան հիմնական նպատակն է բոլոր մարզերու մրցունակութեան բարձրացումը` հիմք ընդունելով վերջիններուն ներքին ներուժը, թոյլ տալով առաւել ընդարձակ համարկում ազգային ու միջազգային տնտեսութիւններուն հետ, տարածքներուն մէջ համաչափութեան բարձր մակարդակի ապահովումը` յատուկ ուշադրութիւն դարձնելով զարգացած ամէնէն տկար տարածքներուն ու սահմանամերձ շրջաններուն: Ըստ նախարարին,  ռազմավարութեան կարեւորագոյն նպատակներէն է նաեւ պաշարներու կայուն օգտագործումով կիրարկել տարածքային զարգացման քաղաքականութիւն ու գործելակերպերու բարելաւում կատարել` տարածքային ու տեղական դերակատարներու աւելի աշխուժ մասնակցութեան ապահովման միջոցով: Զեկուցուած է, որ տարածքային զարգացման վերաբերեալ կառավարութեան ներկայ դիրքորոշումը ներկայացուած է Հայաստանի տարածքային զարգացման հայեցակարգին մէջ, որ ընդունուած է 2011-ին: Հայեցակարգին առաջադրանքն է տարածքներուն միջեւ զարգացման անհամաչափութիւնները հարթել եւ ազգային, մարզային ու տեղական իշխանութիւններուն համար շրջաններուն մէջ կարողութիւններու ստեղծման վերաբերող ծրագիրներ գործադրել:

Նախարար Դաւիթ Լոքեան տեղեկացուցած է նաեւ, որ ռազմավարութեան նախագիծը մշակուած է Եւրոպական Միութեան հետ, եւ կ՛ակնկալուի, որ տարածքային զարգացման գործառնական առաջին ծրագիրը կը մշակուի 2016-2017 եւ կ՛իրականացուի 2017-2020 թուականներուն:

Վարչապետ Յովիկ Աբրահամեան կարեւոր նկատած է ներկայացուած փաստաթուղթը, որուն իրագործումը պիտի նպաստէ տարածքային համաչափ զարգացման: Ան ընդգծած է, որ համայնքներու կայացման զուգահեռ պէտք է անոնց վերաբերող կառավարութեան լիազօրութիւնները ապակեդրոնացնել: Ըստ վարչապետին,  համայնքներուն ֆինանսական կարելիութիւնները բաւարար չեն համայնքային խնդիրները լուծելու համար, ինչ որ տնտեսական համաչափ զարգացման առումով խնդիր է: Այս պարունակին մէջ վարչապետ Աբրահամեան անհրաժեշտ նկատած է կառավարութեան, ինչպէս նաեւ միջազգային կառոյցներուն աջակցութիւնը:

Փէոթր Սուիտալսքի կարեւոր նկատած է զարգացման ռազմավարութեան նախագիծը եւ ողջունած համայնքներու զարգացման վերաբերող կառավարութեան վարած քաղաքականութիւնը: Ան նշած է, որ Եւրոպական Միութիւնը ասկէ ետք եւս պատրաստ է յաւելեալ ֆինանսական օժանդակութիւն տրամադրելու Հայաստանին` տարածքային զարգացման վերաբերող ծրագիրներու իրագործման համար: