ՍՏԵՓԱՆԱԿԵՐՏ - Լեռնային Ղարաբաղի Հանրապետութեան Ազգային ժողովին մէջ ներկայացուած 5  խմբակցութիւններէն 2ը կողմ են սահմանադրական փոփոխութիւններու հայեցակարգով առաջարկուած՝ նախագահական ձեւին անցում կատարելու դրութեան, 2ը՝ դէմ, իսկ 1ը՝ վերապահութիւններ ունի ներկայացուածին վերաբերեալ:

Կիսանախագահական ձեւէն նախագահական ձեւին անցում կատարելու տարբերակին կողմ են Լեռնային Ղարաբաղի Հանրապետութեան Ազգային ժողովին մէջ մեծամասնութիւն կազմող <<Ժողովրդավարութիւն>> ու <<Հայրենիք>>  խմբակցութիւնները: Դէմ են՝ <<Դաշնակցութիւն>> ու <<Վերածնունդ>>  խմբակցութիւնները, իսկ <<Շարժում-88>>ը թէեւ կողմ է կառավարման կիսանախագահական համակարգին, բայց ներկայացուած տարբերակին ալ կտրականապէս դէմ չէ՝ որոշ վերապահութիւններով:

<<Թերթ>>ի հետ զրոյցի մը ընթացքին ՀՅԴ խմբակցութեան ղեկավար, ՀՅԴ Արցախի Կեդրոնական կոմիտէի ներկայացուցիչ Դաւիթ Իշխանեան ըսաւ, որ առաջարկուած տարբերակը նախագահական կեդրոնացուած համակարգ է եւ դէմ է Դաշնակցութեան սկզբունքներուն եւ պահանջներուն: Ուստի ՀՅԴն, Իշխանեանի փոխանցումով, դէմ է առաջարկուող հայեցակարգին:

<<ՀՅԴն իր տեսակէտը վաղուց ներկայացուցած է: Մենք կողմ ենք խորհրդարանական ձեւին եւ ներկայացուցած ենք նման հայեցակարգ>>, ըսաւ Դաւիթ Իշխանեան:

Պատասխանելով այն հարցումին, թէ ՀՅԴ Արցախի Կեդրոնական կոմիտէն ինչպէ՞ս իր անհամաձայնութիւնը պիտի դրսեւորէ, Իշխանեան ըսաւ, որ հարցը քննարկման ընթացքի մէջ է: Պատգամաւորը շեշտեց, որ Հայաստանի մէջ Դաշնակցութիւնը սկզբունքօրէն կողմ եղած է եւ պաշտպանած է խորհրդարանական կառավարման ձեւը, եւ ՀՅԴ Արցախի Կեդրոնական կոմիտէն չի կրնար այլ տեսակէտ ունենալ: