26 օգոստոսին Հայաստանի Հանրապետութեան կրթութեան եւ գիտութեան նախարար Լեւոն Մկրտչեան այցելած էր Լոռիի մարզ` հանրակրթական դպրոցներու ուսուցիչներու եւ տնօրէններու  օգոստոսեան խորհրդակցութիւններուն մասնակցելու:

Նախարարը նախ ներկայացուցած է կրթութեան եւ գիտութեան մարզին մէջ յառաջիկային կատարուելիք փոփոխութիւնները:

Ան նշած է, որ սեպտեմբերին քննարկման պիտի դրուի <<Բարձրագոյն կրթութեան մասին>> օրէնքը, որ շարք մը փոփոխութիւններ կրած է: Մասնաւորապէս` ուսանողը լրացուցիչ առարկաներու հաշուոյն կրնայ  յատուկ թիւով քրետիթներ հաւաքել եւ, իր ընտրած մասնագիտութեան հետ միասին, ստանալ նաեւ երկրորդ մասնագիտութիւն:

Բացի ատկէ, արդէն տեղեկացուցած ենք, որ աւագ դպրոցի վերջին` 12-րդ դասարանի աշակերտը միայն երեք նիւթ պիտի ունենայ, եւ անոնք այն նիւթերն են, որոնք պէտք են աշակերտին համալսարան ընդունուելու համար:

<<Ասոր կը յաջորդէ այն, որ 12-րդ դասարանին մէջ քրետիթային համակարգ կը ներդնենք, ինչ որ կարելիութիւն կու տայ աշակերտին քրետիթներ հաւաքելու համալսարանի համար: Այս ալ իր կարգին ուսանողին արդէն կարելիութիւն կ՛ընձեռէ պսակաւոր արուեստիցի ուսումը աւարտել 3  տարուան ընթացքին: Մեր մօտ ընդունուած է, որ պսակաւոր արուեստիցը թերի բարձրագոյն կրթութիւն է, սակայն այդպէս չէ, անիկա  ամբողջական է, ո՞վ ըսաւ, որ բոլորը պէտք է մագիստրոսութեան եւ  ասպիրանտուրայի մէջ կրթութիւն ստանան: Պսակաւոր արուեստիցը աւարտելէ ետք ուսանողը նախ պէտք է իր ստացած գիտելիքները  աշխատաշուկային մէջ փորձէ, եւ եթէ չբաւարարուեցաւ, կամ այլ աշխատանքի փնտռտուքներու հարց յառաջանայ, այն ատեն միայն ան  պէտք է մագիստրոսութեան դիմէ>>, ըսած է Մկրտչեան: