ԵՐԵՒԱՆ, <<Երկիր>> - <<Երկիր մեդիա>>ի <<Երկիրն այսօր>> լրատուական հաղորդումէն՝ պատասխանելով Կարէն Կարապետեանի գործունէութեան վերաբերող հարցումի մը՝ ՀՅԴ Գերագոյն Մարմինի ներկայացուցիչ, Ազգային ժողովի ՀՅԴ խմբակցութեան քարտուղար Աղուան Վարդանեան ըսած է, որ տակաւին կանուխ է գնահատական տալը։

<<Ընդամէնը մէկ շաբաթ է Կարէն Կարապետեանը վարչապետ աշխատում: Բայց կ՛ասեմ հետեւեալը՝ վարչապետի հետ ունեցել ենք տեւական հանդիպումներ, որտեղ քննարկել ենք ե՛ւ երկրի առջեւ ծառացած խնդիրները, ե՛ւ տնտեսութեան վիճակը, ե՛ւ իր պատկերացումները, թէ ինչ ծրագրեր, նպատակներ ունի՝ կարճաժամկէտ եւ հեռանկարային: Կարող եմ ասել, որ վարչապետի մօտեցումները, այն է՝ իսկապէս նոր սկիզբ դնել, խաղի նոր կանոններ սահմանել, պայքարել իրապէս ստուերային տնտեսութեան դէմ, աջակցել գործարարութեանը, հնարաւորինս արտօնեալ, առաւելագոյն յարմար պայմաններ ստեղծել Հայաստանում ներդրումների համար, նոր արտադրանք ստեղծողների համար ձեւաւորել բարենպաստ միջավայր, աջակցել փոքր ու միջին բիզնեսին, հնարաւորինս մեծացնել ներդրումները հանրապետութիւնում, առաւելագոյնս աջակցել անապահով բնակչութեանը՝ նրանց բեռը նուազեցնելով, խօսքը վերաբերում է գազի, ելեկտրաէներգիայի գների տարբերակուած մօտեցումներին, եւ ընդհանուր բառերով՝ սա իսկապէս նոր սկիզբ է: Այսինքն՝ այն, ինչ արձանագրուած է ե՛ւ մեր համաձայնագրի մէջ՝ ՀՀԿի հետ՝ այդ խնդիրները, նպատակները, ե՛ւ այն, ինչ յայտարարել է հանրապետութեան նախագահը այս տարուայ Փետրուարի 12ին, որ իսկապէս մեր երկրի առջեւ ծառացած խնդիրներն են, վարչապետը վճռականօրէն պատրաստակամ է եւ իսկապէս ուզում է այդ բոլոր հարցերով արմատական քայլեր կատարել: Եւ այս առումով մենք ամբողջովին աջակցում ենք վարչապետի մօտեցումներին, բազմաթիւ համընկնումներ կան մեր մօտեցումների մէջ, այլ բան է, թէ ժամանակն ինչ ցոյց կը տայ: Կոնկրետ այս փուլում մենք բոլոր նախաձեռնութիւններին աջակցում ենք>>, բացատրած է Աղուան Վարդանեան:

Պատասխանելով լրագրողի այն հարցումին, թէ ինչու վերջին շրջանին քննարկման թեմա կը հանդիսանան յատկապէս վարչապետին եւ դաշնակցական նախարարներուն յարաբերութիւնները՝ ՀՅԴ Գերագոյն Մարմինի ներկայացուցիչը ըսած է.

<<Ինչ որ առումով սա մեր լրատուամիջոցների գործն է՝ տեսադաշտում գտնել մի բան եւ դրա վրայ վերլուծութիւններ կատարել: Այսօր ես կարդացել եմ վերլուծութիւններ՝ իբր Դաշնակցութեան եւ վարչապետի առճակատման եւ հակասութիւնների մասին. ամբողջովին <<մատից ծծած>> վերլուծութիւն էր, բացարձակ նման բան չկայ: Առաջին կառավարութեան նիստից, տեսէք, կարող էր տպաւորութիւն ստեղծուել, բայց մենք այդ թեմայով խօսել ենք վարչապետի հետ, խօսել ենք բաց, անկեղծ, մինչեւ վերջ, եւ վարչապետը խորապէս ափսոսում է, որ նման տպաւորութիւն է եղել: Ընդհակառակը, ինքն ասել է, որ շատ բարձր է գնահատում նոյն Արծուիկ Մինասեանին՝ իբրեւ բանիմաց քաղաքական գործիչ եւ նախարար, եւ շարունակելու է իր հետ աշխատել: Մի խնդիր կայ այստեղ, որ եւս կ՛ուզէի փարատել բոլոր կասկածները: Վարչապետն ունի իր պատկերացումներն այս կամ այն ճիւղի՝ ե՛ւ կառուցուածքի, ե՛ւ անելիքների վերաբերեալ: Եւ իմ յորդորն էր, առաջարկութիւնն էր, որ մենք եւս իրեն այս հարցում աջակցենք, եւ մենք որեւէ խնդիր չենք տեսնում: Մեզ համար կարեւորը իմ թուարկած խնդիրների դրական լուծումն է, սպասումները՝ բնակչութեան բեռի թեթեւացում, իսկապէս ստուերի դէմ պայքար, դրանք ընթացք ունենան. դա կ՛ունենանք 2 նախարարով, 3 նախարարով, դա էական տարբերութիւն չէ: Ես վստահեցնում եմ, որ վարչապետն աշխատելու է Արծուիկ Մինասեանի հետ, միւս նախարարների հետ, եւ այս մասին վերջնական դուք առաջիկայ օրերին կ՛իմանաք: Կրկնում եմ, դրուած են յստակ խնդիրներ, եւ դա հանրապետութեան նախագահի Փետրուարի 12ի ելոյթից յետոյ էր, դա բխում է մեր համաձայնագրից, եւ որքան վարչապետը վճռականօրէն այդ ուղղութիւններով առաջ կը գնայ, այնքան կ՛ունենայ մեր աջակցութիւնը>>, ըսած է Աղուան Վարդանեան:

Ազգային ժողովի ՀՅԴ խմբակցութեան քարտուղարը անդրադարձած է նաեւ <<էկոնոմիկայի նախարարութեան>> վերանուանման առնչութեամբ Արծուիկ Մինասեանի առարկութիւններուն եւ հարցին՝ թէ ատիկա կրնա՞յ ազդել գործընթացին վրայ:

<<Մենք պիտի սովորենք, որ կառավարութեան նիստում նախարարներն անհատականութիւններ են, ոլորտների ղեկավարներ են եւ ազատ պիտի արտայայտեն իրենց սկզբունքներն ու տեսակէտները: Եւ շատ բնական է, որ Արծուիկ Մինասեանն իր սկզ-բունքային տեսակէտներն արտայայտում է: Լաւ կը լինէր՝ բոլոր նախարարներն այդպէս անէին, կառավարութեան նիստն այդպէս ընթանար: Կառուցուածքային փոփոխութիւններ են տեղի ունենում ոչ միայն էկոնոմիկայի նախարարութիւնում, այլ նաեւ բազմաթիւ ոլորտներում. հիմա դժուար է գնահատել, թէ այսքան արագ կատարուած կառուցուածքային փոփոխութիւնները, տարբեր մարմինների ստեղծումը որքան արդիւնաւէտ կը լինեն, բայց սա եւս վկայում է վարչապետի վճռական մօտեցումների մասին: Այնպէս որ, կրկնում եմ, մենք այսօր որեւէ խնդիր չունենք վարչապետի հետ, հիմնական ուղղութիւններով մեր տեսակէտները համընկնում են, եւ այս փուլում մենք աջակցում ենք վարչապետի գործողութիւններին, այն, ինչ բխում է նաեւ մեր նպատակներից եւ մօտեցումներից: Կը գայ ժամանակը՝ արդիւնքները կը տեսնենք, արդէն կը դատենք ըստ արդիւնքների: Բայց որ անհրաժեշտ է վստահել եւ ժամանակ տալ, սա եւս ակնյայտ է>>, եզրափակած է Աղուան Վարդանեան: