ԵՐԵՒԱՆ -  ՀՀ պաշտպանութեան նախարար Վիգէն Սարգսեանը հանրապետութեան նախագահին զեկուցել է նախագահի յանձնարարութեամբ եւ նախաձեռնութեամբ մեկնարկած՝ մարտական գործողութիւնների ընթացքում եւ մարտական հերթապահութիւն իրականացնող զինծառայողների զոհուելու կամ հաշմանդամութիւն ստանալու դէպքում պետական ապահովագրական վճարը (ինչպէս միանուագ վճարումն, այնպէս էլ ամսական վճարները) կտրուկ աւելացնելու ծրագրի մշակումը ՀՀ Կենտրոնական բանկի եւ սոցիալական ապահովութեան նախարարութեան հետ համատեղ աւարտելու մասին. տեղեկացնում է ՀՀ նախագահի աշխատակազմի հասարակայնութեան եւ տեղեկատուութեան միջոցների հետ կապերի վարչութիւնը:

Նախագահի մօտ ամէն շաբաթ այս ձեւաչափով տեղի ունեցող աշխատանքային հանդիպման շրջանակներում պաշտպանութեան նախարարը զեկուցել է վերոնշեալ ծրագրի մանրամասները, ինչպէս նաեւ ռազմակրթական հաստատութիւնների խնդիրների, դրանց լուծման եւ արդիականացման ուղղութեամբ նախագահի մէկ այլ յանձնարականի համաձայն իրականացուող աշխատանքները:

Վիգէն Սարգսեանը նշել է, որ աշխատանքի արդիւնքում հնարաւոր դարձաւ գտնել բանաձեւ, որով 2017թ. Յունուարի 28ից՝ մեր բանակի 25րդ տարեդարձի օրուանից, ծագող դէպքերի համար կը նախատեսուեն նոր, զգալիօրէն աւելացուած վճարներ: Զոհուած եւ առաջին կարգի հաշմանդամութիւն ստացած զինծառայողի ընտանիքները կը ստանան միանուագ 10 մլն. դրամ ապահովագրական վճար: 2րդ կարգի հաշմանդամութիւն ստացած զինծառայողին կը յատկացուի միանուագ 5 մլն. դրամ ապահովագրական վճար:

Զոհուելու կամ առաջին կարգի հաշմանդամութիւն ստանալու դէպքում ամսական ապահովագրական վճարները կը կազմեն՝ 300 հազար դրամ սպայական անձնակազմի, 250 հազար դրամ ենթասպաների եւ 200 հազար դրամ շարքայինների դէպքում: Երկրորդ կարգի հաշմանդամների դէպքում այդ վճարները համապատասխանաբար կը կազմեն 250, 200 եւ 150 հազար դրամ:

Այդ գումարը, որպէս ապահովագրական վճար, կը վճարուի 20 տարի շարունակ՝ կազմելով սպայական անձնակազմի համար 82 մլն. դրամ, ենթասպայական անձնակազմի պարագայում՝ 70 մլն. դրամ եւ շարքայինների դէպքում՝ 48 մլն. դրամ:

Հաշմանդամների պարագայում, հիմնադրամի արդիւնաւէտ գործունէութեան եւ ֆինանսական միջոցների առկայութեան դէպքում, հիմնադրամի խորհուրդը կը կարողանայ 20 տարի անց որոշում կայացնել այդ վճարումների շարունակականութիւնն ապահովելու ուղղութեամբ: Հակառակ դէպքում, 20 տարի անց հաշմանդամ զինծառայողները կը սկսեն ստանալ սոցիալական ապահովութեան նպաստ՝ այն չափով, որքան պետութեան կողմից այդ ժամանակ սահմանուած կը լինի:

Ծրագիրը ֆինանսաւորուելու է յատուկ հիմնադրամի միջոցով, որին աշխատող իւրաքանչիւր անձ ամսական վճարելու է հազար դրամ: Հիմնադրամը նաեւ հաւաքագրելու է կամաւոր նուիրաբերութիւններ: Գումարը ծախսուելու է բացառապէս ապահովագրական վճարները վճարելու նպատակով: Ձեւաւորուելու է ծրագրի խորհուրդ՝ հասարակութեան յարգանքն ու վստահութիւնը վայելող անձանցից, որը վերահսկելու է հասարակութեան համար եւս ամբողջութեամբ թափանցիկ եւ հրապարակային այդ գործընթացը:

Նախագահ Սերժ Սարգսեանը կարեւորել է իրականացուած աշխատանքը եւ նոր յանձնարարականներ տուել ծրագրի իրականացման փուլի համար:

<<Դա չափազանց կարեւոր ծրագիր է: Դեռեւս երկու տարի առաջ մենք սկսեցինք այս աշխատանքը՝ մշտապէս համոզուած լինելով, որ զոհուածների եւ հաշմանդամների սոցիալական խնդիրներով զբաղուելը մեր ուղիղ պարտականութիւնն է, եւ որքանով կարողանանք լաւ զբաղուել ու որքանով ի վիճակի լինենք նրանց արդէն դժուարացած կեանքը ինչ որ կերպով թեթեւացնել, պարտաւոր ենք անել: Ես կարծում եմ, այո՛, հիմա եկել է այն ժամանակը, որ մենք ի վիճակի ենք մեր քաղաքացիների օգնութեամբ կտրուկ բարելաւելու այս իրավիճակը: Մենք միշտ էլ փորձել ենք առաւելագոյնը անել: Յամենայնդէպս, այն հանգամանքը, որ զոհուածների եւ առաջին կարգի հաշմանդամների ու մեծաթիւ երկրորդ կարգի հաշմանդամների բնակարանային խնդիրը հիմնականում կարողացել ենք լուծել, հէնց այդ, այսպէս ասած, ցանկութեան եւ պետութեան պատրաստակամութեան արդիւնքն է, եւ ձեւը շատ ճիշդ է՝ պետութիւն-մասնաւոր համագործակցութեամբ: Այսինքն, եթէ մենք ասում ենք՝ <<ազգ-բանակ>>, եթէ նոյնիսկ այս կարգախօսից, այս գաղափարից առաջ մենք ասում ենք, որ մեր բանակը ժողովրդական բանակ է, մեր բանակը մեր անվտանգութեան երաշխաւորն է, ապա դա պէտք է դրսեւորուի ոչ միայն բարոյական խօսքերով, այլ նաեւ, ի հարկէ, մասնակցութեամբ: Այս առումով չափազանց կարեւոր եմ համարում օրէնքի ընդունումը, բայց զուգահեռաբար պէտք է աշխատել ֆինանսների նախարարութեան, կառավարութեան հետ: Տեսնենք, թէ որքանո՞վ կարող ենք բարելաւել նաեւ նախկինում զոհուած զինուորների, սպաների ընտանիքների վիճակը. այսինքն, ունե՞նք արդեօք հնարաւորութիւններ, ոչ այս չափով, որ հիմա է լինելու, ինչ որ չափով բարձրացնելու վճարները: Պէտք է հաշուարկել, տեսնել այսօրուայ համակարգը, արդեօք, կարո՞ղ է վատթարացնել որեւէ մէկի վիճակը: Կարծում եմ, որ շատ քիչ դէպքեր կարող են լինել, եւ հիմնադրամը իր կանոնադրութեան մէջ, միգուցէ, նաեւ օրէնքը պէտք է այս հանգամանքը հաշուի առնեն, եւ հնարաւորութիւն ընձեռուի, որպէսզի վիճակի վատթարացում չլինի: Շատ կարեւոր է, որ, այս փուլում եկել ենք այդ հանգրուանին>>, ասել է նախագահը:

Յիշելով, թէ ինչպէս ապրիլեան դէպքերի ժամանակ տարբեր հասարակական կառոյցներ, անհատներ փորձում էին առանձին-առանձին ինչ որ կերպ օգնել այն մարդկանց, ովքեր տուժել էին, հաշմանդամ դարձել, նաեւ այն ընտանիքներին, որոնք զաւակ էին կորցրել, նախագահ Սարգսեանը նշել է, որ պէտք է համախմբել հնարաւորութիւնները՝ այդ բոլոր մարդկանց առաջարկել, որպէսզի կամաւորութեան սկզբունքով հիմնադրամում մուծումներ կատարեն, եւ այդ գործընթացը լինի ամբողջութեամբ թափանցիկ: Նախագահի մօտեցմամբ՝ վերոնշեալ հիմնադրամը չպէտք է ունենայ մեծ աշխատակազմ, ըստ այդմ՝ պէտք է քիչ գործառնական ծախսեր կատարի:

Նախարար Վիգէն Սարգսեանը զեկուցել է, որ ծրագիրը նախագծուած է հէնց <<ազգ-բանակ>> տրամաբանութեան մէջ, որտեղ ամբողջ հասարակութիւնն իր վրայ է վերցնում հայրենիքի պաշտպանի սոցիալական բեռը, իսկ բանակն օգնում է այդպիսի վիճակում յայտնուած իր զինծառայողին կամ զոհուելու դէպքում՝ նրա ընտանիքին:

Հանրապետութեան նախագահն ընդգծել է, որ անհրաժեշտ է շարունակաբար բարձրացնել ռազմական կրթութեան եւ սպայական ծառայութեան գրաւչութիւնը եւ այդ ուղղութեամբ պէտք է ջանք ու եռանդ չխնայել՝ կրթելով բանիմաց եւ արհեստավարժ սպաներ: Ըստ նախագահ Սարգսեանի, սպայական կրթութեան մէջ պէտք է ներդրուած լինեն ժամանակակից բոլոր այն հմտութիւնները եւ գիտելիքները, նման հաստատութիւնների առաջաւոր փորձը, որոնք հնարաւոր են դարձնում օր-օրի արդիականացող տեխնիկային եւ էլեկտրոնային կառավարման համակարգերին զինուորականների լիարժէք տիրապետումը:

Նախարարը նշել է, որ այսօր ՀՀ ռազմական ուսումնական հաստատութիւններն առաջարկում են անվճար կրթութիւն եւ երաշխաւորուած աշխատանք՝ մրցունակ աշխատավարձով: Ի տարբերութիւն, օրինակ, քաղաքացիական բուհերում ուսում ստացող երիտասարդների, որոնք դեռեւս պէտք է գտնեն իրենց մասնագիտական կեանքում, վճարեն ուսումնական վարկերը, յիշեալ ուսումնական հաստատութիւններն առաջարկում են վտանգաւոր եւ դժուար, բայց երաշխաւորուած ծառայութիւն, որտեղ առաջին իսկ ստացած աշխատավարձը 20 տոկոսով բարձր է միջին հանրապետականից, իսկ մասնագիտական աճի ուղին շատ յստակ տեսանելի: Վիգէն Սարգսեանի հաւաստմամբ, ապահովուում է նաեւ ծառայութեան ընթացքում լրացուցիչ կրթութիւն: Զօրացրուելով՝ սպայական անձնակազմը ստանում է երկարամեայ ծառայութեան զինուորական թոշակ եւ դեռ բաւականին երիտասարդ է քաղաքացիական կեանքում մասնագիտական նոր հնարաւորութիւններ գտնելու համար: Պաշտպանութեան նախարարը զեկուցել է, որ այժմ աշխատանք է իրականացւում զօրացրուող սպաների մասնագիտական կողմնորոշման եւ աշխատանքային շուկայում նրանց առաւելութիւնները լիարժէք ներկայացնելուն ուղղուած ծրագիր ներդնելու համար: