ՀԱՐՑԱԶՐՈՅՑ ՀՅԴ ՀԱՅԱՍՏԱՆԻ ԳԵՐԱԳՈՅՆ ՄԱՐՄՆԻ ԱՆԴԱՄ ՀՐԱՉ ԹԱԴԵՒՈՍԵԱՆԻ ՀԵՏ

Վարեց՝ ՍԻՒԶԱՆՆԱ  ՊՕՂՈՍԵԱՆ

ՀՅԴ Գերագոյն մարմնի նախաձեռնած պահեստային գումարտակը գրեթէ կազմաւորուած է եւ առաջիկայում ՊՆ համապատասխան մասնագէտների աջակցութեամբ ուսումնավարժական հաւաքներ կը սկսի՝ անհրաժեշտ պահին բանակի կազմում մեր երկրի տարածքը պաշտպանելու համար:

Այդ մասին մեզ հետ զրոյցում յայտնեց ՀՅԴ Հայաստանի Գերագոյն մարմնի անդամ Հրաչ Թադեւոսեանը:

ՍԻՒԶԱՆՆԱ  ՊՕՂՈՍԵԱՆ- Պարոն Թադեւոսեան, Հոկտեմբերի 13ին ՀՅԴ ԳՄ ազատամարտիկների հարցերի յանձնախումբը յայտարարեց, որ կազմաւորում է կամաւորականների պահեստային գումարտակ, որի կիրառումը նախատեսւում է միայն լայնածաւալ մարտական գործողութիւնների վերսկսման դէպքում: Ի՞նչ փուլում է այս գործընթացը:

ՀՐԱՉ ԹԱԴԵՒՈՍԵԱՆ- Այս պահին կազմաւորումը ընթացքի մէջ է, բայց շատ շուտով գործընթացը կ՛ամբողջանայ, կ՛աւարտուի: Բնականաբար, արդէն կան անհրաժեշտ թուով կամաւորներ, բայց դեռ շարունակւում է հերթագրումը:

ՍԻՒԶԱՆՆԱ  ՊՕՂՈՍԵԱՆ- Երբ հերթագրումն աւարտուի, ի՞նչ է լինելու դրանից յետոյ:

ՀՐԱՉ ԹԱԴԵՒՈՍԵԱՆ - Զօրամաս է ձեւաւորւում եւ, Աստուած մի արասցէ, պատերազմի դէպքում՝ մեր բանակի կողքին է կանգնում հակառակորդի դէմ մարտնչելու համար:

ՍԻՒԶԱՆՆԱ  ՊՕՂՈՍԵԱՆ- Կամաւորները ուսումնավարժական պարապմունքներ անցկացնո՞ւմ են:

ՀՐԱՉ ԹԱԴԵՒՈՍԵԱՆ- Հիմա հաւաքագրումները աւարտւում են արդէն, դրա հետ կապուած որեւէ խնդիր չունենք: Գումարտակի կազմաւորումն աւարտուելուց յետոյ ՊՆ համապատասխան մասնագէտների աջակցութեամբ պէտք է սկսուեն ուսումնավարժական հաւաքներ, որտեղ հերթագրուած անձինք պէտք է անհրաժեշտ պատրաստութիւն ստանան եւ կազմ ու պատրաստ լինեն՝ անհրաժեշտ պահին իրենց պարտականութիւնները կատարելու համար:

ՍԻՒԶԱՆՆԱ  ՊՕՂՈՍԵԱՆ- Դուք նշեցիք, որ կան անհրաժեշտ թուով կամաւորներ: Ի՞նչ է այդ թիւը:

ՀՐԱՉ ԹԱԴԵՒՈՍԵԱՆ- Այս պահի դրութեամբ 500 կամաւորներ արդէն գրանցուել են, բայց մենք դեռ ստուգում ենք բոլորի առողջական վիճակը, այլ հանգամանքներ, որպէսզի ընտրութիւն կատարուի: Այսինքն՝ այնպէս չէ, որ պէտք է անպայման բոլորը լինեն գումարտակի կազմում:

ՍԻՒԶԱՆՆԱ  ՊՕՂՈՍԵԱՆ- Հաւաքագրուած բոլոր մարդիկ դաշնակցակա՞ն են, թէ դա պարտադիր չէր:

ՀՐԱՉ ԹԱԴԵՒՈՍԵԱՆ- Դա պարտադիր չէր, մենք երբեք որեւէ գործ մեզանով չենք արել:

ՍԻՒԶԱՆՆԱ  ՊՕՂՈՍԵԱՆ- Հաւաքները, ուսումնավարժական պարապմունքները որտե՞ղ են անցկացուելու:

ՀՐԱՉ ԹԱԴԵՒՈՍԵԱՆ- Այդ բոլոր հարցերը ՊՆից ճշդէք, որովհետեւ այդ զօրամասը լինելու է ՊՆ պահեստային զօրամասը, նախարարութեան տրամադրութեան տակ է լինելու: Պաշտպանութեան նախարարութիւնը պէտք է որոշի, թէ որ զօրամասում պէտք է հաւաքուեն, հաւաքները որտեղ պէտք է անցկացնեն:

ՍԻՒԶԱՆՆԱ  ՊՕՂՈՍԵԱՆ- Պարոն Թադեւոսեան, երէկ Պահեստազօրի սպաների համահայկական միութեան նախագահ, պահեստազօրի գեներալ-մայոր Վարդան Աւետիսեանը հանդէս եկաւ յայտարարութեամբ՝ աշխարհազօրային ջոկատների հրամանատարներին խնդրելով մոբիլիզացնել (զօրա-շարժի ենթարկել-Խմբ.) կամաւորական բոլոր ուժերը: Կապ ունե՞ն ձեր եւ Աւետիսեանի յայտարարութիւններն իրար հետ: Ձեր տեղեկութիւններով առաջիկայում հնարաւո՞ր է ռազմական գործողութիւն:

ՀՐԱՉ ԹԱԴԵՒՈՍԵԱՆ. – Մենք Վարդան Աւետիսեանի ՀԿի յայտարարութեան հետ ոչ մի առնչութիւն չունենք: Որեւէ այլ տեղեկութեան ես չեմ տիրապետում:

Յիշեցնենք, որ ՀՅԴ ԳՄ տարածած հաղորդագրութիւնում մասնաւորապէս նշւում էր.  <<2016 թուականի Ապրիլի 2ից սկսուած լայնածաւալ մարտական գործողութիւններին յանպատրաստից կամաւորականների մասնակցութիւնը վեր հանեց կազմակերպչական եւ պատրաստուածութեան մի շարք հարցեր, որոնք անհրաժեշտ են իրականացնել այս սպառնալից ժամանակաշրջանում, այդ իսկ պատճառով ՀՀ ՊՆի հետ համաձայնեցուած, ՀՅԴ Գերագոյն մարմինը որոշում է կայացրել՝ կազմաւորել կամաւորականների պահեստային գումարտակ, որի կիրառումը նախատեսւում է միայն լայնածաւալ մարտական գործողութիւնների վերսկսման դէպքում>>:

www.armtimes.com