Վարչապետ Կարէն Կարապետեանը Դեկտեմբերի 5ին հանդիպել էր լրատուամիջոցների խմբագիրների հետ: Նա պատասխանեց ներկաների բազմապիսի հարցերին՝ տնտեսութիւնից, կառավարումից մինչեւ իր փողկապների ընտրութիւն: <<Սիվիլնեթ>>ը ներկայ էր հանդիպմանը եւ առանձնացրել է վարչապետի հիմնական մտքերը:

ՀԱՐՑ- Ո՞ր գերատեսչութիւններից է ակնկալւում առաջնահերթ բեկումնային զարգացում:

ԿԱՐԷՆ ԿԱՐԱՊԵՏԵԱՆ- Կառավարութեան ծրագրի մասին մենք ասել ենք հետեւեալը, որ երկու փուլից է բաղկացած լինելու: Առաջին փուլը մենք ներկայացրել ենք կառավարութեան ծրագրով, որը ներկայացրել ենք Ազգային ժողով: Երկրորդ փուլը երկարաժամկէտ ծրագիր է, թէ ինչպէս ենք մենք պատկերացնում եւ ուր պէտք է գնայ մեր երկիրը: Յայտարարել ենք, որ ստեղծելու ենք ռազմավարական նախաձեռնութիւնների կենտրոն, որը վերջնական փուլում է: Լինելու է մասնաւոր հատուած-պետութիւն համագործակցութեան շրջանակներում, որի մէջ ընդգրկելու ենք մեր յայտնի հայրենակիցներին Սփիւռքում՝ որոշակի կենսագրութիւն, պոտենցիալ (կարողականութիւն-Խմբ.) ունեցող: Կարծում եմ, որ շատ հետաքրքիր հարթակ ենք ստեղծելու, որտեղ պրոֆեսիոնալ (արհեստավարժ-Խմբ.) մակարդակով քննարկելու ենք, թէ ուր ենք գնալու:

Մենք գիւղատնտեսութեան մէջ բաւականին անելիքներ ունենք եւ այնտեղ փորձելու ենք մաքսիմալ հաշուի առնել այն երկրների փորձը, որոնք խելօք գիւղատնտեսութիւն են վարում: Հետաքրքիր են մեր հանքային, էներգետիկայի, տուրիզմի, ոսկերչութեան եւ այդպիսի ուղղութիւնները, բայց դա չի նշանակում, որ այլ ուղղութիւններով՝ փոքր-միջին բիզնես, նորարարական ծրագրերով չենք զբաղուելու:

ՀԱՐՑ- Նախագահը յայտարարեց, որ դուք ՀՀԿի յաղթանակի դէպքում (2017ին) կը շարունակէք պաշտօնավարել: Իսկ նախագահի պաշտօնավարման ժամկէտից յետոյ պատրա՞ստ էք վարչապետի պաշտօնը զիջել Սերժ Սարգսեանին՝ հաշուի առնելով, որ նա չի բացառել, որ կարող է որպէս վարչապետ պաշտօնավարել:

ԿԱՐԷՆ ԿԱՐԱՊԵՏԵԱՆ- Ես կարծում եմ՝ այդ հարցին պատասխանել եմ: Յամենայն դէպս՝ իմ պատկերացմամբ, եթէ ես ասէի երեք-չորս տարի, հինգ տարի անընդմէջ ես պաշտօնավարելու եմ, դուք անմիջապէս, քանի որ շատ կարող ուժեր էք եւ հնարաւորութիւն ունէք մեկնաբանելու, թոյլ կէտը գտնելու պատասխանի, կ՛ասէք՝ իսկ եթէ դուք էֆեկտիւ (ազդեցիկ-Խմբ.) չլինէք, եթէ դուք լաւ չկառավարէք, վտանգ կայ, չէ՞, որ դուք կը դառնաք չարիք: Այդ իսկ պատճառով հարցիս պատասխանը հետեւեալն է. չեմ եկել վեց ամիս աշխատելու, բայց միեւնոյն ժամանակ, եթէ մենք արդիւնք ցոյց տանք, եթէ հանրութիւնը, մեր ժողովուրդը, մեր քաղաքացին, գիւղացին, բանուորը, բիզնեսմենը, գիտնականը հասկանան, զգան, որ իւրաքանչիւր օր մենք ճիշդ ուղղութեամբ ենք գնում, որ մենք ինչ որ ձեւի ցոյց ենք տալիս այն հորիզոնները, որոնք հրապուրիչ են, որոնք բաւարար են հասկանալու համար, որ ճիշդ ուղղութեամբ ենք գնում, մենք կը փորձենք աշխատել երկարատեւ:

ՀԱՐՑ- Նախագահի հետ նման հարց քննարկե՞լ էք:

ԿԱՐԷՆ ԿԱՐԱՊԵՏԵԱՆ- Ո՛չ, նման հարց քննարկելը մօտաւորապէս նոյնն է, որ ես յայտարարեմ՝ գիտէք ինչ, ես երեք-չորս տարուց պակաս պատրաստ չեմ աշխատելու: Որոշակի ներքին ցենզ պէտք է ունենաս, որ ասես՝ իսկ ես քանի՞ տարի եմ վարչապետ աշխատելու, մի հատ ինձ երաշխաւորէք: Կարծում եմ՝ կոռեկտ (ճիշտ-Խմբ.) չէ նման քննարկումը:

ՀԱՐՑ- Լրագրողների մի շարք հարցերից յետոյ կրկին հնչեց հարցը՝ արդեօք Կարէն Կարապետեանն իրեն տեսնո՞ւմ է վարչապետի պաշտօնում  2018ից յետոյ, երբ աւարտուի Սերժ Սարգսեանի նախագահութեան երկրորդ ժամկէտը:

ԿԱՐԷՆ ԿԱՐԱՊԵՏԵԱՆ- Եթէ մեր կառավարութիւնը, մեր թիմը էֆեկտիւ աշխատի, եւ եթէ պահանջուած լինի, վարչապետ եմ տեսնում: Դա՞ էիք ուզում լսել։

ՀԱՐՑ- ՀՀԿին անդամակցելու մասի՞ն։

ԿԱՐԷՆ ԿԱՐԱՊԵՏԵԱՆ- Դրուել են խաղի կանոններ, ըստ որի մենք պէտք է աշխատենք: Այդ խաղի կանոնները խախտողները պէտք է համապատասխան վերաբերմունք ունենան, անկախ նրանից, թէ ինչ քաղաքական պատկանելութիւն ունեն… Իմ թիմակիցներից մարդիկ են անդամագրուել Հանրապետականին, որոնք երբեւիցէ չեն մտածել կուսակցական կեանքով ապրել, որովհետեւ այսօրուայ իրողութիւնը, մարտահրաւէրը եւ այն բեռը, որը մեզ վրայ դրուած է, պահանջում է քաղաքական յենարան:

ՀԱՐՑ- ԵՏՄին Հայաստանի անդամակցութեան մասի՞ն։

ԿԱՐԷՆ ԿԱՐԱՊԵՏԵԱՆ- Ցաւօք, մենք շատ ապրանք, արտադրանք չունենք, որոնք Եւրոպայում մրցունակ են, ընկալելի են, ընդունելի են: Մտնելով այդ ակումբը (ԵՏՄ)՝ մենք հնարաւորութիւն ունենք 200 միլիոնանոց շուկայում աշխատել: Էֆեկտիւ կ՛աշխատենք, լաւ կը լինի, ոչ էֆեկտիւ՝ լաւ չի լինի: Եթէ լաւ չի լինի, դա չի նշանակում, որ բուն մտնելու փաստն էր վատը, դա նշանակում է, որ մենք էֆեկտիւ չենք:

Երկրորդը, մենք մերժո՞ւմ ենք բոլոր մնացած հարթակները աշխարհում. իմ կարծիքով՝ ոչ: ԵՏՄ անդամ լինելով՝ մեր ձեռքը մէկը բռնե՞լ է Եւրամիութիւն գնալու, փորձելու բիզնես անել, ի հարկէ՝ ոչ: Աւելին ասեմ՝ ԵՏՄի անդամ լինելով՝ Հայաստանը եզակի շանս ունի: Բոլոր հինգ անդամ երկրները՝ գիտէք, Ռուսաստանի նկատմամբ սահմանափակումները՝ գիտէք: Եւրոպայում բիզնեսներ կան, որ այդքան էլ գոհ չեն այդ սանկցիաներից, ու իրենք ուզում են այդ շուկայի մէջ մնալ: Լաւագոյն հարթակը, եթէ մենք այդ ազդակները տանք, համապատասխան միջավայրը ներդրումների համար ստեղծենք, որպէսզի Հայաստանով մտնեն ԵՏՄ երկրների մէջ, իմ պատկերացմամբ՝ Հայաստանն ունի:

ՀԱՐՑ- Աչքը կշտանալու եւ կադրերի ընտրութեան մասի՞ն։

ԿԱՐԷՆ ԿԱՐԱՊԵՏԵԱՆ- …աչքը կշտանալու կամ կոշտ հոգեբանութեան յատկութիւնը փողի քանակից եւ դրամապանակի հաստութիւնից չէ: Ես գիտեմ բազմաթիւ մարդիկ, եթէ կարելի է այս բառն օգտագործել՝ կուշտ են: Թիմն ընտրելիս, ես ընտրել եմ այն մարդկանց, որոնց բարոյական կերպարի վրայ համոզուած եմ եւ վստահ եմ, որ պաշտօնը չեն օգտագործի անձնական հարստացման եւ բիզնեսի լոբիինգ անելու համար: Եթէ այդպէս չլինի, ես առաջինը դրա դէմը կ՛առնեմ:

Իրականում մենք ռեֆորմ (բարեկարգում-Խմբ.) անելու ժամանակ խնդիր ենք ունենալու՝ ոնց ենք պետական համակարգի վարձավճարները փոխելու, որպէսզի կարողանանք մոտիվացնենք, նոր մասնակիցների ներգրաւենք, որպէսզի իրենց համար հետաքրքիր լինի, որովհետեւ այսօր լաւագոյն տեղը չէ դա: Ի հարկէ ես ընտրել եմ այն մարդկանց, որոնց հետ ճանապարհ եմ անցել: Թիմ ընտրելու ժամանակ ես բազմաթիւ խնդիրներ եմ ունեցել, կան մարդիկ, որոնց ես որոշակի աւանսով եմ նշանակել, որովհետեւ այդ պահին աւելի լաւ թեկնածու չեմ ունեցել: Ցաւօք սրտի, պէտք է նշեմ, որ մեր կադրերի պահուստային հարթակն այդքան էլ մեծ չէ: Եթէ դուք ունէք լաւ կադրեր, որոնք կարող են որոշակի ոլորտներ կառավարել, ես շնորհակալ կը լինեմ, եթէ ինձ խորհուրդ տաք, սիրով կը քննարկեմ դա:

ՀԱՐՑ- Նախընտրական փուլը խանգարո՞ւմ է տնտեսութեանը։

ԿԱՐԷՆ ԿԱՐԱՊԵՏԵԱՆ- Նախընտրական այս փուլը խանգարում է տնտեսութեան ակտիւացմանը: Նոյնիսկ կամայական մարդը տան համար գոյքը գնելիս յետաձգում է, որ Ապրիլի 2ից յետոյ գնի. բիզնեսմենները՝ նոյն կերպ: Եթէ մենք ռէալ կարողանանք արդար միջավայր ստեղծել, եւ բիզնեսմենը հասկանայ, որ իր համար անսպասելի զարգացումներ, խոչընդոտներ չի ունենայ, գումար դնելու նրա համարձակութիւնը բաւական աշխուժանում է:

ՀԱՐՑ- Օֆշորներից եկող ներդրումների մասի՞ն։

ԿԱՐԷՆ ԿԱՐԱՊԵՏԵԱՆ- Օֆշորային ընկերութիւններին ես վերաբերւում եմ շատ ռացիոնալ, եթէ նոյնիսկ ժամանակին փողը գնացել է, ինչ որ տարբերակով կարողանանք Հայաստան բերել, լաւ արդիւնք է: Եթէ օֆշորը ներդրում է անում եւ այստեղ սուբյեկտ է ստեղծում, որը ենթարկւում է այստեղի օրէնքներին, ինքը հարկերից չի կարող խուսափել:

ՀԱՐՑ- Համահայկական բանկի մասի՞ն։

ԿԱՐԷՆ ԿԱՐԱՊԵՏԵԱՆ- Մենք քննարկել ենք Համահայկական բանկի հիմքի վրայ ստեղծել (ներդրումային) ֆոնդ, բայց այս պահին Կենտրոնական բանկը ծրագիր ունի՝ Համահայկական բանկին նոր կեանք, նոր շունչ տալու:

ՀԱՐՑ- Փոքր եւ միջին ձեռներէցութեան մասի՞ն։

ԿԱՐԷՆ ԿԱՐԱՊԵՏԵԱՆ- Մենք ունենք մասնագիտացուած կառոյցներ, որտեղ փոքր եւ միջին ձեռնարկութիւնների մասին անհանգստանում են: Իրականում փոքր եւ միջին բիզնեսը չափազանց կարեւոր հարթակ է մեզ համար: Մարզերում, երբ հանդիպում ենք, փորձում ենք յետադարձ կապը ստեղծել այնպէս, երբ մարդը ինչ որ նախաձեռնութիւն ունի, փոքր գումար ունի, մենք անպայման օգնենք նրան: Թէ ինչպէս՝ ժամանակը եւ ֆինանսը ցոյց կը տան: Հարկային մասով ասեմ, որ անհատ ձեռներէցներին մենք արդէն հարկերից ազատել ենք:

ՀԱՐՑ- Վերին Լարսի մասի՞ն։

ԿԱՐԷՆ ԿԱՐԱՊԵՏԵԱՆ- Վերին Լարսի ճանապարհը կարեւոր է Հայաստանի համար, բայց նպատակայարմար չէ, որ հայկական կողմը այն վերանորոգի: Այդ ուղղութեամբ աշխատում են հարեւան երկրի գործընկերների հետ, որ նրանք վերանորոգեն, որովհետեւ նրանց համար եւս այդ ճանապարհը շատ կարեւոր է: Պատկերացնո՞ւմ էք՝ բոլոր երկրներին գնանք, առաջարկենք փող ծախսել: Հլա մի հատ մեզ եօլա տանենք: Բանակցում ենք, որպէսզի փորձենք այլ տարբերակներ գտել:

ՀԱՐՑ- Գագիկ Ծառուկեանի վերադարձի մասին. վարչապետն ասաց, որ Գագիկ Ծառուկեանի՝ քաղաքականութիւն վերադարձի հարցը նրա անձնական գործն է: Դահլիճից ռեպլիկ հնչեց, որ այդպէս չէր երկու տարի առաջ, երբ նրան հեռացրին քաղաքականութիւնից:

ԿԱՐԷՆ ԿԱՐԱՊԵՏԵԱՆ- Ծառուկեանին վերաբերւում եմ շատ հանգիստ: Անձնական հանդիպումներ ունեմ Գագիկ Ծառուկեանի հետ, բայց այդ հարցը չեմ քննարկում:

ՀԱՐՑ- Իր փողկապներն ընտրելու մասին. փողկապների հարցում բծախնդի՞ր էք:

ԿԱՐԷՆ ԿԱՐԱՊԵՏԵԱՆ- Ոչ, բծախնդիր չեմ: Շատ հեշտ ստացւում է ինձ մօտ:

ՀԱՐՑ- Ձեր իմեջով յատուկ խո՞ւմբ է զբաղւում՝ բարձրաճաշակ փողապներ եւ այլն:

ԿԱՐԷՆ ԿԱՐԱՊԵՏԵԱՆ- Դուք ո՞ւմ վրայ էք կասկածում:

<<Սիվիլնեթ>>