ԵՐԵՒԱՆ, <<Արմէնփրէս>>.- Հայաստանի պաշտպանութեան նախկին նախարար Սէյրան Օհանեան յայտարարած է, որ յառաջիկայ խորհրդարանական ընտրութիւններուն պիտի մասնակցի աշխոյժ կերպով։

Այս առիթով ան հրապարակած է յայտարարութիւն մը, որուն մէջ նշած է, թէ չի կրնար հանգիստ եւ անտարբեր դիտորդի կարգավիճակով հետեւիլ երկրին մէջ տեղի ունեցող ռազմաքաղաքական զարգացումներուն, քանի որ ամբողջ 17 տարի մաս կազմած է պետութեան եւ բանակի ստեղծման՝ Լեռնային Ղարաբաղի եւ Հայաստանի պաշտպանական գերատեսչութիւնները ստանձնելով:

<<Երբ երկրում կառավարման նոր համակարգ են փորձում ձեւաւորել՝ պայմանաւորուած սահմանադրական փոփոխութիւններով, ապա իւրաքանչիւր կարող ուժ՝ քաղաքացի, քաղաքական կուսակցութիւն, իրաւո՛ւնք ունի եւ պարտաւո՛ր է իր ներուժը ծառայեցնել այդ զարգացումներին: Տեղեկացնում եմ, որ նախարարական կարգավիճակին հրաժեշտ եմ տուել հանգիստ եւ առանց զգայական զեղումների, յետագայում մերժել եմ ինձ առաջարկուող բոլոր բարձր պաշտօնները, քանի որ ցանկանում եմ իմ փորձը, գիտելիքները եւ ջանքերը ինքնուրոյն ներդնել մեր պետութեան ներքաղաքական կեանքում փոփոխութիւնների հասնելու համար: Ես որոշում եմ կայացրել՝ ակտիւ մասնակցութիւն ունենալ քաղաքական եւ մասնաւորապէս ընտրական գործընթացներին՝ առաջնորդուելով <<յանուն>>ի գաղափարով՝ յանուն պետութեան անվտանգութեան, ազգային գաղափարների իրականացման>>, նշուած է Օհանեանի տարածած յայտարարութեան մէջ:

Ան աւելցուցած է, որ իրեն համար քաղաքական գործընթացներուն մաս կազմելու դիմում ներկայացնելը ինքնանպատակ չէ, այլ հայրենիքին ծառայելու նոր ինքնադրսեւորում: <<Քաղաքական կառավարման կայացած համակարգերում կարեւոր են տարբեր դիրքորոշումներն ու բազմակարծութիւնը, որոնք յետագայում հիմք են դառնում նոր վերադասաւորումների եւ վերախմբաւորումների. <<Եթէ չկայ երկրորդ կարծիք, ապա ինչի՞ց ընտրել լաւագոյնը>>: Ես կտրականապէս մերժում եմ, երբ քաղաքական գործիչների կարծիքների եւ տեսակէտների բախումը վերածւում է ծայրայեղ հակամարտութեան, փոխադարձ թշնամանքի եւ ատելութեան: Դէմ եմ, երբ այլակարծութիւնը դառնում է քաղաքական հետապնդումների, զրպարտութեան, հայհոյախօսութեան թատերաբեմ: Ընտրապայքար մտնող բոլոր քաղաքական ուժերը եւ գործիչները պարտաւոր են դրսեւորել միմեանց հանդէպ փոխադարձ յարգանք եւ զսպուածութիւն: Սահմանադրական փոփոխութիւններից յետոյ առաջիկայ խորհրդարանական ընտրութիւնների դերն ու նշանակութիւնը արմատապէս տարբերւում են միւսներից, քանի որ անցում է կատարուել պետական կառավարման խորհրդարանական համակարգին: Այսինքն՝ մեզ սպասւում են ոչ թէ սովորական ընտրութիւններ, այլ ընտրութիւններ, որոնք իրենց կարեւորութեամբ հաւասարազօր են մինչ այժմ տեղի ունեցած նախագահական ընտրութիւններին: Նախագահական եւ  Ազգային ժողովի ընտրութիւնները փոխարինուելու են մէկ՝ խորհրդարանական ընտրութեամբ, որի արդիւնքում ձեւաւորուելու է ինչպէս օրէնսդիր, այնպէս էլ գործադիր իշխանութիւնը>>:

Սէյրան Օհանեան յայտարարած է, որ կարեւոր նկատելով յառաջիկայ գործընթացները՝ սկսած է խորհրդակցութիւններու շարքի մը քաղաքական ուժերուն, հասարակական կառոյցներու, յայտնի գործիչներու եւ մտաւորականներու հետ:

<<Իմ նպատակն է ակտիւօրէն մասնակցել 2017ի խորհրդարանական ընտրութիւններին՝ ձեւաւորելով համախոհների թիմ, իսկ քաղաքական մասնակցութեան համար գտնել առաւել արդիւնաւէտ ձեւաչափ, որը հանրութեանը կը ներկայանայ իրատեսական ծրագրով՝ խնդիր ունենալով Հայաստանում ձեւաւորելու նոր որակի քաղաքական եւ տնտեսական համակարգ՝ նոր որակի կառավարմամբ: Ես իմ հետագայ գործունէութեան ընթացքում, ինչպէս նախկինում, մշտապէս կանգնած եմ լինելու իմ ժողովրդի, իմ ծառայակից եւ մարտական ընկերների, մտաւորականութեան, ուսանողութեան, սահմանին ապրող բնակիչների կողքին: Տեսակէտներս եւ մտահոգութիւններս հասարակութեանը առանց միջնորդների ներկայացնելու, միեւնոյն ժամանակ՝ յետադարձ կապով մարդկանց լսելու, քաղաքացիների տեսակէտներին ու մտահոգութիւններին անմիջապէս ծանօթանալու նպատակով որպէս միջոց կ՛օգտագործեմ նաեւ իմ նորաբաց ֆէյսբուքեան էջը, քանի որ տեղեկատուական աշխարհում համացանցը հասարակութեան հետ շփման լայն հնարաւորութիւններ է տալիս: Առաջիկայում ընտրական գործընթացների յայտնի ձեւաչափերում ես հանգամանօրէն կը ներկայացնեմ այն ծրագրերն ու դրոյթները, որոնցով առաջնորդուելու եմ իմ քաղաքական գործունէութեան ընթացքում>>, նշուած է յայտարարութեան մէջ: