29 յունուարին` Հայաստանի Հանրապետութեան հիմնադիր Արամ Մանուկեանի մահուան օրը, Արամի 9 հասցէին վրայ գտնուող անոր կիսաքանդ տան առջեւ տեղի ունեցած է ֆլեշմոպ` մշակոյթի նախարարութեան նախաձեռնութեամբ եւ Մնջախաղի թատրոնի ղեկավար Ժիրայր Դադասեանի գեղարուեստական մտայղացումով: Այս նախաձեռնութեան նպատակն էր հանրութեան ուշադրութիւնը սեւեռել Արամ Մանուկեանի տան ու պատմամշակութային այլ յուշարձաններու պահպանութեան հարցին վրայ` լուսարձակի տակ առնելով անոնց պահպանման եւ արժեւորման կարեւորութիւնը: Այս նախաձեռնութեան արձագանգած էին շատերը, բայց մշակոյթի նախարար Արմէն Ամիրեան ափսոսանքով նշած է, որ կ՛ակնկալէր, որ շատ աւելի մեծ թիւով երեւանցիներ մասնակից դառնային այս կարեւոր քայլին:

Տղաքն ու աղջիկները երգեցին, պարեցին, ներկայացուցին Արամ Մանուկեանի գործունէութիւնը եւ այն կարեւոր փաստերն ու դրուագները, որոնք կապուած են անոր տան հետ: Պահպանուող յուշարձաններու ցանկին մէջ ներառուած այս տան մէջ Արամ Մանուկեան բնակած է 1917-1919 թուականներուն:

Ֆլեշմոպը նկարահանուած է, որպէսզի տեսանիւթը տարածուի եւ հանրութեան ուշադրութիւնը հրաւիրուի Երեւանի պատմամշակութային յուշարձաններու եւ շինութիւններու պահպանութեան խնդիրին վրայ:

Նախարար Արմէն Ամիրեան լրագրողներուն հետ ունեցած զրոյցին ընթացքին յոյս յայտնած է, որ նմանօրինակ նախաձեռնութիւններ նպաստեն գաղափարի կայացման:

<<Շէնքը ներառուած է <<Հին Երեւան>> նախագիծին մէջ, որուն իրագործումէն ետք, կը կարծեմ, այս շէնքը կը դառնայ այնպէս, ինչպէս եղած էր նախապէս: Կարծիքներ կան, որ որոշ սենեակներ կարելի է թանգարան դարձնել, բայց կը կարծեմ` կենդանի շէնքը աւելի մեծ թանգարան է, քան թանգարան-շէնքը… կարեւորը վերակառուցելն է եւ շէնքին վերադարձնել այն մթնոլորտը, որ ունեցած է Առաջին հանրապետութեան տարիներուն>>, նկատել տուած է Արմէն Ամիրեան: Ան վստահեցուցած է, որ շէնքը պիտի չքանդուի, չի կրնար քանդուիլ, քանի որ օրէնքով պահպանուած է:

Լրագրողներուն հետ զրուցած է նաեւ ՀՅԴ Հայաստանի Գերագոյն մարմինի ներկայացուցիչ Աղուան Վարդանեան, որ ներկայ էր նախաձեռնութեան: Ըստ անոր, պետութիւնը արմատական լուծում պէտք է գտնէ շէնքը թէկուզ ներկայ վիճակով պահպանելու համար, մինչեւ որ անիկա վերականգնուի: Ի վերջոյ ժողովուրդի մը ներկան ու ապագան կ՛որոշուի իր մեծերուն նկատմամբ վերաբերումով:

<<Արամ Մանուկեան աւելի քան ոեւէ մէկը մեր անկախութեան, պետականութեան խորհրդանիշն է: Մենք այսօր Երեւանի մէջ Արամի գործին համարժէք ոչ մէկ յուշարձան ունինք, իսկ անոր տունն ալ այս վիճակին մէջ է: Ամբողջ հարցը այն է, որ խոստումը կայ, պայմանաւորուածութիւնը կայ, առնուազն բանաւոր եւ սեփականատիրոջ հետ, բայց տարիներ շարունակ գործը տեղէն չէ  շարժած եւ տարիներ շարունակ կը տեսնէք ինչ վիճակի մէջ յայտնուած է շէնքը>>, ըսած է Աղուան Վարդանեան: