ԼԻԼԻԹ ՄՈՒՐԱԴԵԱՆ

Վարչապետ Կարէն Կարապետեան աշխատանքային այց կատարած է Գիւմրի: Կառավարութեան ղեկավարը նախ եղած է Գիւմրիի <<Շիրակ>> օդակայան, ծանօթացած անոր ենթակառուցուածքային պայմաններուն եւ յառաջիկայ ներդրումային ծրագիրներուն: Օդակայանի կառավարիչ <<Արմէնիա միջազգային օդանաւակայաններ>> ընկերութիւնը ենթակառուցուածքներու բարելաւման նպատակով պիտի իրականացնէ շուրջ 10 միլիոն տոլարի ներդրումային ծրագիր, որուն երեք միլիոնը կը ներդրուի այս տարուան ընթացքին: Աշխատանքներ կը տարուին նոր, մատչելի գինով թռիչքներ տրամադրող օդանաւային ընկերութիւններու ներգրաւման ուղղութեամբ. այդ նպատակով Գիւմրիի օդակայանը սահմանած է ծառայութիւններու ցած գիներ, որոշ ծառայութիւններ նոյնիսկ կը մատուցուին անվճար:

Վարչապետին ներկայացուած է Գիւմրիի ածիկի (հացաբոյսերու չորցուած հատիկներ) արտադրութեան գործարանի կառուցման աշխատանքներուն ընթացքը: Գործարանի գործարկումով կը ստեղծուի 200 նոր աշխատատեղ, տարեկան տալով մինչեւ 18 հազար թոն արտադրանք, Հայաստանին ապահովելով բարձրորակ ածիկի անհրաժեշտ քանակը, նաեւ արտահանման հնարաւորութիւն ստեղծելով:

Վարչապետը այցելած է նաեւ <<Լոֆ>>չ ինքնազարգացման, հանգիստի եւ ժամանցի կեդրոն, որ իր դռները բացած էր այդ օր: Կարապետեան ծանօթացած է կեդրոնի պայմաններուն, շարժապատկերի, երաժշտութեան, քանդակագործութեան, արուեստի, արհեստի եւ խոհանոցային սրահներուն:

Այնուհետեւ Կարէն Կարապետեան շրջած է Գիւմրիի <<Կումայրի>> արգելոց-թանգարանի տարածքը, մասնաւորապէս անցած է Շիրազի, Ռուսթաւելի, Աբովեան փողոցներով, որոնց վրայ կը գտնուին են պատմամշակութային նշանակութիւն ունեցող շէնքեր, շինութիւններ:   Պետութիւն-մասնաւոր համագործակցութեամբ Շիրազի եւ Ռուսթաւելի փողոցներու պատմամշակութային արժէքներու վերականգնման եւ ենթակառուցուածքներու զարգացման ծրագիրի իրականացումը հնարաւորութիւն պիտի տայ խթանել Գիւմրիի տնտեսութիւնը եւ զբօսաշրջութիւնը: Ծրագիրի կեանքի կոչման նպատակով պիտի ստեղծուի յատուկ հիմնադրամ:

Կարէն Կարապետեան, անդրադառնալով միջոցներու վերադարձի հարցին՝ նշած է, որ <<որպէս նախկին բիզնեսմեն, ով բիզնեսում եղել է յաջողակ, ցանկանում եմ հաւաստիացնել, որ ներդրուած միջոցների յետվերադարձելիութիւնը լինելու է աւելի արագ, ներդրումային ֆոնդի առկայութիւնը չի սահմանափակելու բիզնեսմենների՝ որոշում կայացնելու ազատութեան աստիճանը>>:

Կառավարութեան ղեկավարը տեղեկացուցած է, որ Զբօսաշրջութեան պետական կոմիտէն ունի 55 միլիոն տոլարի ծրագիր, որ նախապէս վերաբաշխուած է ՀՀ տարբեր տարածաշրջաններու վրայ:

<<Մենք մտադիր ենք բանակցել եւ այդ ծրագրերի միջոցների որոշակի մասն ուղղել այս ներդրումային հիմնադրամ, ինչը նախատեսուած չէր: Ֆոնդի հիմնումը եւ այս փողոցների վերականգնումը կարեւորում ենք՝ որպէս բիզնես գործընթացների ակտիւացման կատալիզատոր եւ պետութիւնն իր բոլոր գործիքակազմերով, բիւջետային ու դրամաշնորհային հնարաւորութիւններով լինելու է այս հիմնադրամի կողքին>>, ընդգծած է Կարէն Կարապետեան:

Վարչապետը պատասխանատուներուն յանձնարարած է արագ աւարտին հասցնել ներդրումային հիմնադրամի ստեղծման աշխատանքները, միաժամանակ շարունակել ներդրողներու հետ համագործակցութիւնը՝ ծրագիրի իրականացման նպատակով:

<<ԱՐՄՌԱՏԻՕ>>