By Aztag Daily | Wednesday, 22 February 2017
Արցախի մէջ տեղի ունեցած է սահմանադրական փոփոխութիւններու հանրաքուէն. Արցախի բնակչութիւնը պիտի որոշէ կառավարման կիսանախագահական համակարգէն անցնիլ նախագահական համակարգի:
Արցախի Ազգային ժողովի ՀՅԴ խմբակցութեան ղեկավար Դաւիթ Իշխանեան <<Երկիր>>-ի հետ զրոյցի մը ընթացքին անգամ մը եւս հաստատեց ՀՅԴ-ի կարծիքը, որ իրենք դէմ են այդ սահմանադրական փոփոխութիւններուն եւ կողմնակից են, որ անցում կատարուի կառավարման խորհրդարանական համակարգին:
Ան անհասկնալի նկատեց այն պնդումները, թէ քանի որ Արցախը կը գտնուի պատերազմական իրավիճակի մէջ, ապա պէտք է ունենայ կառավարման նախագահական համակարգ: <<Սահմանադրական բարեփոխումներու ներկայացուած նախագիծը կը փորձեն կապել պատերազմող Արցախի հետ եւ անհրաժեշտութիւն կը նկատեն նախագահական կառավարման համակակարգը: Ասիկա տեսակ մը անհասկնալի է. արդե՞օք Հայաստանի Հանրապետութիւնը այդ նոյն պատերազմական իրավիճակին մէջ չէ, իսկ Հայաստանի մէջ ընդունուեցաւ կառավարման խորհրդարանական համակարգը: Արդէն իսկ ինչ որ տեղ անհասկնալի եւ չբացատրուող կէտեր կան>>, ըսաւ Իշխանեան, ապա աւելցուց. <<Դաշնակցութեան տեսակէտը նոյնն է եւ նոյնն ալ կը մնայ: Ժամանակը ցոյց կու տայ, թէ որքանո՛վ ճիշդ էր ՀՅԴ-ի որդեգրած գիծը>>:
Դ. Իշխանեան նշեց, որ ժամը 12:00-ի դրութեամբ Կեդրոնական ընտրական յանձնախումբը տուած է պաշտօնական տեղեկատուութիւն, որ կայ մօտաւոր 18 առ հարիւր մասնակցութիւն: <<Յատուկ աղաղակող երեւոյթներ չկան: Մենք մնայուն կապի մէջ ենք շրջանային մեր ընտրական գրասենեակներուն, ընտրական յանձնախումբի մեր անդամներուն հետ. որեւէ յատուկ մտահոգող փաստեր, գոնէ այժմ, չկան>>, ըսաւ ան:
Ըստ Իշխանեանի, շատ կարեւոր են դիտորդական առաքելութեամբ Արցախի մէջ գտնուող տարբեր երկիրներու ներկայացուցիչներու տեսակէտները, որոնք հանրաքուէի արդիւնքներէն ետք պիտի ներկայացուին: <<Նախքան այդ տեսակէտներուն հրապարակումը` արդէն իսկ անոնց ներկայութեան փաստը պիտի արձանագրենք, որ շատ կարեւոր է յատկապէս վերջին շաբաթներուն` Ալեքսանտր Լափշինի հետ տեղի ունեցած դէպքին առնչութեամբ>>, ըսաւ ան, ապա աւելցուց. <<Դիտորդական առաքելութեամբ Արցախ գտնուող տարբեր երկիրներու ներկայացուցիչները անգամ մը եւս իրենց պատկերացումները, իրենց համոզումները պիտի յստակեցնեն անկախ Արցախի Հանրապետութեան ներկային, ինչու չէ` նաեւ ապագային մասին>>:
comments
«Մաքրոն 9-10 Սեպտեմբերին Պիտի Այցելէ Երեւան Եւ Պաքու» Կ՛ըսէ «Ալֆա Նիուզ»-ի Աղբիւրը
Արցախի Ազգային Ժողովի 4 Խմբակցութիւններ Նախագահի Թեկնածու Առաջադրած Են Սամուէլ Շահրամանեանը
Երեւան-Պաքու Լարուածութիւնը Մագլցում Կ՛արձանագրէ
Ատրպէյճանի Կողմէ Առեւանգուած Երեք Ուսանողները Վերադարձուեցան Հայկական Կողմին
Մաքրոն Մտադիր Է Դիւանագիտական Նոր Նախաձեռնութեան Սկսելով Ուժեղացնել Պաքուի Վրայ Ճնշումը
Ազրպէյճանցիները Բերձորի Միջանցքի Անցակէտին Վրայ Կ՛առեւանգեն Երեք Արցախցի Երիտասարդներ
Ստեփանակերտը Կը Հերքէ Լուրերը Աղտամի Ճանապարհի Վերաբերեալ Որոշում Տալու Մասին