Հայ Յեղափոխական Դաշնակցութիւնը գումարել է հանդիսաւոր հաւաք՝ ազդարարելով քարոզարշաւի մեկնարկը։ Քարոզարշաւի մեկնարկի միջոցառմանը ներկայ են ՀՅԴ համապետական և վարկանիշային թեկնածուները: Ներկայացնում ենք ՀՅԴ ԳՄ ներկայացուցիչ, ՀՅԴ նախընտրական շտապի պետ Աղուան Վարդանեանի բացման խօսքը:

Հարգելի՛ բարեկամներ,

Սիրելի՛ ընկերներ,

Թանկագին լրագրողներ,

Դաշնակցութիւնը սկսում է նախընտրական քարոզարշաւը մեր պլատֆորմի ներկայացմամբ։ Որովհետեւ մենք, ի տարբերութիւն շատ-շատերի, գաղափարախօսութիւնն, ծրագիր, արժեհամակարգ, փորձառութիւն ունեցող կուսակցութիւն ենք։ Սկսում ենք՝ ՙՙՆոր սկիզբ, արդար Հայաստան՚՚ կարգախօսով։ Մեզ համար արդարութիւնը հիմքերի հիմքն է։ Արդարութիւնը հայ ժողովրդի տեսակի, բնոյթի, էութեան մէջ է։ Արդար Հայաստանը, մեր ընկալմամբ, ազատ, ժողովրդավար, խաղաղ, ուժեղ, զարգացող, ինքիշխան, բարեկեցիկ, երիտասարդ, իրաւունքի Հայաստանն է։

Մենք դրան հասնելու ենք։ Մենք արդեն երկրում համակարգային, որակական փոփոխութիւնների նոր սկիզբ ենք դրել։ Մինչ ուրիշները խօսում են փոփոխութիւններից, մենք այդ փոփոխութիւններն անում ենք։

Հիմա ես Ձեզ մի քանի պարզ հարց ունեմ։

1. 1. Այս ընտրութիւններին, բացի Դաշնակցութիւնից, չորս դաշինք ու չորս կուսակցութիւն է մասնակցում։ Ուշադիր նայէք ու ասէք՝ արդյո՞ք այդ չորս կուսակցութիւնները դաշինքներ չեն՝ իրենց կազմով, խայտաբղետութեամբ, ներքին հակասութիւններով։ Արդյո՞ք միակ իրական կուսակցութիւնը Դաշնակցութիւնը չէ։
2. 2. Ուշադիր նայէք՝ մասնակից ուժերից ո՞րն է, որ մէկ անձի, մէկ առաջնորդի կուսակցութիւն չէ։
3. 3. Որ ուժն է, որ ներկայ է ոչ միայն Հայաստանում, այլեւ Արցախում ու աշխարհի 30-ից աւելի երկրներում եւ ամենուր հայկական շահերի պաշտպանութեան հարցում ազդեցութիւն ունի։
4. 4. Որ ուժն է, որ հետեւողական է, չի շեղուել իր սկզբունքներից, ամբոխավար չէ, մարմնաւորում է եւ՛ հայ զինուորին, եւ՛ աշխատաւորին, եւ՛ մտաւորականին։
5. 5. Որ ուժն է, որի ապագայ խմբակցութիւնը նոր Ազգային ժողովում բացառուած է, որ քայքայուի, տարբեր մասերի բաժանուի։

Խնդրում եմ՝ Ձեր մտքում պատասխանէք այս հարցերին, եւ ընտրութիւնը ակնյայտ կը դառնա։

Դաշնակցութիւնն է Ձեր կուսակցութիւնը։

Դաշնակցութեան գաղափարները յաղթելու են։

Յաղթելու է Հայաստանը։