2017-ի խորհրդարանական ընտրութիւններուն Հայ յեղափոխական դաշնակցութիւնը դարձաւ խորհրդարան անցած չորս քաղաքական ուժերէն մէկը: 6-րդ գումարման Ազգային Ժողովին մէջ  Դաշնակցութիւնը  կ՛ունենայ 7 պատգամաւորական տեղ:

Հաշուի առնելով նոր ընտրական օրէնսգիրքով նախատեսուած կարգը`  առաջին 4 իրաւագիրները (խորհրդարանական աթոռ) ՀՅԴ-ի համապետական ցուցակի առաջին տեղերը զբաղեցնող թեկնածուներուն բաժին կ՛իյնան, իսկ միւս 3-ը կը ստանան առաւելագոյն քուէներ հաւաքած ընտրատարածքներու թեկնածուները:

Դաշնակցութիւնը ամէնէն շատ քուէներ ստացած է Շիրակի մարզը ընդգրկող 11-րդ ընտրատարածքին մէջ` 11.945 ձայն, Արմավիրի մարզը  ընդգրկող 6-րդ ընտրատարածքին մէջ` 11.110 ձայն, եւ Տաւուշի մարզը ընդգրկող 13-րդ ընտրատարածքին մէջ` 9.095 ձայն:

Այս ընտրատարածքներուն մէջ վարկանշային կարգով Դաշնակցութեան թեկնածուներէն  ամէնէն շատ ձայներ հաւաքած են Ռոմիկ Մանուկեան (11-րդ ընտրատարածք, Շիրակի մարզ)` 3.100 ձայն, Անդրանիկ Կարապետեան (6-րդ ընտրատարածք, Արմավիրի մարզ)` 2.972 ձայն, եւ  Սուրէն Մանուկեան (13-րդ ընտրատարածք), որ ստացած է 5.274  ձայն` դառնալով Դաշնակցութեան ամէնէն շատ քուէ ստացած վարկանշային թեկնածուն` բոլոր ընտրատարածքներու հաշուարկով:

Այս ընտրութիւններուն, Դաշնակցութիւնը կրցած է մօտ 20 հազար քուէներու աճ արձանագրել նախորդին հետ բաղդատած:  Եթէ 2012-ին ՀՅԴ-ի օգտին քուէարկած էր 85.550 քաղաքացի կամ քուէարկողներուն 5,67 առ հարիւրը, ապա  այս ընտրութիւններուն Դաշնակցութեան ձայն տուած է  103.173 քաղաքացի կամ քուէարկածներու 6,58 առ հարիւրը:

Իսկ թէ որո՛նք մաս պիտի կազմեն Ազգային ժողովի կուսակցական  խմբակցութեան, վերջնական որոշումը պիտի տայ ՀՅԴ-ի Հայաստանի Գերագոյն մարմինը: