Հայաստանի Հանրապետութեան տարածքային կառավարման եւ զարգացման նախարարութիւնը կը հաղորդէ, որ Հայաստանի տարածքային կառավարման եւ զարգացման նախարար Դաւիթ Լոքեան 26 ապրիլին  Հայաստանի Արագածոտնի մարզ  կատարած աշխատանքային այցելութեան ծիրին մէջ այցելած է Արտենի եւ Արագածաւան համայնքներ, հանդիպումներ ունեցած է նշեալ համայնքներու ղեկավարներուն հետ:

Արտենիի մէջ տեղի ունեցած է խորհրդակցութիւն համայնքային տարաբնոյթ խնդիրներու շուրջ: Նախարար Լոքեան գոհունակութեամբ ընդգծած է, որ Արտենին զարգացման լաւագոյն ծրագիրներ ներկայացուցած համայնքներու շարքին է:

Համայնքի ղեկավար Գեղամ Խլղաթեան նախարարին  ներկայացուցած է համայնքի ընթացիկ աշխատանքները, մասնաւորապէս անդրադարձած է <<Արթին ջուրերու արտադրութիւն համագործակցական>>-ի ընդլայնման ծրագիրին, որուն նպատակն է համայնքին մէջ զարգացնել գիւղատնտեսութիւնը, խթանել ձեռներէցութիւնը, բնակիչներուն համար ստեղծել բերքը մթերելու կարելիութիւն:   Ծրագիրին հանգամանօրէն ծանօթանալով` Դաւիթ Լոքեան անգամ մը եւս ընդգծած է, որ կառավարութեան նպատակն է նոր որակ հաղորդել տարածքային կառավարման եռաստիճան համակարգին` համայնք- մարզպետարան կառավարութիւն համագործակցութեան:

Արտենի եւ Արագածաւան համայնքներուն մէջ տեղի ունեցած խորհրդակցութեան ժամանակ եւս անդրադարձ կատարուած է  ջուրի եւ այլ հարցերու:

Դաւիթ Լոքեան այցելած է նաեւ համայնքներուն մէջ գործող նախադպրոցական հաստատութիւններ: Նախարարը գոհունակութիւն  յայտնած է յատկապէս Արագածաւանի մանկապարտէզին մէջ կատարուող աշխատանքներուն համար` նկատել տալով, որ կազմակերպչական եւ դաստիարակչական լաւ փորձը կրնայ օրինակելի ըլլալ նաեւ այլ համայնքներու համար: