Հայ յեղափոխական դաշնակցութեան եւ Հայաստանի հանրապետական կուսակցութեան միջեւ համաձայնական կառավարութիւն կազմելու  վերաբերեալ բանակցութիւնները գրեթէ աւարտած են:

<<Ազատութիւն>> ձայնասփիւռի կայանին հետ զրոյցի մը ընթացքին այս մասին ըսած է ՀՅԴ Բիւրոյի քաղաքական ներկայացուցիչ Արմէն Ռուստամեան:

<<Նոր Ազգային ժողովի կանոնակարգը կը նախատեսէ, որ բաժնուին  կառավարող եւ ընդդիմադիր խմբակցութիւնները: Պահանջ կայ, որ պէտք է այս յստակութիւնը անպայման մտնէ, ինչ որ կ՛ենթադրէ նաեւ  յուշագիր ստորագրել, քաղաքական համաձայնագիր ստորագրելու մասին յուշագիր, որուն վրայ մենք կ՛աշխատինք>>, ըսած է Արմէն Ռուստամեան:

Պատասխանելով այն հարցումին, թէ ե՞րբ վերջնականապէս կ՛աւարտին բանակցութիւնները, Ռուստամեան ըսած է, թէ չի բացառուիր, որ այս շաբաթ  աւարտին:

<<Հաւանական է, որ քաղաքական համաձայնագիրը արդէն այս շաբաթ ստորագրուի: Մենք պատրաստ էինք ամէն պահու այդ ստորագրութիւնը կատարել, բայց կար Սահմանադրական դատարանի դիմումը>>, նշած է Ա. Ռուստամեան:

Նոր փաստաթուղթով, Ռուստամեանի փոխանցումով, կը դասաւորուի նաեւ քատրային քաղաքականութիւնը:

<<Մինչեւ հիմա նշանակումները եղած են անաչառ եւ ամբողջապէս հիմնաւոր ընտրութիւն կատարելու միջոցով>>, ըսած է ան:

Պատասխանելով այն հարցումին, թէ ճի՞շդ են արդեօք լուրերը, որ կը բանակցին մէկ նախարար եւս ունենալու հարցով, կ՛ուզե՞ն արդեօք մէկ նախարար եւս ունենալ, Արմէն Ռուստամեան նշեց. <<Ո՞վ չ՛ուզեր, որ աւելնան® Խնդիրը աւելիի կամ պակասի հարցը չէ: Կարեւոր է, որ համագործակցութեան մեքանիզմը գործէ եւ որոշումները տրուին` ձգտելով բոլոր հարցերուն մէջ համախոհութեան: Ասիկա գլխաւոր հարցն է: Նոր կառավարութեան գլխաւոր հարցերէն մէկը պէտք է ըլլայ ճիշդ կառուցուածքն ու գործունէութեան կարգի ամրագրումը>>:

Ռուստամեան ըսաւ, որ ՀՀԿ-ին հետ կը բանակցին ոլորտներու շուրջ, անձերու շուրջ, բայց քանի որ հանգուցալուծման տակաւին չեն հասած, փակագիծերը կարելի չէ բանալ: