ԵՐԵՒԱՆ - Քրէական շարք մը ծանր յանցագործութիւններու մէջ մեղադրուող Ժիրայր Սէֆիլեանի եւ <<Հիմնադիր խորհրդարան>>ի այլ անդամներու գործը ուղարկուած է դատարան:

Ըստ դատախազութեան՝ ընդդիմադիր գործիչը 2015ի Նոյեմբերին կազմած ու ղեկավարած է զինուած խումբ մը՝ նպատակ ունենալով զէնքով քաղաքացիներու եւ զինծառայողներու կեանքին նկատմամբ վտանգաւոր բռնութեամբ, շէնքեր, շինութիւններ գրաւելու միջոցով՝ պետութեան որոշ գործողութիւններ հարկադրել:

Համաձայն մեղադրանքին՝ Ժիրայր Սէֆիլեան նշուած ենթախումբի անդամներուն տրամադրած է AK-74 տեսակի երկու ինքնաձիգ՝ 120 փամփուշտներով, զորս, բացայայտումէն խուսափելու նպատակով, ենթախումբի անդամները պարբերաբար տեղափոխած եւ պահած են տարբեր վայրերու մէջ, սպասելով գրոհի վերաբերեալ Ժիրայր Սէֆիլեանի հրահանգին:

Հիմնադիր խորհրդարանի առաջնորդին փաստաբանը՝ Տիգրան Հայրապետեան, առաջադրուած մեղադրանքները անհեթեթութիւն կ՛որակէ. <<Այստեղ մեղադրանք չկայ: Այս մեղադրանքը կը հաստատէ, որ Հայաստանի մէջ անձը պէտք չէ զբաղի ընդդիմադիր քաղաքական գործունէութեամբ>>:

Դատախազութեան հաղորդագրութեան համաձայն՝ յանցագործութիւնը չէ կատարուած Ժիրայր Սէֆիլեանի կամքէն անկախ, քանի որ իրաւապահները յայտնաբերած են հրազէնն ու ռազմամթերքը:

Մեղադրանքին մէջ կը նշուի նաեւ, որ 2016ի քառօրեայ պատերազմին, հայկական կողմի զոհերու հանգամանքով պայմանաւորուած՝ ենթախումբի անդամները հրաժարած են մասնակցիլ Սէֆիլեանի ծրագրած զինծառայողներու կեանքին վտանգ հանդիսացող զինուած յարձակման մասնակցելէ:

Փաստաբանը այս մէկուն ալ համաձայն չէ. <<Ճիշդ հակառակը ըսած է: Յովհաննէս Պետրոսեան հետեւեալ հարցը ուղղած է Ժիրայր Սէֆիլեանին. <<Ժիրայր, դուն կ՛ըսէիր, որ մենք յեղափոխութիւն պիտի ընենք, ինչո՞ւ ժողովուրդին տարիր ետեւէդ ու յեղափոխութիւն չըրիր… Հետեւաբար ես քեզի չեմ հաւատար>>: Այսինքն, Յովհաննէս Պետրոսեան ընդունած է, որ ինք յեղափոխութիւն կատարող անձ է, եւ ինք չէ հրաժարած, սպասած է հրամանի: Ապա մեղադրած է Ժիրայրը, որովհետեւ այդ հրամանը չէ տուած>>:

Ըստ Տիգրան Հայրապետեանի՝ պաշտպանական կողմին համար ընդհանրապէս անհասկնալի է, թէ զինծառայողներու կեանքին վտանգ հանդիսացող զինուած ի՞նչ յարձակման մասին է խօսքը: