ԵՐԵՒԱՆ - <<Իւրաքանչիւր պաշտօնեայ գիտէ, որ յաւերժական պաշտօնեայ գոյութիւն չունի>>. Ուրբաթ օր խորհրդարանին մէջ լրագրողներու ըսաւ ՀՅԴ Բիւրոյի քաղաքական ներկայացուցիչ, ՀՅԴ խմբակցութեան ղեկավար Արմէն Ռուստամեան՝ անդրադառնալով Շիրակի դաշնակցական մարզպետը մէկ այլ դաշնակցականով փոխարինելու հարցին: <<Կուսակցութիւնը կրնայ որոշել, թէ ո՛ր անձը ուր պէտք է աշխատի: Ոչ մէկ արտառոց բան կատարուած է այդտեղ>>, ըսաւ ան:

Անդրադառնալով կառավարութեան եւ վարչապետին մասին հարցերուն՝ Ռուստամեան ըսաւ, որ չի կրնար խօսիլ այն մասին, թէ ո՛վ պիտի ըլլայ վարչապետ 5 տարի ետք, կամ՝ արդեօք Կարէն Կարապետեանը պիտի ըլլա՞յ վարչապետ եւս 5 տարի:

Արձագանգելով այն դիտարկումին, որ նախագահ Սերժ Սարգսեան կ՛ըսէ, թէ վարչապետը պիտի շարունակէ պաշտօնավարել, եւ պատճառ չկայ, որ ան հրաժարական տայ՝ պատգամաւորը ըսաւ. <<Մենք կը խօսինք այս կառավարութեան մասին: 5 տարի ետք ի՞նչ կ՛ըլլայ, յայտնի չէ>>:

Պատասխանելով այն հարցումին, թէ այս քանի մը ամիսներուն ընթացքին շօշափելի արդիւնքներ տեսա՞ծ է, թէ իրենց ուժն ալ վստահութեան քուէ  կու տայ գործող կառավարութեան, Ռուստամեան ըսաւ. <<Կառավարութեան փոխարէն հաշուետուութիւն չեմ կրնար տալ, բայց կառավարութիւնը բաւական լուրջ քայլեր կատարած է: Վստահաբար, մենք ատիկա տեսած ենք: Եթէ չտեսնէինք, ապա ինչո՞ւ համաձայնական կառավարութիւն պիտի կազմէինք>>:

Ըստ Ռուստամեանի՝ քանի մը վայրկեաններու մէջ կարելի չէ  ներկայացնել, թէ ի՛նչ եղած են այդ փոփոխութիւնները:

Թէ զո՞վ կը տեսնէ վարչապետի պաշտօնին վրայ 2018էն ետք, Ռուստամեան պատասխանեց. <<Կու գայ 2018 թուականը, կը տեսնենք>>:

Դաշնակցական պատգամաւորը ընդգծեց նաեւ, որ իրենց մատնանշած կարգ մը խնդիրներ կառավարութիւնը լուծած է, եւ իրենք վստահութեան քուէ տալու առիթ ունին: