ԵՐԵՒԱՆ - <<Արմէնձրէս>>ը կը տեղեկացնէ, թէ Գունազարդ տօնը այս տարի տեղի ունեցաւ Յուլիս 16ին, Հանրապետութեան հրապարակին վրայ: Երեւանեան <<Գունազարդ վազք>>ին մասնակցեցան շուրջ 2000 անձեր: Ընդլայնուած էր մասնակիցներու աշխարհագրութիւնը. 2017ին առաջին անգամ ըլլլալով վազքին մասնակցեցան Չինաստանէն, Միացեալ Նահանգներէն եւ այլ երկիրներէ:

<<Այս տարի փոփոխութիւնները շատ են. առաջին անգամ զայն կ՛իրականացնենք Հանրապետութեան հրապարակին վրայ, ընդլայնուած են բարեգործական ծրագիրները, ինչպէս նաեւ շատցած է մասնակիցներու թիւը: Մասնակիցները տարբեր տարիքի են. կան մինչեւ 55 տարեկաններ, նոյնիսկ 14 տարեկանէն փոքր երեխաներ, որոնց մասնակցութիւնը նախօրօք համաձայնեցուցած ենք ծնողներուն հետ>>, յայտնեց նախագիծի հիմնադիր-նախագահ Ղազար Յակոբեան ու աւելցուցած, որ փորձած են միաւորուիլ մարդոց վազքին շուրջ եւ զարգացնել մարզական զբօսաշրջութիւնը:

Ըստ Յակոբեանի՝ մասնակիցներուն թիւը տարուէ տարի կ՛աճի, որ կը նշանակէ, թէ իսկապէս հետաքրքրութիւն կայ այս նախաձեռնութեան նկատմամբ:

Միլենա Խաչատրեան 2րդ տարին է որ կը մասնակցի <<Գունազարդ վազք>>ին, պարային խումբի ընկերներուն հետ: <<Հաճելի է տեսնել, որ մարդիկ այսքան աշխոյժ են: Կը կարծեմ մարզանքը շատ կարեւոր է: Ոգեւորիչ է նաեւ այն փաստը, որ հասոյթը պիտի ծախսուի բարեգործական նպատակով>>, ըսաւ ան:

Նախ կատարուեցաւ մասնակիցներու հաւաքագրումը, այնուհետեւ ֆիթնես-նախավարժանք, վազք եւ լաւագոյն 6 վազողներու պարգեւատրում: Վազքուղին 5 քմ. էր՝ Հանրապետութեան հրապարակէն Վազգէն Սարգսեան, Իտալիոյ, Պէյրութի, Ամիրեան փողոցներ, Մաշտոցի պողոտայ, Իսահակեան, Նալբանդեան փողոցներով մինչ Հանրապետութեան հրապարակ:

Յաղթող տղաներն են՝ Մելիքսէթ Կարապետեան, Անդրանիկ Մարգարեան եւ Մհեր Մաշումեան, իսկ աղջիկները՝ 3րդ՝ Էլեն Յովհաննիսեանն, 2րդ՝ Կարինէ Աւետիսեան, իսկ առաջինը՝  Սառա Ֆանթայն, Նիւ Եորքէն:

Սառան, նման վազքերու յաճախ մասնակցած է, բայց այս մէկը իր ամենասիրելին է: <<Հայաստանի մէջ առաջին անգամ կը վազէի եւ իսկապէս շատ զուարճացայ: Մասնակցելու համար խորհուրդ տուած էին գործընկերներս, որոնք մասնակցած էին նաեւ նախորդ տարի: Ինծի շատ հաճելի էր գոյները, մարդիկ: Յաջորդ տարի անպայման նորէն պիտի մասնակցիմ>>, յայտնեց Սառան:

Յաղթողներուն համար նուէրներ  պատրաստած էին նախաձեռնութեան հովանաւորները, իսկ Զբօսաշրջութեան պետական կոմիտէն նուիրեց զբօսաշրջութեան փաթեթ: Ատոր յաջորդեց երաժշտական հրավառութիւն: