ՍՏԵՓԱՆԱԿԵՐՏ - <<Երէկ հնարաւորութիւն ունեցայ կարճատեւ արձակուրդով Արցախ գտնուող Հայաստանի վարչապետ Կարէն Կարապետեանի հետ հարցազրոյց իրականացնելու՝ իմ թեկնածուական ատենախօսութեան համար>>, դիմատետրի իր էջին վրայ գրած է Արցախի Հանրապետութեան վարչապետի մամլոյ քարտուղար Արտակ Բեգլարեան:

<<Հաճելի եւ պատուաբեր էր հիւրընկալուիլ Աստղաշէն գիւղին մէջ գտնուող անոր պապենական տան մէջ, ուր այս օրերուն, Կ. Կարապետեան՝ իր հարազատներուն հետ միասին, կ՛անցընէ իր կարճատեւ արձակուրդը: Այնպիսի տրամադրող միջավայր էր, որ հարցազրոյցը արագօրէն վերածուեցաւ զրոյցի՝ տարբեր նիւթերու շուրջ՝ կառավարման մօտեցումներէն ու կրթութիւն-գիտութենէն մինչեւ ընկերային-հոգեբանութիւն եւ հայկական արդի հիմնահարցերը: Իբրեւ արդիւնք՝ ամրապնդուեցաւ անոր մասին հեռակայ կարծիքս՝ իբրեւ պարզ, անկեղծ, սրտացաւ ու խորաթափանց մարդուն մասին:

Ուրախալի է տեսնել, որ նման պաշտօնեայ մը իր արձակուրդը կ՛անցընէ Արցախի մէջ, յատկապէս՝ իր հայրենի գիւղին մէջ: Առաւել ուրախալի եւ ողջունելի էր, որ ան իր հանգիստը, վարչապետ Արայիկ Յարութիւնեանի հետ միասին կիսաաշխատանքային շրջագայութեան ելած է՝ ծանօթանալով Արցախի մէջ գործող զանազան ծրագիրներու: Աւելին՝ խորհրդանշական էին երկու վարչապետներուն այցը Թալիշ եւ նաւակով զբօսանքը սահմանամերձ Մատաղիսի ջրամբարին վրայ:

Մինչայդ, տեղեկացնեմ, որ երբ վարչապետները կը շրջագայէին սահմանամերձ գօտիներու այգիներուն մէջ, Կարէն Կարապետեանի ընտանիքին կողմէ խոստում եղաւ, որ անոնք այդ հատուածին մէջ պիտի հիմնեն շուրջ 200 հեկտար նուռի այգի: Ինծի համար ա՛յս է իրական հայրենասիրութիւնն ու սրտացաւութիւնը, երբ ճառ խօսելու փոխարէն կը գործես, ան ալ՝ խորհրդանշական տարածքներու վրայ խորհրդանշական ծառ տնկելու որոշումով>>, կը գրէ Արտակ Բեգլարեան: