ԵՐԵՒԱՆ, <<Երկիր>> - ՀՅԴ Բիւրոյի քաղաքական ներկայացուցիչ Արմէն Ռուստամեան մեկնաբանեց ԵԱՀԿ Մինսկի խումբի ամերիկացի՝ արդէն նախկին համանախագահ, Ռիչըրտ Հոկլընտի յայտարարութիւնը՝ կապուած Ղարաբաղեան հակամարտութեան հանգուցալուծման բանակցային կէտերուն:

<<Բնականաբար, ուժ ունեն եւ պէտք է հիմք ընդունուեն այն յայտարարութիւնները, որոնք կատարւում են ԵԱՀԿ Մինսկի խմբի համանախագահների կողմից համատեղ, այլ ոչ՝ առանձնաբար: Բացի այդ՝ պարոն Հոգլանդի յայտարարութեան մէջ որեւէ նոր բան, ըստ էութեան, չկար: Ուստի յատուկ մեկնաբանութեան անհրաժեշտութիւն էլ չի առաջանում:

Իսկ մեր մօտեցումներն էլ, բնականաբար, նոյնն են: Լինելով սկզբունքային՝ մեր տեսակէտներն էլ այդ յայտարարութիւնների հետ կապուած չեն կարող փոփոխուել: Ամէն դէպքում, առիթն օգտագործելով, մէկ անգամ եւս կը ցանկանայի կրկնել մեր՝ բազմիցս հրապարակած սկզբունքային մօտեցումը: Մեր մօտեցումը բխում է Արցախի ժողովրդի՝ Սահմանադրութեամբ ամրագրուած կամաարտայայտութիւնից, ըստ որի՝ հայկական կողմի որեւէ զիջման մասին խօսք չի կարող լինել, քանի դեռ Ադրբեջանը չի ճանաչել Արցախի Հանրապետութեան (այլ ոչ թէ ԼՂԻՄ ) անկախութիւնը, եւ չի վերականգնուել Արցախի Հանրապետութեան տարածքային ամբողջականութիւնը:

Միեւնոյն ժամանակ, Ադրբեջանի կողմից Մինսկի խմբի առաջարկների փաստացի մերժումը, վստահաբար, Հայաստանի համար ապահովում է բանակցային առաւելութիւններ, ինչը պէտք է պահպանել: Ի դէպ, բանակցային կարգաւորման գործընթացի եւ շփման գծում ներկայ իրավիճակի մասին առաւել խորքային քննարկումներ եւ գնահատականներ կը տրուեն Սեպտեմբերի 4ին՝ Արցախի անկախութեան հռչակման տարեդարձին նուիրուած մեր կողմից կազմակերպելիք խորհրդաժողովի ժամանակ>>, յայտարարեց Ռուստամեան: