ԵՐԵՒԱՆ.- Դէպի Հայաստան ներգնայ զբօսաշրջիկներուն թիւը 2017ի առաջին կիսամեակին ընթացքին կազմած է 622,381, որ 24.2 տոկոսով աւելի է նախորդ տարուան նոյն ժամանակաշրջանի ցուցանիշէն:

Ըստ Արմէնփրէս>>ի՝ Ուրբաթ, 25 Օգոստոսին տեղի ունեցած ասուլիսի ընթացքին Հայաստանի տնտեսական զարգացման եւ ներդրումներու նախարարութեան Զբօսաշրջութեան պետական կոմիտէի նախագահի առաջին տեղակալ Մեխակ Ապրեսեան յայտնեց, որ Հայաստանի մէջ զբօսաշրջութեան զարգացման էապէս կը նպաստեն նաեւ փառատօները: <<Հայաստանի զանազան մարզերու մէջ իրականացուող փառատօները ոչ միայն ինքն ըստ ինքեան հետաքրքրական զբօսաշրջութեան արդիւնք են, նաեւ հարթակ են, որպէսզի զբօսաշրջութեան միւս ձեւերը եւս զարգանան եւ ներկայացուած ըլլան այդ հարթակին մէջ>>, ըսաւ ան:

Ըստ Ապրեսեանի՝ Հայաստանի մէջ ներգնայ զբօսաշրջութեան աճ ապահովող հիմնական շուկաներն են՝ Ռուսիան, Վրաստանը, Իրանը եւ եւրոպական երկիրները: <<Այս տարի հետաքրքրական շաժում կայ Չինաստանէն, Ծոցի երկիրներէն եւ Ճափոնէն: Մեզ նոր կը բացայայտեն Քորէան եւ Ֆիլիբինները>>, բացատրեց Ապրեսեան։

Զբօսաշրջութեան պետական կոմիտէի նախագահի առաջին տեղակալը նշեց, որ վերջին տարիներուն մեծ է հետաքրքրուածութիւնը նաեւ Լատին Ամերիկայի երկիրներէն, ապա աւելցուց. <<Համաշխարհային շուկային մէջ դէպի Հայաստան այցերը տարուէ տարի կ՛աւելնան: Զբօսաշրջիկներուն 98 տոկոսը գոհ կը հեռանայ այստեղէն>>։

Մեխակ Ապրեսեան իր խօսքը եզրափակեց ըսելով, որ հայաստանցի զբօսաշրջիկները այս տարի եւս, իրենց հանգիստը, մեծ մասամբ, նախընտրած են անցընել ծով ունեցող երկիրներու մէջ։