Որոշակի շտկումներից յետոյ ՀՅԴ խմբակցութիւնը կողմ է լինելու <<Ընտանեկան բռնութեան կանխարգելման>> օրինագծի ընդունմանը, այս մասին յայտնել է ՀՀ Աժ ՀՅԴ խմբակցութեան քարտուղարը: Աղուան Վարդանեանի խօսքով՝ Դաշնակցութեան մէջ, շուրջը կարող են լինել այլ տեսակէտ ունեցողները, սակայն սա ՀՅԴի ընդհանրական տեսակէտն է:

<<Երկիրն Այսօրին>> տուած հարցազրոյցում Աղուան Վարդանեանը նշել է. <<Բուռն քննարկումները եւ այսքան հակասական տեսակէտները, նաեւ մեր հասարակութեան արժեհամակարգի, մեր հասարակութիւնում առկայ խնդիրների վկայութիւնն են: Բռնութեան ցանկացած դրսեւորում դատապարտելի է, յատկապէս եթէ այն տեղի է ունենում ընտանիքում: Եթէ մենք ընտանիքը համարում ենք հասարակութեան մոդել, հասարակութեան միջուկ, բնական է, որ ընտանեկան բռնութեան ծայրայեղ դրսեւորումները, իսկ ես համոզուած եմ, որ խօսքը ծայրայեղ դրսեւորումներ թոյլ չտալու մասին է,  դառնալու է հասարակութեան վաղուայ խնդիրը:

Այս առումով, ամբողջովին համաձայն եմ, որ նման օրէնքի անհրաժեշտութիւնը կայ: Օրինագիծը   շտկելով, յստակեցնելով եւ կանխարգելման ինստիտուտի ուժեղացմամբ  շատ կարեւոր է, որ  կարողանանք թոյլ չտալ, որպէսզի հասարակութեան մէջ նման խնդիրներ լինեն:

Յաճախ խօսում են աւանդական, ազգային մտածողութեան եւ այլնի մասին: Սակայն կայ ազգային մտածողութիւն եւ պսեւդոազգային (կեղծ ազգային-Խմբ.) մտածողութիւն: Ցաւօք, այս պսեւդոազգային մտածողութիւնը երբեմն դառնում է աւելի գերակշիռ, որը չի բխում, ոչ մեր աւանդական կերպարից, ոչ ազգային մտածողութիւնից, ոչ մեր աշխարհընկալումից:

Մենք, մեր ժողովուրդը, միշտ եղել է ամենաառաջադէմ հայեացքների կրողը, մենք ունեցել ենք Վերածննդի շրջան, բայց, ցաւօք, պետականութեան բացակայութիւնը, մեր միջավայրը, շրջապատը յաճախ մեզ բերել են այլ տեղեր: Այս առումով ես կարծում եմ, որ ընտանեկան բռնութեան կանխարգելումը, ընդհակառակը, բխում է մեր ազգային մտածողութիւնից: Արժեհամակարգի մասին, որ խօսում ենք, դա Մխիթար Գօշի արժեհամակարգն է, որ այն ժամանակ է դեռ այս խնդիրը դրել, Նարեկացու, Շնորհալու արժեհամակարգն է, ոչ թէ այսօրուայ ռաբիս երգիչներինը, կամ այդ տեսակ պսեւդոազգային մտածողութիւն ունեցողներինը: Ծայրայեղ դրսեւորումները պէտք է կանխարգելուեն, որպէսզի հասարակութիւնն  աւելի առողջ լինի:

Դաշնակցութեան համար արժէքային համակարգ գոյութիւն ունի, եւ պսեւդոազգայինը չէ դա: Եւ այս քննարկումների մէջ էլ ինձ համար մտածողութեան ճիշդ կերպը սրբազանի՝ Միքայէլ Աջապահեանի մտածողութիւնն է, մեր լաւագոյն մտաւորականներից մէկի՝ Ռուբէն Բաբայեանի մտածողութիւնն է: Այնպէս որ, որոշակի շտկումներից յետոյ, մեր խմբակցութիւնը կողմ է լինելու այս օրէնքի ընդունմանը, քանի որ մենք աշխարհի մաս ենք: Ես չգիտեմ՝ որեւէ իսլամական պետութիւն նման օրէնք ունի, թէ ոչ, բայց մենք այդ արժէքներով չենք առաջնորդւում: Կան հաշտ, համերաշխ ընտանքիներ եւ ընտանքիներ, որտեղ կան ծայրայեղ դրսեւորումներ, ինչը պէտք է կանխարգելել: Սա նաեւ ենթադրում է պետական տարբեր ինստիտուտների պրոֆեսիոնալ (արհեստավարժ-Խմբ.) մօտեցում: Մեր ազգային աւանդական ընտանքին սպառնացող որեւէ վտանգ չեմ տեսնում>>։