By Aztag Daily | Monday, 23 October 2017
Շաբաթ, 21 հոկտեմբերին նախագահ Սերժ Սարգսեան հրաւիրած է խորհրդակցութեան` 2018-ին Հայաստանի մէջ տեղի ունենալիք երեք մեծ իրադարձութիւններու` Ֆրանսախօս երկիրներու վեհաժողովի, Հայաստանի Հանրապետութեան եւ մայիսեան հերոսամարտերու 100-ամեակի եւ Երեւանի հիմնադրման 2800-ամեակի նախապատրաստական աշխատանքներու ընթացքը քննարկելու նպատակով:
Նշեալ իրադարձութիւններու նախապատրաստման աշխատանքները կազմակերպելու նպատակով հանրապետութեան նախագահին հրամանագիրներով նախապէս ստեղծուած են յանձնախումբեր, հաստատուած են անոնց անհատական կազմերը եւ այդ յանձնախումբերուն տրուած են յանձնարարականներ:
Խորհրդակցութեան սկիզբը նախագահ Սարգսեան ընդգծած է, որ երեք իրադարձութիւններն ալ յատուկ նշանակութիւն ունին եւ պէտք է անցնին անթերի` կազմակերպչական շատ բարձր մակարդակով: <<Ըստ էութեան, Ֆրանսախօս երկիրներու վեհաժողովը պիտի ըլլայ Հայաստանի անկախացումէն ետք մեծագոյն իրադարձութիւնը` աշխարհի Ֆրանսախօս երկիրներու ղեկավարներու, բարձրաստիճան բազմաթիւ պատուիրակութիւններու մասնակցութեամբ: Կ՛ենթադրուի, որ 100-է աւելի պատուիրակութիւններ եւ մինչեւ հինգ տասնեակ պետութիւններու ղեկավարներ պիտի մասնակցին վեհաժողովին: Ասիկա մեծ իրադարձութիւն է, որուն սահուն կազմակերպումը պէտք է վկայէ մեր պետական մարմիններու կայացած ըլլալուն>>, ըսած է հանրապետութեան նախագահը:
Երեւանի մէջ 11-12 հոկտեմբեր 2018-ին տեղի ունենալիք Ֆրանսախօս երկիրներու վեհաժողովի նախապատրաստման աշխատանքներու եւ անոնց վերաբերեալ նախագահին կողմէ տրուած յանձնարարականներու կատարման ընթացքին մասին զեկուցած է արտաքին գործոց նախարար, հանրապետութեան նախագահի հրամանագիրով ստեղծուած յանձնախումբի նախագահի տեղակալ Էդուարդ Նալբանդեան: Օրակարգի յաջորդ հարցին` Հայաստանի Հանրապետութեան եւ մայիսեան հերոսամարտերու 100-ամեակին նուիրուած ձեռնարկներու նախապատրաստական աշխատանքներուն ընթացքը զեկուցած է պաշտպանութեան նախարար, յոբելենական յանձնախումբի նախագահի տեղակալ Վիգէն Սարգսեան: Երեւանի քաղաքապետ, պետական յաջորդ յանձնախումբի նախագահի տեղակալ Տարօն Մարգարեան զեկուցած է Երեւանի հիմնադրութեան 2800-ամեակի յոբելենական ձեռնարկներու նախապատրաստական աշխատանքներուն մասին:
Հանրապետութեան նախագահը խորհրդակցութեան լոյսին տակ յանձնարարած է երկշաբաթեայ ժամկէտով ամփոփել շահագրգիռ մարմիններէն ստացուած բոլոր առաջարկները եւ ներկայացնել ձեռնարկներու մանրամասն ծրագիրները` կատարման պատասխանատուներով եւ ֆինանսական յստակ հաշուարկներով: Նախագահը տուած է նաեւ կազմակերպչական աշխատանքներուն հետ կապուած շարք մը յանձնարարականներ:
comments
«Մաքրոն 9-10 Սեպտեմբերին Պիտի Այցելէ Երեւան Եւ Պաքու» Կ՛ըսէ «Ալֆա Նիուզ»-ի Աղբիւրը
Արցախի Ազգային Ժողովի 4 Խմբակցութիւններ Նախագահի Թեկնածու Առաջադրած Են Սամուէլ Շահրամանեանը
Երեւան-Պաքու Լարուածութիւնը Մագլցում Կ՛արձանագրէ
Ատրպէյճանի Կողմէ Առեւանգուած Երեք Ուսանողները Վերադարձուեցան Հայկական Կողմին
Մաքրոն Մտադիր Է Դիւանագիտական Նոր Նախաձեռնութեան Սկսելով Ուժեղացնել Պաքուի Վրայ Ճնշումը
Ազրպէյճանցիները Բերձորի Միջանցքի Անցակէտին Վրայ Կ՛առեւանգեն Երեք Արցախցի Երիտասարդներ
Ստեփանակերտը Կը Հերքէ Լուրերը Աղտամի Ճանապարհի Վերաբերեալ Որոշում Տալու Մասին