«Արմէն Սարգսեանը Մեր Հանրութեանն Անծանօթ Անձնաւորութիւն Չէ»

By Asbarez | Tuesday, 06 February 2018

0206vahrambalayan

Վարեց՝ ՆԱԻՐԱ ՅՈՎՀԱՆՆԻՍԵԱՆ

 

Սերժ Սարգսեանը յայտարարեց ՀՀ նախագահի պաշտօնում ՀՀԿ թեկնածուի անունը: Ինչպէս եւ սպասելի էր՝ թեկնածուն նախկին վարչապետ, Մեծ Բրիտանիայում ՀՀ դեսպան Արմէն Սարգսեանն է: Սակայն վերջինս Սերժ Սարգսեանի հետ հանդիպման ժամանակ չի շտապել իր համաձայնութիւնը յայտնել՝ մտածելու ժամանակ խնդրելով: Արմէն Սարգսեանն իր խօսքում մասնաւորապէս նշել է. «Շատ կարեւոր է, որ որոշում ընդունելուց առաջ ես նոյնպէս առիթ ունենամ հանդիպել քաղաքական տարբեր ուժերին ե՛ւ Ազգային ժողովում, ե՛ւ Ազգային ժողովից դուրս՝ կուսակցութիւններին: Շատ կ՛ուզենայի հանդիպել նաեւ հանրութեան լայն շրջանակները ներկայացնող գիտական, մտաւորական, հասարակական, բարեգործական կազմակերպութիւններին, գործարար շրջանակներին, աշխատաւորական շրջանակներին: Իհարկէ, անպայման կ՛ուզէի հանդիպել Արցախի Հանրապետութեան ղեկավարութեանը եւ, իհարկէ, հանդիպել սփիւռքահայութեանը ներկայացնող կառոյցներին, կազմակերպութիւններին կամ անհատներին եւ դրանից յետոյ իմ որոշումը կայացնել»: Արդէն իսկ լայն շրջանակները քննարկում էին Արմէն Սարգսեանի հարցը: Եւ քանի որ վերջինս պատրաստակամութիւն է յայտնել հանդիպել նաեւ Արցախի ղեկավարութեան հետ, «Ժողովուրդ» օրաթերթը փորձեց վերջիններից պարզել նրանց վերաբերմունքն Արմէն Սարգսեանի հանդէպ: «Ժողովուրդ» օրաթերթի զրուցակիցն է Արցախի Ազգային ժողովի նախագահի տեղակալ Վահրամ Բալայեանը:

 

ՆԱԻՐԱ ՅՈՎՀԱՆՆԻՍԵԱՆ.- Պարո՛ն Բալայեան, երէկ յայտնի դարձաւ, որ ՀՀ նախագահի պաշտօնում ՀՀԿն առաջարկում է Արմէն Սարգսեանի թեկնածութիւնը: Ձեզ համար որքանո՞վ է ընդունելի Արմէն Սարգսեանը:

ՎԱՀՐԱՄ ԲԱԼԱՅԵԱՆ.- Նորմալ: Եթէ Հայաստանի Հանրապետութեան քաղաքացիների համար ընդունելի է, ապա մեզ համար էլ է ընդունելի: Ի՞նչ խնդիր կայ: ՀՀում կատարուող թէ՛ կադրային քաղաքականութիւնը, թէ փոփոխութիւնները եթէ ընդունելի են ՀՀի քաղաքական ուժի, հանրութեան կողմից, մենք որեւէ խնդիր չունենք:

 

ՆԱԻՐԱ ՅՈՎՀԱՆՆԻՍԵԱՆ.- Կը վստահէ՞ք ղարաբաղեան հակամարտութեան հետ կապուած ցանկացած հարց քննարկել նրա հետ:

ՎԱՀՐԱՄ ԲԱԼԱՅԵԱՆ.- Ինչո՞ւ ոչ: Յամենայնդէպս, Արմէն Սարգսեանը մեր հանրութեանն անծանօթ անձնաւորութիւն չէ: Երկար ժամանակ ներկայացնում էր Հայաստանի Հանրապետութիւնը Մեծ Բրիտանիայում, եւ կարծում եմ, որ խնդիր չի լինի:

 

ՆԱԻՐԱ ՅՈՎՀԱՆՆԻՍԵԱՆ.- Ըստ նոր Սահմանադրութեան՝ հէնց նա է ստորագրելու միջազգային պայմանագրերը, այդ թւում՝ Ղարաբաղին վերաբերող ցանկացած փաստաթուղթ: Դա է՞լ կը վստահէք նրան:

ՎԱՀՐԱՄ ԲԱԼԱՅԵԱՆ.- Գիտէք, կարող ենք վստահել: Բայց այստեղ նաեւ մի ուրիշ խնդիր կայ: Վերջիվերջոյ, Արցախի հետ կապուած հարցերում ՀՀ ղեկավարութիւնը մշտապէս յայտարարել է, որ վերջնական այդ հարցերը պէտք է վճռի Արցախը, այստեղի բնակչութիւնը: Կոնկրետ (յստակ-Խմբ.) Արցախի հետ կապուած առանձին մտահոգութեան հարց չկայ:

 

ՆԱԻՐԱ ՅՈՎՀԱՆՆԻՍԵԱՆ.- Նա իր խօսքում պատրաստակամութիւն է յայտնել նաեւ Արցախ այցելելու եւ ղեկավարութեան հետ հանդիպելու: Ի՞նչ հարցեր կը բարձրաձայնէք հանդիպմանը:

ՎԱՀՐԱՄ ԲԱԼԱՅԵԱՆ.- Ընդհանուր առմամբ Արցախի Հանրապետութեան եւ Հայաստանի Հանրապետութեան ղեկավարութեան շփումներում սերտ համագործակցութիւն կայ բոլոր ասպարէզներում: Քանի որ ես խորհրդարանում եմ, ասեմ, որ բաւականին լաւ գործնական յարաբերութիւններ են ստեղծուած: Դա նպատակուղղուած է թէ՛ արտաքին քաղաքականութեանը՝ Արցախի ճանաչմանը, թէ՛ ներքին հիմնախնդիրների լուծմանը: Այնպէս որ, դա ճիշդ կը լինի, որ իսկապէս ՀՀ նախագահը նաեւ լինի Արցախում, ծանօթանայ երկրի հիմնախնդիրներին: Վերջիվերջոյ, նաեւ իրար հետ աշխատելու ենք, եւ շատ նորմալ եմ գտնում դա:

 

ՆԱԻՐԱ ՅՈՎՀԱՆՆԻՍԵԱՆ.- Դուք ինքներդ ի՞նչ պահանջներ կը ներակայացնէք ՀՀ նախագահի թեկնածուին:

ՎԱՀՐԱՄ ԲԱԼԱՅԵԱՆ.- Բնականաբար մենք անպայման կը բարձրաձայնէք, եւ խօսք կը գնայ Արցախի Հանրապետութեան միջազգային ճանաչման հետ կապուած հարցերին: Այսօր այդ հարցերն առօրէական են: Եւ կը քննարկուի նման հարց՝ աւելի ակտիւացնելու տեսանկիւնից եւ Արմէն Սարգսեանի փորձը կամ դերը, հնարաւորութիւններն օգտագործելու տեսանկիւնից:

comments

Advertisement