facebook twitter links
June 23 2018 | 12:02pm AET

Անվտանգութեան Խորհուրդը՝ առանց Հայաստանի եւ Ազգային Ժողովի նախագահներուն

Source: Asbarez | Saturday, 10 March 2018
Email  |  Print 

0310NA

ԵՐԵՒԱՆ - Ազգային ժողովը 7 Մարտին, 8 դէմ 86 թեր ձայներով ընդունեց <<Անվտանգութեան խորհրդի կազմաւորման եւ գործունէութեան մասին>> օրէնքի նախագիծը, որ լուրջ քննադատութեան պատճառ դարձած էր:

Ըստ նախագիծի հիմնական փոփոխութեան՝ այսուհետեւ վարչապետն է, որ պիտի ղեկավարէ Անվտանգութեան խորհուրդը: Նախագիծի հիմնաւորման մէջ նշուած է, որ անիկա պայմանաւորուած է սահմանադրական փոփոխութիւններով: 2005ի սահմանադրութեան համաձայն՝ նախագահը կը կազմէ Ազգային անվտանգութեան խորհուրդ եւ կը նախագահէ անոր: Իսկ 2015ի սահմանադրական փոփոխութիւններով՝ հաստատուած են կառավարութեան վերաբերեալ նոր իրաւական կարգաւորումներ, որոնք պայմանաւորուած են խորհրդարանական համակարգի անցումով: Ազգային ժողովին կողմէ նախագիծին ընդունուիլը կը նշանակէ, որ նոր կարգաւորումները ուժի մէջ պիտի մտնեն 9 Ապրիլէն սկսեալ: Այսինքն այն օրը, երբ վերջ պիտի գտնէ Հայաստանի նախագահ Սերժ Սարգսեանի պաշտօնավարման շրջանը եւ ամենայն հաւանականութեամբ ան իր լիազօրութիւնները պիտի վերագտնէ որպէս վարչապետ:

Գործնականին մէջ, այս կը նշանակէ, որ Սերժ Սարգսեան պիտի շարունակէ ղեկավարել Հայաստանի առանցքային ոլորտները: Այսուհետեւ Անվտանգութեան խորհուրդին մաս չի կազմեր նաեւ Ազգային ժողովի նախագահը:

Յիշեցնենք, որ Հայաստանի Հանրապետական կուսակցութիւնը տակաւին պաշտօնապէս չէ յայտարարած, որ Սերժ Սարգսեանը վարչապետի իրենց թեկնածուն է, բայց ոչ պաշտօնապէս՝ այդ մասին կը խօսուի ամէն տեղ:

Աւելցնենք, որ Հայաստանի Հանրապետական կուսակցութեան բանբեր Էդուարդ Շարմազանով վերջերս յայտարարեց, որ կուսակցութիւնը 9 Ապրիլին՝ Սերժ Սարգսեանի պաշտօնավարման շրջանի աւարտին յաջորդող շաբաթուան ընթացքին պիտի ընտրէ ու առաջադրէ վարչապետի իր թեկնածուն:

Միւս կողմէ, Հայաստանի Ազգային ժողովի օրակարգին վրայ գտնուող <<Կառավարութեան կառուցուածքի եւ գործունէութեան մասին>> եւ կից ներկայացուած օրէնքներու նախագիծերու ծրարի քննարկման ընթացքին, Արդարադատութեան նախարար Դաւիթ Յարութիւնեան նշեց, որ համաձայն նախագիծին՝ կառավարութեան կազմը պիտի բաղկանայ վարչապետէ, առաջին փոխվարչապետէն, երկու փոխվարչապետերէ եւ 17 նախարարներէ:

 






More Headlines