ՀՅԴ Հայաստանի կազմակերպութեան 21րդ Գերագոյն ժողովը, քննելով Հայաստանի քաղաքական, սոցիալ-տնտեսական իրավիճակը, ներքին եւ արտաքին ճակատների վրայ առկայ մարտահրաւէրները՝ արձանագրում է.

Սահմանադրական փոփոխութիւններից բխող պետական կառավարման համակարգի փոփոխութիւնները եւ համապատասխան օրէնսդրական կարգաւորումները անհրաժեշտ նախադրեալներ են ստեղծել մեր պետականութեան կայուն զարգացման համար:

Հայաստանի եւ Արցախի Հանրապետութիւնների անվտանգութեան հիմնախնդիրը շարունակում է մնալ հիմնական օրակարգ եւ թելադրում է առաջնահերթ ռազմավարութիւնները պետական եւ հանրային կեանքի տարբեր ասպարէզներում:

ԵԱՏՄ եւ ԵՄ հետ գործընկերային յարաբերութիւնների համադրմամբ բարենպաստ միջավայր է ստեղծուել բազմավեկտոր, փոխլրացնող արտաքին քաղաքականութիւն իրականացնելու, քաղաքական եւ տնտեսական բարեփոխումները արդիւնաւորելու համար:

Առ այդ, առաջիկայ երկամեայ ժամանակաշրջանի համար ՀՅԴ Հայաստանի Գերագոյն ժողովը առաջնահերթ է համարում՝

– Իրաւունքի գերակայութեան սկզբունքների լիարժէք իրացումը երաշխաւորող մարդու իրաւունքների ու ազատութիւնների ապահովման համակարգի ձեւաւորումը,

– Կայուն զարգացում ապահովող սոցիալական շուկայական տնտեսական համակարգի ձեւաւորումը, սոցիալական արդարութեան սկզբունքների պահպանման գործում պետութեան առաջնային դերակատարութեան ստանձնումը եւ նոր աշխատատեղերի ու ե-կամտաստեղծ գործունէութեան խթանումը,

– Հանրային կեանքի բոլոր ո-լորտներում համակարգային եւ որակական փոփոխութիւնների իրականացումը, իշխանութեան մարմինների թափանցիկ, հաշուետու եւ արդիւնաւէտ աշխատանքը, հակակոռուպցիոն քաղաքականութեան ակտիւացումը,

– Հասարակութեան մէջ պետութեան եւ ապագայի հանդէպ վստահութեան հիմքերի ստեղծումը,

– Երկրի առաջանցիկ զարգացման ռազմավարական տեսլականի մշակումը եւ դրանից բխող ծրագրերի իրագործումը,

– <<Ազգ-բանակ>> հայեցակարգի ամբողջական գործադրման եւ ռազմաարդիւնաբերական համակարգի զարգացման նախադրեալների ստեղծմանն աջակցումը,

– Ակտիւ ժողովրդագրական քաղաքականութեան իրականացման ուղղութեամբ թիրախաւորուած ու գործուն քայլերի ձեռնարկումը եւ արտագաղթի կասեցումը:

Մեկնելով այս հաստատումներից եւ առաջնահերթութիւններից‘ Հայաստանի առաջին հանրապետութեան 100ամեակի շեմին ՀՅԴ Հայաստանի կազմակերպութիւնը վերահաստատում է իր կամքն ու վճռականութիւնը հետեւողական եւ ամէնօրեայ աշխատանքով նպաստելու մեր պետականութեան յետագայ զարգացմանը, մեր ժողովրդի անվտանգ եւ արժանապատիւ կեանքի պայմանների ապահովմանը: