Արամ Ա. Մեծի Տանն Կիլիկիոյ կաթողիկոսը 20 Ապրիլի առաւօտեան քանի մը ժամով մեկնեցաւ Հայաստան: Այս մասին կը տեղեկացնէ Մեծի Տանն Կիլիկիոյ կաթողիկոսարանի մամլոյ դիւանը:

Կը նշուի, որ ան նոյն օրը պիտի վերադառնայ Անթիլիասի Մայրավանք:

Պէյրութի օդակայանին մէջ Cilicia TV-ի խնդրանքով՝ անդրադառնալով հայաստանեան վերջին իրադարձութիւններուն՝ վեհափառ հայրապետը ըսաւ. <<Այս օրերուն Երեւանի մէջ տեղի ունեցող ցոյցերը բնականաբար ընդվզումի արտայայտութիւն են, սակայն ինչ ալ ըլլան ընդվզումներու պատճառը, արտօնելի չէ, ներելի չէ, որ հայու արիւն հոսի հայրենի սրբազան հողին վրայ: Արտօնելի չէ, ներելի չէ, որ մեր ոստիկաններուն ու երիտասարդներուն միջեւ բախումներ տեղի ունենան՝ երբեմն ոստիկաննները մղելով ձերբակալութիւններու: Բոլորն ալ մեր սիրելի զաւակներն են: Ինչպէս մեր բոլոր ընկերութիւններու կեանքի մէջ, նաեւ հայրենի մեր ժողովրդի կեանքին մէջգոյութիւն ունին լուրջ հարցեր եւ լուրջ մտահոգութիւններ, որոնք մեր զաւակները երբեմն կը մղեն բողոքի ու պոռտկումի:

<<Անհրաժեշտ է, սակայն, որ հարցերն ու մտահոգութիւնները քննուին եւ լուծման ուղիներ որոնուին միասնաբար, նախագահին հովանաւորութեամբ եւ մեր ժողովուրդը ներկայացնող բոլոր ուժերուն միասնական ճիգով եւ թօթափած սիրոյ ու հասկացողութեան ոգիով: Այս է հարցերը լուծման առաջնորդող ճիշդ ու ապահով ճանբան: Այս է մեր սպասումը հայրենի մեր իշխանութիւնէն, ինչպէս նաեւ հայրենի մեր ժողովուրդի սիրելի զաւակներէն:

Կ՛աղօթեմ առ Աստուած, որ իր երկնային հովանիին ներքեւ անվնաս պահէ ու պաշտպանէ մեր սիրելի հայրենիքը:

Կ՛աղօթեմ առ Աստուած, որ իր երկնային շնորհքներով ու բարիքներով ծաղկեցնէ մեր ժողովուրդի կեանքը ի Հայաստան, Արցախ եւ ի սփիւռս աշխարհի>>: