Դաշնակցութիւնը դուրս եկաւ Հանրապետական Կուսակցութեան հետ դաշինքէն

By Asbarez | Wednesday, 25 April 2018

ԵՐԵՒԱՆ - ՀՅԴ Գերագոյն մարմինը հանդէս եկաւ յայտարարութեամբ՝ յայտնելով Հանրապետական կուսակցութեան հետ դաշինքէն դուրս գալու իր ոորշումը:

Ստորեւ կը հրապարակենք սոյն յայտարարութիւնը.

Ժողովրդային շարժման արդիւնքում Հայաստանում ստեղծուել է մի իրավիճակ, որն արդէն օրեր շարունակ լարուածութեան մէջ է պահում ողջ հասարակութեանը:

Բարեբախտաբար, մինչ այս պահը հնարաւոր է եղել խուսափել իրավիճակի հանգուցալուծման վատթարագոյն տարբերակներից: Անցնող օրերի ընթացքում ՀՅ Դաշնակցութիւնը հետեւողական ջանքեր է գործադրել համախոհութեան ձեւաւորման, երկխօսութեան միջոցով երկրի ու ժողովրդի շահերից բխող ընդունելի եւ ողջամիտ լուծում գտնելու ուղղութեամբ:

Այսպէս սակայն երկար չի կարող շարունակուել: Կարող են առաջանալ լուրջ մարտահրաւէրներ: Համոզուած ենք, որ ստեղծուած իրավիճակը պէտք է հանգուցալուծուի բացառապէս սահմանադրականութեան եւ օրէնքների շրջանակներում:

Հաշուի առնելով առկայ իրավիճակը` յայտարարում ենք քաղաքական կոալիցիային մեր մասնակցութեան դադարեցման մասին:

Առ այդ, Ազգային ժողովը պէտք է ընտրի ժողովրդի վստահութիւնը վայելող վարչապետ, որի ձեւաւորած կառավարութեան մշակած` պետութեան ներքին եւ արտաքին քաղաքականութիւնը ներառող ծրագիրը պէտք է նպատակ հետապնդի`

այ) լիցքաթափել ներքաղաքական լարուածութիւնը,

բ) յաղթահարել քաղաքական ճգնաժամը,

գ) յստակ առաջնահերթութիւններ նախանշելով երաշխաւորել կուտակուած խնդիրների լուծումը,

դ) լիարժէք ժողովրդավարական պայմանների ապահովմամբ նախապատրաստել եւ անցկացնել արտահերթ խորհրդարանական ընտրութիւններ:

25 Ապրիլ 2018թ.

comments