ԵՐԵՒԱՆ - Հայաստանի Ազգային ժողովի նախագահ Արա Բաբլոյեան Հինգշաբթի, 3 Մայիսին, հանդէս եկաւ յայտարարութեամբ մը, որուն մէջ նշեց, որ Ազգային ժողովի պատգամաւոր, ՀՅԴ խմբակցութեան անդամ Աղուան Վարդանեան 3 Մայիսին հրաժարականի դիմում ներկայացուցած է:

Յիշեցնենք, որ Ազգային ժողովի ՀՅԴ խմբակցութեան քարտուղար Աղուան Վարդանեան 1 Մայիսին, խորհրդարանին մէջ վարչապետի ընտրութեան համար հրաւիրուած յատուկ նիստին ընթացքին յայտարարեց, որ պիտի չմասնակցի վարչապետի պաշտօնին Նիկոլ Փաշինեանի ընտրութեան քուէարկութեան: Վարդանեան ընդգծեց, որ կը ներկայացնէ կուսակցութիւն մը եւ խմբակցութիւն մը, որ կողմ քուէարկելու որոշում ունի, ուստի պատրաստ է վար դնելու իր լիազօրութիւնը, եթէ կուսակցութիւնը այդպէս պահանջէ:

ՀՅԴ Հայաստանի Գերագոյն մարմինը նոյն օրը յայտարարութիւն տարածեց, որ Աղուան Վարդանեանի հնչեցուցած տեսակէտը անձնական որոշում է եւ չի համապատասխաներ ՀՅԴի պաշտօնական դիրքորոշման: <<Կատարուեց կարգապահական կոպիտ խախտում, որ կը դառնայ քննութեան նիւթ: Ըստ այդմ, ՀՅԴ Հայաստանի ԳՄն պահանջում է Աղուան Վարդանեանից՝ վաղաժամ վար դնել պատգամաւորական իրաւագիրը>>, ըսուած էր ՀՅԴ Գերագոյն մարմինի յայտարարութեան մէջ:

Հինգշաբթի օր, լրագրողներու հետ զրուցելով, Աղուան Վարդանեան անդրադարձաւ իր քայլին:

<<Ես իմ ելոյթի ժամանակ յայտարարել էի, որ եթէ կուսակցութիւնը ցանկանայ, ես պատրաստ եմ վայր դնել իմ մանդատը, ինչն այսօր արդէն արել եմ>>, ըսաւ Աղուան Վարդանեան։ Վերջին իրադարձութիւններուն հանդէպ իր վերաբերմունքին մասին խօսելով ան ըսաւ. <<Այդ մասին իմ ելոյթում ամէն ինչ ասուած է>>:

Լրագրողներէն մէկուն յիշեցման, թէ <<ձեզ սկսեցին մեղադրել, որ ժողովրդի հետ չէք>>, Վարդանեան պատասխանեց. <<Ժողովուրդը նաեւ ես եմ>>:

Վարդանեան <<զառանցանք>> որակեց մամուլի այն հրապարակումները, ըստ որոնց՝ իր դէմ կատարուած են սպառնալիքներ՝ բացայայտելու <<յանցանքներ>>, որոնք կը վերաբերին անոր ընկերային ապահովութեան նախարարի պաշտօնը վարած տարիներուն:

<<Այդ զառանցանքները վաղուց հերքուել են>>, արձագանգեց Աղուան Վարդանեան:

Պատասխանելով <<ինչով պիտի զբաղուիք այժմ>> հարցումին՝ Վարդանեան պատասխանեց. <<Զբաղուելու եմ Աղուան Վարդանեանի բուռն գործունէութեամբ>>: