ՀՅԴ Հայաստանի Գերագոյն մարմինը կը յայտնէ, որ քննելով ընկեր Աղուան Վարդանեանի կարգապահական հարցը, որոշած է զայն հեռացնել ՀՅԴ շարքերէն:

ՀՅԴ Գերագոյն մարմինի ներկայացուցիչ Արսէն Համբարձումեան, մեկնաբանելով Վարդանեանի հեռացման որոշումը՝ յայտնեց.

<<Այո՛, ՀՅԴ Հայաստանի ԳՄն կարգապահական տնօրինում է կատարել՝ Աղուան Վարդանեանին հեռացնելով կուսակցութեան շարքերից, իսկ աւելի վաղ, ինչպէս գիտէք, պահանջել էինք վայր դնել պատգամաւորական մանդատը: Անժխտելի է, որ Աղուան Վարդանեանը երկար տարիներ մեծ ներդրում եւ դերակատարութիւն է ունեցել ՀՅԴ Հայաստանի կազմակերպական կառոյցում, սակայն Դաշնակցութիւնն ունի սկզբունքներ, աւանդոյթներ եւ կազմակերպական կանոններ, որոնք չեն կարող շրջանցել ոչ մէկի:

Դաշնակցութեան լինելիութեան եւ կենսունակութեան գաղտնիքներից մէկը կարգապահութիւնն է: Կարծիքների, տեսակէտների քննարկումներն աւարտւում են, երբ այլեւս կայ որոշում: Մարդկայնօրէն մեծ ցաւ եմ ապրում, որ Աղուան Վարդանեանն իր փորձառութեամբ նման քայլ կատարեց: Լաւ ճանաչելով նրան, կարծում եմ, որ ելոյթի ժամանակ ներկայացուած հիմնաւորումները բխում էին իր համոզումներից: Բայց հրամայական մանդատով պատգամաւորի կաշկանդուած չլինելու հանգամանքը ինքնին չի կարող արդարացնել դրսեւորուած վարքագիծը: Կարծում եմ՝ Աղուան Վարդանեան մտաւորականն ու քաղաքական գործիչը ձեւ ու եղանակ կը գտնի իր փորձով ու գիտելիքներով այսուհետ եւս ծառայելու մեր երկրին ու ժողովրդին>>:

<<Երկիր Մեդիա>>ի լրագրողը Արսէն Համբարձումեանէն պարզաբանում խնդրեց <<Իրատես>> թերթին մէջ լոյս տեսած ակնարկի մը վերաբերեալ. <<Այսօր <<Իրատես>> թերթում հրապարակում է եղել Աղուան Վարդանեանի դիրքորոշման հետ կապուած որոշ ներկուսակցական գործընթացների եւ մասնաւորապէս այն մասին, որ Աղուան Վարդանեանը նախապէս տեղեակ է պահել իր քայլի մասին>>, Համբարձումեան ըսաւ. <<Ծանօթ եմ հրապարակմանը եւ այդ կապակցութեամբ հարկ եմ համարում ասել հետեւեալը. Գերագոյն մարմինը եւ մարմնի որեւէ անդամ նախապէս տեղեակ չի եղել եւ մեզ համար Աղուան Վարդանեանի ելոյթն ու հրապարակային դիրքորոշումը, իրօք, անակնկալ է եղել: Որեւէ մէկին տեղեակ պահել է թէ ոչ՝ այս պարագայում նշանակութիւն չունի: Ինչ վերաբերում է միջանձնային յարաբերութիւններին՝ ուզում եմ ասել, որ Դաշնակցութեան մասին շատերը թիւր պատկերացում ունեն կամ փորձում են այդպիսի պատկերացում ստեղծել: Նախ, որեւէ մէկը չի կարող <<նշանակել>> Գերագոյն մարմին կամ ԳՄ ներկայացուցիչ: Ղեկավար մարմինները ընտրւում են ՀՅԴ Հայաստանի ամբողջ կազմակերպական կառոյցը ներկայացնող Գերագոյն ժողովի պատգամաւորների կողմից՝ փակ, գաղտնի քուէարկութեամբ: Եւ ներկայ ԳՄն ընտրուել է վստահութեան շատ մեծ քուէով: Երկրորդ՝ Դաշնակցութիւնում ղեկավարումը կոլեգիալ է եւ որեւէ մէկը, առաւել եւս՝ իմ ձեռամբ հարցեր չի կարող կարգաւորել: Այնպէս որ՝ Դաշնակցութիւնը Դաշնակցութիւն է, որոշումը՝ որոշում: Իսկ Աղուան Վարդանեանի վերաբերեալ կայացուած որոշումներն էլ մեծ հաշուով, կարծում եմ, չեն խաթարի մեր մարդկային, ընկերական յարաբերութիւնները>>: