Կաշառակերութիւնը Պէտք Է Արմատախիլ Ընենք. Նիկոլ Փաշինեան Կը Մեկնաբանէ Ոստիկանապետի Եւ ԱԱԾ Տնօրէնի Նշանակումները

By Asbarez | Friday, 11 May 2018

 

933075


ԵՐԵՒԱՆ, <<Արմէնփրէս>> - Հայաստանի վարչապետ Նիկոլ Փաշինեան Ոստիկանութեան նորանշանակ պետ Վալերի Օսիպեանէն եւ Ազգային անվտանգութեան ծառայութեան նորանշանակ տնօրէն Արթուր Վանեցեանէն կ՛ակնկալէ լրջագոյն արդիւնքներ:

<<Մեր յեղափոխութիւնը նոր էջ է բացում: Յեղափոխութիւնից առաջ ես ու Վալերի Օսիպեանը, դուք եւ Վալերի Օսիպեանը, մենք եւ ոստիկանութիւնը ֆիզիկապէս գտնւում էինք փշալարերի տարբեր կողմերում, եւ ես մտածեցի, որ այս որոշումը պէտք է խորհրդանշական նշանակութիւն ունենայ: Պէտք է բոլորս այս որոշումից յետոյ նոյն կողմում յայտնուենք: Սա խորհրդանշական է, եւ պէտք է փշալարերի մշակոյթը փորձենք Հայաստանի Հանրապետութիւնից վերացնել: Յոյս ունեմ, որ պարոն Օսիպեանը կ՛արդարացնի ՀՀ քաղաքացիների յոյսերը, որովհետեւ այսօր ոստիկանութիւնից շատ բան է կախուած, մասնաւորապէս, իրաւակարգի, օրինականութեան, քաղաքացու ինքնազգացողութեան առումով: Վալերի Օսիպեանի առջեւ շատ յստակ խնդիրներ եմ դրել, որ ՀՀ քաղաքացիները պէտք է իրենց զգան վստահ, պաշտպանուած, եւ որեւէ բան չպէտք է սպառնայ նրանց այս զգացողութեանը>>, <<ֆէյսպուք>>ի իր էջի միջոցով ուղիղ եթերով յայտարարեց Նիկոլ Փաշինեան:

Վարչապետը ԱԱԾ գործառոյթներուն մէջ շեշտած է երկու հարցեր:

<<Ըստ էութեան, այն գործառոյթները, որոնք կապուած են հակահետախուզութեան, հետախուզութեան հետ՝ ԱԱԾն պէտք է լիարժէք կատարի, որովհետեւ սա անվտանգութեան արտաքին կոմպոնենտն (բաղադրամասը-Խմբ.) է: Գիտէք, որ ԱԱԾն զբաղւում է հիմնականում մաքսային գործառոյթներով, մաքսանենգութեան հետ կապուած յանցագործութիւններով, եւ ԱԱԾ առաջիկայ խնդիրներից պէտք է լինի ընդհանրապէս բացառել մաքսային ոլորտում որեւէ կարգի չարաշահումը>>, ընդգծեց Հայաստանի վարչապետը:

Ըստ Նիկոլ Փաշինեանի՝ ԱԱԾն պէտք է լրջագոյն գործառոյթներ իրականացնէ կաշառակերութեան դէմ պայքարի ուղղութեամբ:

<<Իհարկէ, սա վերաբերում է նաեւ ոստիկանութեանը, եւ մենք պէտք է կոռուպցիան ուղղակի արմատախիլ անենք Հայաստանի Հանրապետութիւնից ու դա պէտք է անենք շատ արագ, չափազանց արագ: ՀՀ քաղաքացիներն ամէն օր դա պէտք է զգան: Այս գործառոյթների իրականացման մակարդակից է կախուած լինելու ոստիկանութեան պետի եւ ԱԱԾի աշխատանքի գնահատականը: Մեզ պէտք են լինելու արդիւնքներ, ժողովրդին պէտք են տեսանելի արդիւնքներ, եւ մենք այս պահից սկսած եւ յետագայում պաշտօնեային գնահատելիս պէտք է ելնենք այն արդիւնքներից, որոնք նրանք ցոյց կը տան: Ըստ այդմ, ՀՀ քաղաքացիները պէտք է շատ արագ տեսնեն այդ արդիւնքները եւ գոհ լինեն ԱԱԾ եւ ոստիկանութեան աշխատանքից՝ մաքսային ոլորտում, ճանապարհային ոստիկանութիւնում, ոստիկանութեան որակի հետ կապուած եւ այլն>>, յայտնեց կառավարութեան ղեկավարը, աւելցնելով, որ <<ակնկալում եմ, որ հանրութիւնը, որպէս բարձրագոյն իշխանութիւն, ինչպէս իմ, ինչպէս այլ պաշտօնեաների, այնպէս էլ ԱԱԾ տնօրէնի եւ ոստիկանութեան պետի աշխատանքը կը պահի վերահսկողութեան ներքոյ, եւ մենք կ՛ունենանք մի իրավիճակ, որից գոհ կը լինենք բոլորս>>:

 

comments

Advertisement