ԵՐԵՒԱՆ -ՀՀ սփիւռքի նորանշանակ նախարար Մխիթար Հայրապետեան կ՛առաջարկէ ստեղծել երկպալատ խորհրդարան, որոնցմէ մէկուն մէջ ներկայացուած ըլլան միայն Սփիւռքի ներկայացուցիչները:

<<Յառաջիկային պիտի փորձեմ անդրադառնալ այս հարցին: Ասիկա միանձնեայ որոշում չի կրնար ըլլալ: Մեր քաղաքական աշխատակազմի ծրագիրին մէջ ներառուած այդ գաղափարը պէտք է քննարկուի, նորացուի ու համաձայնեցուի: Ես իմ աշխատակազմին հետ այդ գաղափարի ակունքներուն մէջ կանգնած եմ>>, ըստ <<Սփութնիք Արմէնիա>>ի յայտնեց Հայրապետեան:

Ըստ անոր՝ ասիկա Սփիւռքի հետ համագործակցելու ու Սփիւռքը հարցերու ընդունման գործընթացին մէջ ներառելու ճիշդ ուղի է: Նախարարը յայտնեց, որ կարելի չէ միանշանակ պնդել, թէ նախաձեռնութիւնը պիտի ներառուի կառավարութեան ծրագիրին մէջ: <<Բայց ես յառաջ պիտի տանիմ այդ գաղափարը: Անիկա մեր ծրագրային կարեւորագոյն կէտերէն է>>, ըսաւ Հայրապետեան:

Նախարարը նշեց, որ նախարարութիւնը այս հարցով առաջարկներ պիտի ընդունի նաեւ Սփիւռքի ներկայացուցիչներէն: Այդ պատճառով չի բացառուիր, որ բուն նախաձեռնութեան մէջ փոփոխութիւններ ըլլան:

Նախարարին համաձայն՝ խորհրդարանի ներկայացուցիչները պէտք է ընտրուին գաղթօճախներու մէջ:

14 Մայիսին, սփիւռքի նախարար Մխիթար Հայրապետեան սփիւռքի նախարարութեան մէջ իրականացուց իր առաջին աշխատանքային խորհրդակցութիւնը: Նորանշանակ նախարարը կառուցուածքային ստորաբաժանումներու ղեկավարներուն ներկայացուց Հայաստան-Սփիւռք գործակցութեան իր տեսլականը, պատկերացումներն ու նախարարի պաշտօնին առաջին քայլերը:

Կառուցուածքային ստորաբաժանումներու ղեկավարները ներկայացուցին վարչութիւններու գործառոյթները, անոնց կատարած աշխատանքը, ընթացիկ եւ ապագայ ձեռնարկներու ժամանակացոյցը:

Մխիթար Հայրապետեան նշեց, որ երիտասարդական եռանդը, նոր ու համարձակ գաղափարները եւ մօտեցումները կը համադրուին գոյութիւն ունեցող փորձառութեան հետ, եւ կառոյցը կը շարունակէ նոր թափով աշխատիլ:

Նշենք, որ սփիւռքի նոր նախարարը նշանակուեցաւ 11 Մայիսին: Այս պաշտօնով ան փոխարինեց նախկին նախարար Հրանոյշ Յակոբեանը: Մխիթար Հայրապետեան նոր վարչապետ Նիկոլ Փաշինեանի կառավարութեան մէջ ամենաերիտասարդ նախարարն է. ան 28 տարեկան է: