ԵՐԵՒԱՆ - Հայաստանի ոստիկանութեան Կազմակերպուած յանցաւորութեան դէմ պայքարի գլխաւոր վարչութեան ծառայողները 18 Յունիսին ստացան շտապ տեղեկութիւններ, որ Երեւանի Սողոմոն Տարօնցի 22 հասցէի ինքնաշարժի կայանատեղիին մէջ կայանուած են «Ուազ» եւ «ԳԱԶ» վաճառանիշով ինքնաշարժներ, որոնք բեռնուած են միսի պահածոներով:
Հայաստանի ոստիկանութեան հասարակայնութեան հետ կապի եւ լրատուութեան վարչութենէն տեղեկացուցին, թէ նշուած ինքնաշարժներու վարորդները, որոնք ԵԿՄ անդամներ են, նոյն ինքնաշարժներով տեղափոխուած են ոստիկանութեան Կազմակերպուած յանցաւորութեան դէմ պայքարի գլխաւոր վարչութիւն: Մեքենաները զննելով՝ յայտնաբերուած են ընդհանուր 2980 հատ <<Վաճառքի ենթակայ չէ. զինուորի բաժին>> գրութեամբ միսի պահածոներ: Վարորդները յայտնեցին, որ 16 Յունիսին, Արշակունեաց 22 հասցէին վրայ գտնուող ԵԿՄ վարչութեան շէնքէն իրենք պահածոները բեռնած են Նազիկ Ամիրեանի ցուցմունքով: Հանգամանքները պիտի պարզուին:
Նազիկ Ամիրեան Ազգային ժողովի պատգամաւոր Մանուէլ Գրիգորեանի կինն է: