ԵՐԵՒԱՆ, <<Արմէնփրէս>> - Վարչապետ Նիկոլ Փաշինեանի համար իր գործունէութեան երկու կարեւոր ուղղութիւններն են՝ կաշառակերութեան դէմ պայքարն ու բարձր արհեստագիտութեան ոլորտի զարգացումը:
Վարչապետը այս մասին յայտարարեց <<Սինոփսիս Արմէնիա>> ընկերութիւն այցելութեան ընթացքին, որուն ներկայ էին ընկերութեան աշխատակիցները:
Նիկոլ Փաշինեան նկատել տուաւ, որ բարձր արհեստագիտութեան ոլորտը կը կոտրէ անհնարինի սահմանը եւ կ՛ընդլայնէ հնարաւորի շրջանակը:
<<Ես այսպիսի խորհրդանշական պատկեր ունեմ իմ մտքում: Եթէ իմ տեսադաշտում գտնուող որեւէ մէկի բարեկեցութեան մակարդակը աճում է, սովորաբար դա կապուած է երկու դէպքի հետ. կամ այդ մարդը ներգրաւուած է կոռուպցիայի մէջ, կամ բարձր տեխնոլոգիաների ոլորտում: Դրա համար էլ իմ գործունէութեան երկու ամենակարեւոր ուղղութիւններն ու ուշադրութիւնը կենտրոնացած են կոռուպցիայի ու բարձր տեխնոլոգիաների հետ կապուած խնդիրների վրայ: Առաջին դէպքում՝ մտայնութիւնն այն է, թէ անհնար է, միեւնոյն է՝ ոչինչ չի փոխուի, որեւէ յոյս չկայ: Երկրորդ խորհրդանիշն ասում է, որ անհնար ոչինչ չկայ: Դրա համար էլ մենք կարեւորում ենք բարձր տեխնոլոգիաները, քանի որ դա ընդլայնում է հնարաւորի սահմանը>>, նշեց վարչապետը:
<<Պէտք է Հայաստանը լքելու արտագաղթը փոխարինենք Հայաստանի ներսում մի իրականութիւնից միւսը տեղափոխուելու արտագաղթով: Այս իմաստով կրթութեան մասին խօսակցութիւնն ամենակարեւորն է: Կրթութիւնը միայն գիտելիքի ձեռքբերումը չէ, իհարկէ, դա կրթութեան կարեւոր բաղադրիչն է, բայց ամէն ինչ սկսած՝ վարուեցողութիւնից, մինչեւ երկու մարդու միջեւ յարաբերութիւններ, կրթական հարցեր են>>, շեշտեց վարչապետ Նիկոլ Փաշինեան: